Read Saluan YEREMIA 6 Bible Online

YEREMIA 6 - Saluan bible

YEREMIA 6

¹Lako palaimo, o tomia-mian nu Benyamin! Pala'imo na Yerusalem! Po onyi'mo na tolompet kiijo' i Tekoa ka' pomoakmo na apu salaku tanda i Bet-Kerem! Balaa' tiba kasilaka'an anu opalias hondo montumbuhimo mae lengkat isasu utara.

²Kota' Sion handa hondo, panyo nu hansunimo nu Tumpu;

³aha anu balakuasa mombaumo kema' kiijo' mae tiba suludadu nu aha. Titikup na kota' aijo' nu potinjo'mo nu aha na kama-kema' nu aha, toto samian itampat anu nu ka'ima'i nu aha.

⁴Aha motatemo, “Ya donganmo, posadia montumbuhimo Yerusalem! Imbo' otumbuhintomo sinaa aiya!” Panyo lapas mae aha motataeje mule', “Adoh tinalambatmo! Sinaa montampu'unimo pintung, lolung montampu'unimo mantan.

⁵Sahanyo otumbuhintoje de malomo ka' ohansunimo na benteng haha aijo' ikota'.”

⁶Tumpu Anu Mahakuasa nompalentahmo aha anu balakuasa haha aijo' da montaa'i kau' ka' mombau puge'nyo nu palatahanan pontumbuhian Yerusalem. Tumpu notatae, “Kota' aiya Ku hukumo kalana kiijo' i unonyo manjoo'mo hondo na nomabu palabuatan monsuka-sukai na mompalentah.

⁷Susumo mata nu uee tataap monsabatakon mae uee anu molino, sumo aijo'mo na kota' aijo' tataap mompodaagi' palabuatan anu ma'idek. Ola lele kabuhingisan ka' palabuatan sola' montololangi na anu Ku hongo ikota' aiya; bela tiba panyakit na anu Ku toa iyaya mae.

⁸O mian anu jojoong i Yerusalem, opai-pailio da iwi-iwi' na kasansala'an aijo' timbalimo ahi' sa'angu' na pokide' hi belemiu! Dumo ahi' ku pala'i na belemiu ka' Ku bali'imo na kota' nu belemiu timbalimo padang tampat anu mateges anu madi' nu jojoongi nu mian.”

⁹Tumpu Anu Mahakuasa notatae mae hi belengku, “Israel o ingkotimo hondo-hondo susumo ale' nu anggur bua'nyo otipuimo iwi-iwi'. Kalana aijo' hau-haunyo daagi' ko tempo posalamatakonmo na anu daagi' tinontuha'.”

¹⁰Tinaamanku, “O Tumpu hihe na potataeanku, ka' ihe na anu ku pokinde'i? Aha panggaga hondo ka' madi' ka oho' mompalahatikan. Nu kokojoi nu aha ka' nu ka'ideki nu aha na potuunon nu Belento anu pinoto'ingkumo hi aha.

¹¹Tambuha' nu Belento hi aha suele ahi' ningoboamo ibutongku, o Tumpu! Madi'mo opokotahan.” Lantas Tumpu notataemo, “Potudunmo na tambuha' atina' hi to ana-anak anu aijo' ijalan daka' ka' hi to pomu-pomuda anu sinihukmo. Mo'ane tiba boune ohakopmo, ka' anu talalomo ilangkai' ka' binengkele'mo suele ahi' madi'mo opobebas.

¹² Laigan nu aha obee'mo hi aha mian sangga'at, sumo aijo' mule' ale' tiba bengkele' nu aha. Mian anu jojoong ilipu' aiya Ku hukumo.

¹³Aha iwi-iwi', anu tu'amo tiba anu daagi' anak, molio ka untungan tiba jalan anu madi' hodi'. Paka laus mule' nabi tiba imam suele nongakalimo miam.

¹⁴ Bela nu mian anu palesayamo hi beleng-Ku nu anggap nu aha ola bela ise-ise'. ‘Ah, madi' mongkuka,’ aha notatae, ‘iwi-iwi' ma'ima' ka' madi' ko apa-apaanyo.’ Pada han madi' ahi' hondo-hondo sumo aijo'.

