Read Saluan MOHAANGI 1 Bible Online

MOHAANGI 1 - Saluan bible

MOHAANGI 1

¹Talalomo hondo iliing na Yerusalem uuka aiya, kota' anu u'utu mae lame' hondo. U'utu mae talalo hondo mamba i mona hi aha to bansa-bansa, uuka aiya tinimbalimo susumo anu balu. U'utu mae kota' anu talalo hondo talasanggo hi aha to bansa-bansa uuka aiya tinimbalimo susumo balu.

²Sampahu toka sampahu ia humaang kalana sinusa'mo lolu'nyo jinumujumo i gagisingnyo. Madi' ko samian pe'e na to sindu-sindua'annyo na mongka'oho' mohase' ia. Ia kinabisa'anmo nu to sanga-sangalunyo anu tinimbalimo sampobali'nyo.

³Mian anu jojoong i Yehuda nompala'imo lipu'nyo kalana binotuananmo ka' talalomo sinansala. Uuka aiya aha jijojoongmo i to bansa-bansa madi'mo ko tampat anu pohumpakan kadamean ka' kasanangan. Sampobali' nontumbuhimo aha tempo'nyo aha sinansalamo.

⁴I tempo'nu sinaa anu polameananmo madi'mo ko samian pe'e na anu toka i Laigan nu Tumpu Allah. To lalangkoyang anu manyanyi kiijo' mae sinansalamo ka' to ima-imam notusa'mo ka' nompele-pele'mo. Madi'mo ko mian isabatan anu toto daka-daka' Kota' Sion sinongkahanmo nu susa'.

⁵Sampobali' nu aha binilahimo kalana nongkuasaimo. Tumpu nombaumo aha da sinansala, kalana talalomo hondo na dosa'nyo. Mian anu jojoong i kiijo' i hakopmo, ka' binoamo i tampat pinompojoongan.

⁶Kakaya'an nu kota' Yerusalem memo ahi' sisiknyo tempo'nyo naipuan mae. To pola-polaya'nyo i hentemo susumo jonga anu talalomo no'ohop. Aha madi'mo noko ala nombau apa-apaa hi aha sampobali' anu mololoi' mae.

⁷Salatan i hansunmo na kota' ka' sinansalamo, Yerusalem tinonginau'mo tempo'nyo naipuan mae, tempo'nyo ia daagi' ko halata'; mosia na miannyo anu jojoong i kiijo' pinatundu'mo nu sampobali', ka' madi' ko samian pe'e na tinoka nontulungi. Sampobali' haha aijo' ola ahi' mongkokojoi na montoa kahansunannyo.

⁸Yerusalem pinosi henyuannyomo na butongnyo Kalana nanjoo'mo na dosa' anu binau nu aha. U'utu mae iwi-iwi' moholomati ia, uuka aiya ola mongkokojoi kalana montoa ilanggo'mo Ia notusa'mo ka' nompele-pele'mo kalana ia na ambangmo.

⁹Inyata'mo hondo na kapahengasannyo panyo ia madi' mompajuli apaa na anu jinadimo i butongnyo. Talalo hondo ahi' na kinahansunannyo, panyo madi' ko samian pe'e na anu pohase' da sanang na kinyonyoanyo. Sahingga ia nomoitamo hi Tumpu da okalibosi mae, kalana to sampo-sampobali'nyo inguntungmo.

¹⁰Iwi-iwi' na halata'nyo ingagoanmo nu sampobali'nyo. Ia me montoa aha mompinsoopi Laigan nu Tumpu Allah, sa'angu' na kalakuan anu madi' nupobee' nu Tumpu hi mian anu ma'isa palesaya hi Ia.

¹¹I uno nu motusa' ka' mompele-pele'na miannyo anu jojoong i kiijo molio anu okaasan; balang anu ko halaga'nyo mahan pinontolosimo nu aha roti, ola kalana da aha tataap tumuu' ka' boli silaka. Yerusalem nolobo'mo, “O Tumpu, toa mae na aku, palahatikan mae na iwi-iwi' kasala'anku.”

¹²“O to mia-mian anu notulumo i jalan, toamo ka' palahatikan! Te daagi' mule' ko kasansala'an anu lebe maboat susumo anu ingoa'ankumo uuka aiya? Sakisa anu binee'mo mae nu Tumpu hi belengku, kalana pusanyo anu talalomo hondo aijo'?

¹³Lengkat mae i langit tinudunakon-Nyomo mae na apu nompapui toka-toka' i uno nu butongku. Pinokona-Nyo na so'o i ahopku, sahingga aku kinonanyomo ka' notua'mo. Lantas pinojohoknyomo na aku ola sausa'ku, na nongoa'i sansala kopinnyo sansina-sinaa.

¹⁴Ingala-Nyomo iwi-iwi' na dosa'ku, lantas pinosa'angu'mo na nomputi, ka' pino'olo'mo mae i gogohongku, sahingga boatnyo nompolu'usmo butongku. Tumpu nombee'mo aku hi sampobali'; aku madi'mo noko ala mongewa aha.

¹⁵Nusangka nu Tumpu madi' moko ala iwi-iwi' na suludadungku anu baani hondo. Pinalentahkon-Nyo na suludadu da mian anu daagi' olitau silaka iwi-iwi. Ia nompahampeja'akonmo bansangku sampe i hansun, susumo mian mompeeti bua' nu anggur.

¹⁶Aitu na sababnyo sahingga matangku i lolu'onmo, madi' ko anu mombee'i bau pombikas ka' mombee'i potatae anu moko sanang na kinyonyoa. Madi'mo daagi ko apa-apaa hi bansangku, kalana sampobali' na lebe balakuasa.

¹⁷I hangkatku na lima da momoita tulung panyo madi' ko anu mombee'i potatae anu moko sanang. Lengkat mae iya'a Tumpu nonsaimo mae sampobali'; aha tinokamae nompahampateakonmo aku. Aku binaumo susumo duhehe, balang anu okahegati aijo' hi aha.

¹⁸Panyo Tumpumo na anu totu'u, kalana palentah-Nyo madi'mo binatukanKu. Potombihing mae na aku, o to bansa-bansa, toa mae na aku i uno nu sansala. To oli-olitau ka' to lalangkoyangku i hakop ka' binoamo ka' binoamo i tampat pompojoongan.

¹⁹Aku molagamo to sanga-sangalungku anu mompahakona, panyo aha ola nongkabisa'i aku. To ima-imam ka' polaya' nu bansa iwi-iwi' sinilakamo i sinin na jala-jalan nu kota'. Tempo'nyo molio anu okaan, monsawan butong da madi silaka.

²⁰O, Tumpu! Palahatikan mae na aku, kinyonyoangku madi' sanang ka' pinusingmo i hansunmo kalana palabuatan mai-ma'idek u'utu mae. I songko-songko na jalan daagi' ko anu monsilakai, i uno nu laigan daagi' ko anu sinilakamo.

²¹O, Tumpu! Potombihing pe'e mae na kasansala'anku madi' ko anu mombee'i potatae anu moko sanang aku, To sampo-sampobali'ku i lame'mo, kalana belento nombahayaimo aku. Potokamo mae na sinaa anu jinanji'mo nu belento aijo', baumo suele na aha da sansala susumo aku.

²²Palahatikan iwi-iwi' na ka'idekan nu aha haha aijo', ka' baumo na aha susumo belento nombaumo aku, kalana iwi-iwi' na dosa' anu binaungkumo hi belento, Tina upkumo na kasansala'an kinyonyoangku sinusa'mo ka' butongku ko page-pagesuknyomo.”