Read Saluan YEREMIA 50 Bible Online

YEREMIA 50 - Saluan bible

YEREMIA 50

¹ Sumo uuka na potuunon mae nu Tumpu hi belengku, mongkona kota' Babel tiba miannyo anu jojoong kiijo',

²“Pokonai tanda ka' bebakonmo na lele hi to bansa-bansa taalu' Babel pinatundu'mo! Bolimo opohowini na han aijo'! I Merodakh pilogotnyo ihansunanmo ka' mule sinin na patongnyo anu toto henyu-henyu singkapmo nobiha-biha', ka' mule' bapilogotan nu aha madi'mo iholomatan.

³Sa'angu' na bansa lengkat mae isasu utara tokamo mae montumbuhi Babel ka' mompojadimo lipu' aijo' timbali padang tampat anu kunmo. Manusia tiba binatang anu ikiijo' mopalaimo, ka' madi'mo daagi' ko anu jojoong ikiijo' mae.”

⁴Tumpu notatae, “Toka itempo' aijo' aha mian nu Israel tiba Yehuda tokamo mae hingga-hinggat ka' lewa'mo humang molio Aku, Tumpu Allah nu aha.

⁵Aha molelekimo jalan mamba i Sion, lantas mambamo mompatui jalan aijo'. Aha mombaumo palajanjian anu sampe toka sidu-sidutu' tiba Aku, ka' sabole-bolemo nu toongi nu aha.

⁶Mian anu palesayamo hi beleng-Ku sumomo ahi' domba anu pinopilayamo da talas nu to pola-polaya' aita' mae ibungkutnyo. Aha sola'mo mamba lengkat mae isa'angu' na bungkutnyo mamba ibungkutnyo sangga'at, ka' madi'mo daagi' nu sumbu' nu aha pa' iya mae na laigan nu aha.

⁷Aha otumbuhimo ka' osakisamo nu mian iwi-iwi' anu singkabot tiba aha. Iwi-iwi' na sampobali nu mian anu palesayamo hi beleng-Ku notataemo, ‘Apaa na anu binauntomo, madi' sala', kalana mian haha aijo' binaladosa'mo hi Tumpu. Mompolee' nu aha na palesaya ahi' hi Tumpu, jadi sabenannyo aha na sabole-bole ahi' tulu-tulutan hi Ia.’

⁸ O, mian nu Israel, popalaimo pala'i na Babel! Belemiu na momonanyo tionyo ahi' mamba da mian sangga'at suele mambaje.

⁹Ku tipaha'imo na to bansa-bansa anu toto hoso-hosan lengkat mae isasu utara da nu tumbuhimo nu aha na Babel. Nu atunje nu aha na balisan montumbuhi mongewa Babel ka' mompopatundu'mo aha. Aha atina'mo na to mia-mian anu toto pande-pande na mompana' ka' hihisnyo madi' toho' panseon.

¹⁰Babel opahuhuakonmo ka' mian anu mompahuhuakon mongalamo iwi-iwi' apaa na anu nu ka'ima'i nu kinyonyoa nu aha. Aku, Tumpu, notataemo.”

¹¹Tumpu notatae, “O, mian nu Babel, belemiu nontololangimo mian anu palesayamo hi beleng-Ku. Belemiu naha lumpatanmo kalana ilame'mo sumomo ahi' ajahan anu nontihaha'mo, ka' mule' sumomo ahi' sapi' anu hau-haunyo mongotot.

¹²Panyo belemiu timbalimo bansa anu madi'mo ko alati'nyo apa-apaa hi aha bansa iwi-iwi'. Kota' nu belemiu anu daka' aijo' o alumo ka' mule' opopo ambangmo. Lipu' nu belemiu timbalimo padang tampat anu mateges ka' kunmo ka' motismo.

¹³Kalana Aku notambuha'mo sahingga Babel timbalimo tampat anu nohobo'-hobo'mo ka' madi'mo daagi' ko anu monjojoongi. Iwi-iwi' na mian anu motulu ikiijo' tolokengkengmo ka' mule' mabuhukmo.

¹⁴O, belemiu anu toto pande-pande na mompana'! Atunmo na balisan nu belemiu da olambanimo ka' otumbuhimo na Babel. Peletakonmo iwi-iwi' na hihis nu pana' nu belemiu mokiijo' i Babel, kalana ia binaladosa'mo hi beleng-Ku.

¹⁵Aisakonmo na ais nu pahampatean aijo' titikup ikota' aijo'! Uuka aiya Babel madi'mo daagi' noko ala nombau apa-apaa. Sinin na pagannyo mesen singkapmo biniha-biha' ka' ihobo'akon. Aku nombalosakonmo palabuatan nu Babel. Kalana aijo' baumo na aha susumo aha lewa'mo nombau mian sangga'at.