¹⁵Sabenannyo aha ma ambangmo ahi' kalana nombaumo iwi-iwi' anu moko ambang aijo'. Panyo kinabanmo na ohup nu aha ka' madi'mo nonsumbu' ambang. Kalana aijo' aha ohukumo susumo mian sangga'at; sisikon nu aha mingkotmo de Ku hukumo na aha. Aku, Tumpu, notataemo.”

¹⁶ Tumpu notatae hi mian anu palesayamo hi Ia, “Tinjo' ipopanga'an-popanga'an nu jalan ka' palahatikan ima-ima'! Pokilawa na jalan anu naipuan mae, ka' iya na anu ma'ima'an hondo na jalan haha aijo'. Tuusakonmo na jalan aijo' da belemiu tumuu' madi' ko anu mompoposia.” Panyo aha notatae, “Madi', kami madi' mongka'oho' montuusakon jalan aijo'!”

¹⁷Lantas Tumpu nompo uli-ulitmo nohangkat ponjaga-ponjaga da mompotuka'akon hi aha da mompotombihing salaku tanda tolompet. Panyo mian notataemo, “Kami madi' mongka'oho' mompotombihing.”

¹⁸Kalana aijo' Tumpu notataemo, “Potombihing mae o to bansa-bansa! Belemiu tionyo ahi' monsumbu' apaa na anu saidi' mae jadi hi aha mian anu palesayamo hi beleng-Ku.

¹⁹Palahatikan o dunia! Mian anu palesayamo hi beleng-Ku madi' mongka'oho pangajalan-Ku mae na balaa' hi aha.

²⁰Bau apaa na kamangian anu nu boa mae nu aha hi beleng-Ku lengkat mae i Syeba, kabai santo lampa-lampa anu lengkat mae ilipu' anu majo'on? Madi' sanang na Aku montalima palasombahan nu aha. Madi' Ku ka'ima'i na koloban-koloban nu aha anu opotunu.

²¹Ku potosumpunmo na mian haha aiya da tosumpun ka' tombahangkangmo. Tuuma tiba anak, sangalu tiba sampo ohani laigan iwi-iwi' aijo' silakamo.”

²²Tumpu notatae, “Sa'angu' na bansa anu mahoson hondo nolengkatmo mae lengkat ilipu' anu majo'on isasu utara. Aha toka mae kahanda'mo mahampate.

²³Aha ko toongon mae bau pahampate te pana' tiba talombo'; aha buhingison hondo ka' madi' monsumbu' mongampuni. Susumo onyi' nu ambai anu binokolonmo sumo aijo'mo na onyi' nu galupak nu ajahan nu aha anu tinigamo da mambamo montumbuhi Yerusalem.”

²⁴Nohongo lele aijo', anu jojoong i Yerusalem madi'mo daagi' noko ala nombau apa-apaa. Aha tinokanmo nu buhuk ka' nongoa'imo sansala susumo boune anu kahanda'mo mompohampe anak.

²⁵Aha madi'mo baani mamba ijalan kabai mamba i ale' kalana iyaya mae sampobali' anu ko toongon bau pahampate nombaumo palabuatan anu buhingison.

²⁶Tumpu notataemo hi mian anu palesayamo hi Ia, “Pusokmo na hude kalung ka' pingkaliade'mo i uno nu abu'. Oa'imo na kasusa'an ka' hangimo tala-talalo susa' susumo mian mohangi kalana ko anumo sinilaka na anaknyo anu tumpenyo, kalana anu mompatei montumbuhimo mae belemiu nu potolokengkeng mae.”

²⁷Lantas Tumpu notataemo hi Yeremia, “Soba uji' na mian anu palesayamo hi beleng-Ku susumo beleyum monguji' logam. Soba selidiki na kalakuan nu aha!

²⁸Aha iwi-iwi' saja motomuhuk ka' panggaga hondo, sumomo ahi' ko kuutnyo nu tambaga ka' besak. Aha saja mombau palabuatan anu mabusik ka' lumajang pa' momoya mombebakon lele anu mombusiki sanggo nu mian sangga'at.

²⁹Monsuang na sukupmo ahi' na kopanasnyo panyo kotolan nu logam na madi' ahi' mongka'oho' mo'ena ka' mohontang. Palasuma na saja'mo monguji' mian anu palesayamo hi beleng-Ku da belesi'mo kalana aha mian anu toto ide-idek na kalakuannyo madi' o alini.

³⁰Aha osanggohimo salaka anu o alinmo kalana Aku, Tumpu, nongalinmo aha.”