¹⁶Bolimo daagi' opobee' na mian mongale' kabai mongala isi nu ale' ilipu' aijo'. Iwi-iwi' na mian anu lengkat mae isalipu'an minsusule'mo ahi' ilipu' nu aha, kalana aha mabuhukmo hi suludadu anu montumbuhimo mae.”

¹⁷Tumpu notatae, “Mian nu Israel sumo sanggombu na domba anu iloloi'mo ka' pinosungkehetmo nu singa. Momonanyo aha tinumbuhanmo itomundo' Asyur, lantas mule' i Nebukadnezar tomundo' nu Babel nonggulugudi'mo buku nu aha.

¹⁸Kalana aijo', Aku, Tumpu Anu Balakuasa hondo, Tumpu Allah Israel mohukumo i Tomundo' Nebukadnezar tiba lipu'nyo susumo Aku nohukumo itomundo' Asyur.

¹⁹Aku po ule'mo monsule'akon mian nu Israel ilipu' nu aha. Aha mongkaanmo isi nu ale' anu itano' nu Bungkutnyo Karmel tiba anu idaerah Basan. Aha mobosumo nu isi nu tano' anu i daerah Efraim tiba Gilead.

²⁰Toka itempo'nyo aijo' Israel tiba Yehuda belesi'mo madi'mo baladosa', kalana Ku ampunimo na to mia-mian anu pinosalamat-Kumo. Aku, Tumpu, notataemo.”

²¹Tumpu notataemo hi sa'angu' na bansa anu lengkat mae i utara, “Tumbuhimo na mian anu jojoong i Merataim tiba Pekod. Pateimo ka' hansunimo na aha. Sampa bau na anu pinalentahkon-Kumo. Aku, Tumpu, notataemo.”

²²Hengge' nu pahampatean pinolintupmo ilipu' ka' jinadimo na kahansunan anu daka' hondo.

²³Songko-songko na dunia pinanmo nu Babel sampe ihansun, panyo uuka aiya pompan aijo' nopato'mo! Songko-songko na bansa tinolokengkengmo na nohongo apaa na anu tinadimo ilipu' aijo'.

²⁴Tumpu notatae, “O, Babel, beleyum nongewamo Aku, kalana aijo' beleyum tinongkonamo iso'o anu pinokonang-Ku ponso'o beleyum panyo beleyum madi' ahi' nangalati'.

²⁵Gudang nu sanjatang-Ku binuka'-Kumo ka' kalana tambuha'-Ku, sinabatakon-Kumo na sanjata haha aijo', kalana Aku Tumpu Anu Matangkas na Kakuasa'an tionyo ahi' mompojalanmo sa'angu' na kalaja i Babel.

²⁶Tumbuhimo na Babel iyaya na tampat pinsoopan ka' hobo'akonmo na gudang iwi-iwi' anu ko gandumnyo! Tambunmo na santo bala-balang anu ingagoanmo susumo belemiu nontambunmo gandum! Hansunimo na lipu' aijo'! Bolimo daagi' ko anu opotuha'.

²⁷Pateimo iwi-iwi' na suludadu nu aha! Hopu'imo na aha! Silakamo na bansa Babel! Tinokamo na tempo'nyo aha ohukumo!” (

²⁸Aha to mia-mian anu nopalaimo namba i Yerusalem lengkat mae i Babel nonsisikmo mosia na Tumpu Allah-nto nombalosakonmo palabuatan nu aha mian Babel kona aijo' hi Laigan nu Tumpu.) p

²⁹ Tumpu notatae, “Palentah na to mia-mian anu pande mompana' da montumbuhimo Babel. Pokaumo na batu-batu mian anu pande mompana'. Lambanimo na kota' aijo' ka' boli opobee' ko anu samian na tumuu'. Balosakonmo iwi-iwi' na palabuatan ka' baumo pa' mosia na mombau ia sitimbang tiba tiba kalakuannyo, kalana ia nombaumo palabuatan anu madi' ko adatnyo hi beleng-Ku, Anu Susi' hondo, Tumpu Allah Israel.

³⁰Toka isinaa aijo' to oli-olitaunyo silakamo itutus jalan nu kota' nu aha ka' mule iwi-iwi' na suludadunyo mohopu'mo. Aku, Tumpu notataemo.

³¹O, Babel, beleyum saja' talalo buulon! Mokonyo aijo', Aku, Tumpu Anu Matangkas na Kakuasa'an, Tumpu Allah Anu Balakuasa hondo mongewamo beleyum. Tinokamo na tempo'nyo beleyum Ku hukumo.

³²Bansa nu beleyum anu talalo buulon aijo' tosumpunmo ka' tombahangkangmo. Madi'mo daagi' ko samin na anu montulungi beleyum da po ule' tuminjo. Sinin na kota' nu beleyum Ku papumo, ka' iwi-iwi' na daerahnyo ohansunimo.”

³³Tumpu Anu Balakuasa hondo notatae, “Mian nu Israel tiba mian nu Yehuda nonta'upmo kasansala'an. Iwi-iwi' na anu nohakop ka' nomboamo aha pagalamo ahi' nonjaga totu-totu'u ka' madi' ka'oho' nompolapas aha.

³⁴Panyo Aku anu momposalamat aha aijo' mahoson, sanggong-Ku Tumpu Anu Balakuasa. Posi aku na balajuang mongulus palakala nu aha ka' momboa kadamean idunia aiya. Panyo kona hi aha Babel Ku potokamo mae na ka'idekan nu tano' tiba kabuhukan.”

³⁵Tumpu notatae, “Silakamo na Babel tiba mian da'isannyo ka' to mia-mian anu ko pangkatnyo ipamalentahan tiba aha mian anu toto pande-pande aijo' hi aha!

³⁶Silakamo na to nabi-nabi nu aha Babel! Aha pambaleko'i ka' ponga'. Silakamo na suludadu nu aha Babel anu toto babaani! Talalomo nabuhuk na aha!

³⁷Hansunimo na ajahan tiba kareta anu nupake nu aha mahampate! Silakamo na to sulu-suludadu anu nu tamboi nu aha! Talalomo ilupe na aha! Hansunimo na kakaya'an nu aha Babel! Pahuhuakonmo na halata' nu aha!

³⁸Otimo na kaunyo nu aha iwi-iwi' ka' ale' nu aha! Kalana Babel nobuke'mo nu bapilogotan nu aha anu okahegati, anu nonsaduakonmo to mia-mian anu monsombah ia iwawengmo.

³⁹ Kalana aijo' Babel timbalimo tampat nu to tinu-tinumpu tiba to roh-roh anu ma'idek ka' to tomo-tomonsi unta. Sampe toka sidu-sidutu' madi'mo daagi' ko anu jojoong ikiijo' mae.

⁴⁰ Susumo Aku nohansunimo Sodom tiba Gomora ka' kampung toto ise-ise' idaerahnyo, sumo aijo'mo na Aku mohansuni Babel. Madi'mo daagi' ko anu jojoong ikiijo' mae. Aku, Tumpu, notataemo.

⁴¹Sa'angu' na bansa anu mahoson hondo nolengkatmo mae ilipu' majo'on sasu utara. Aha nambamo mae ka' manjoo' na tomundo' da mahampatemo.

⁴²Aha nomboa mae toongon bau pahampate te pana' tiba talombo'; aha buhingison hondo ka' madi' monsumbu' mongampuni. Susumo onyi' nu ambai anu bikolonmo sumo aijo'mo na onyi' nu galupak nu ajahan nu aha anu pinolia'mo kalana mambamo montumbuhi Babel.

⁴³Salatan nohongo lele aijo' itomundo' Babel madi'mo daagi' noko ala nombau apa-apaa. Ia tinokanmo nu buhuk anu taha-tahahumo, ka' nongoa'imo sakit susumo boune anu kahanda'mo mompohampe anak.

⁴⁴Sumo singa nasasubamo mae lengkat i alas anu daka' koko Kaunyo nu Yordan ka' nambamo ipadang tampat pongototan nu domba, sumo aijo'mo na Aku, Tumpu, mompasasubahimo mae aha mian nu Babel sahingga aha mopalaimo mompala'imo kota' nu aha lia-lia'. Lantas Ku pile'imo na samian da bau polaya' mompalentah bansa aijo'. Ihe na timbali bau pompokakanakonan Aku? Ihe na baani mahampalakala tiba Aku? Te daagi' ko polaya' anu moko ala mongewa Aku?

⁴⁵Mokonyo aijo', potombihing mae apaa na anu tinanga'an-Kumo hi kota' Babel, ka' apaa na anu kahanda'mo Ku bau hi aha mian anu jojoong ikiijo'. To ana-anak nu aha suele oboamo ahi' da mambamo, ka' iwi-iwi' na mian mabuhukmo.

⁴⁶De maluanyo Babel opatundu'mo, ohongomo na anu hengge anu tahahumo hondo sahingga songko-songko na dunia tolokengkengmo ka' mabuhukmo; tando' nu to mia-mian anu jojoong ikiijo' kahongoanmo hi to bansa-bansa sangga'at.”