Read Saluan MOHAANGI 2 Bible Online

MOHAANGI 2 - Saluan bible

MOHAANGI 2

¹Tumpu nongalamo sa'angu' na kaputusan i uno nu kapusan-Nyo, Sion kinuluban-Nyomo nu pikat hondomi'. Katalasanggoan nu Israel anu talalomo natangkas toka-tokamo i langit ingalin-Nyomo i dunia. Salatan Tumpu pinusamo laigan-Nyo pe'e kiita i Sion madi'mo ilinga-linga-Nyo.

²Batu-batu padang hemput ilipu' nu aha Yehuda madi'mo daagi kinokalibosan na Ia no hansuni. I uno nu kapusan-Nyo tinumbalakon-Nyomo sampe nohobo'mo na to bente-benteng anu mompagan lipu' aijo'. Kalaja'an aijo' tibamo to pola-polaya'nyo binau-Nyomo da pinatundu' sahingga na ambangmo.

³I uno nu kapusan-Nyo anu tala-talalomo kino suhu-suhut kahosaonan nu Israel binau-Nyomo da pinatundu'mo Salatan kita tinumbuhanmo nu sampobali' Ia madi'mo nontulungi. Susumo apu binanyela-nyelakmo anu nontoyo'imo apa-apaa sumo aitumo na tumpu nontambuha'i kita iwi-iwi'.

⁴Susumo sampobali' Ia nompotajumo pompeletnyo ka' nompopatumo mae hihisnyo hi kita Iwi-iwi' na mian anu nomposanangmo kinyonyoanto ningkotmo na pinatean-Nyo Sinumbuhakon-Nyomo na kapusan-Nyo susumo apu nokiijo' i uno nu kota' Yerusalem aiya.

⁵Tumpu tinimbalimo susumo sampobali'; Ia nontintipmo Israel sampe nahungku'mo Ia nohansunimo iwi-iwi' na benteng tiba laigan nu tomundo' ka' nompojoongmo mian anu sinilaka hi aha anu jojoong i Yehuda.

⁶Ia nohansunimo laigan-Nyo tampat posa'angu'an nu mian-Nyo anu palesayamo hi Ia monsombah Ia. Binau-Nyomo na mian da mongkolilimi sinaa nu Sabat tiba iwi-iwi' na sinaa molamean. Kalana Tumpu talalomo hondo pinusa imam tiba tomundo' madi'mo tinalima-Nyo.

⁷Tumpu madi'mo nontalima mezbah-Nyo anu susi-susi' aijo' ka' nompala'imo Laigan-Nyo; pinojohok-Nyomo na sampobali' nohobo'akon pagannyo mesen iwi-iwi'. Itampat naipuan mae pogalejaan ka' mombau-bauon, sampobali' lewa'mo nolo ais kalana inguntungmo na nahampate.

⁸Tumpu nomputusimo da iwi-iwi' na pagan mesen nu Sion tionyo ahi' ohobo'akonmo, Pagan mesen haha aijo' noko ukun-Nyomo da iwi-iwi' timbali ohansuni. Iwi-iwi' na pagannyo mesen tiba laigannyo tangka-tangkas uuka aiya memo kahansunannyo.

⁹Sabatan anu toto daka-daka' singkapmo tinabuhan nu tano'; iwi-iwi' nasupatnyo nopato'mo; tomundo' tiba pagawe nu pamalentah kiijo'mo mae ipinomboan aha. Atulan nu Tumpu madi'mo daagi ingajanakon; nabi madi'mo daagi nontoa anu nu potoa nu Tumpu.

¹⁰Aha to tu'a-tu'anyo nu kota' momo'mo suha-suhang i tano'; aha nongkakambuhakonmo abu' aita i ubak nu aha, ka' nompakemo hude kalung salaku tanda sinusa'mo Tolalangkoyang nompodukumo ahi' suele ubak nu aha toka-toka i tano'.

¹¹Matangku binangkakmo kalana aijo'mo ihumaang santuu'ku sinakisamo hondo Kinyonyoangku i hansunmo hondo na nontoa bansaa nahungku'mo montoa to ana-anak tiba bungamea' pinoso'mo tutuus jalan nu kota'.

¹²Nalawemo hondo na aha lewa' ihumaang momoita mongkaan ka' monginum hi tinanyo Susumo mian anu binelaonmo aha tinombahangkangmo tutuus jalan lantas sinilakamo tangku-tangkung hi tinanyo.

¹³O Yerusalem, kota' Sion anu oka ima'i kinapohobo'an nu beleyum ko ewanyo sumomo ndalangon, Apaa na anu timbali ku poto'i da mombee'i potatae anu moko sanang? Kalana madi' toho' ko anu sinansala susumo beleyum. Maumo mosia madi' ko anu moko ala mompo ule'akon kantumuu'an nu belemiu.

¹⁴Anu pinotokakon nu to nabi-nabi hi belemiu, ola ahi' leko' ka' pongakali nu aha. Aha madi' toho' mompoto'i dosa' nu belemiu sahingga kalana aijo' beleyum madi' mobabali'i palabuatan nu dosa' nu beleyum. Ola mule'ahi' aha nompoto'i hi belemiu potatae anu toto bale-baleko' mompigalapi.

¹⁵Iwi-iwi' na anu motulu mongalu beleyum, kalana ihansunmo songko-songko na beleyum Aha naha lilokanmo ka' notatae, “Te aijo'mo na kota' anu talalo hondo ma'ima' kota'anu nunu buulakon nu dunia?”

¹⁶Iwi-iwi' na sampobali' nu beleyum montoa ohup nu beleyum ka' mongka'ideki nu kokojoi nu aha na beleyum ka' lewa' motatae nganga' Aha motatae, “Kota' aijo' ihansunanmo mami! Ahennyo tinokamo ahi' na tempo'nyo anu pininmo na lewa' tinanda'an mami!”

¹⁷Tumpu nomposidamo tambuha'-Nyo anu naipuan mae noko tanga'an-Nyomo ka' pinoto'i-Nyomo hi kita. Kita ihansunan-Nyomo ka' madi'mo kinalibosan-Nyo, sampobali' bine'an-Nyomo ka untungan na nahampate Pinolame'-Nyomo na aha na montoa kita nahungku'mo.

¹⁸O to paga-pagan mesen nu Yerusalem, poloboo'mo hi Tumpu momoita tulung! Jujuhakonmo na lolu' susumo kaunyo moili sinaa pihi. Sabole-bolemo humaang bolimo belenti sampe butong nu beleyum lu'usmo!

¹⁹Po uli-ulit na mobula sampahu da oloboo'akon iwi-iwi' na isi nu kinyonyoa nu beleyum hi Tumpu. Poita da Ia molibos mae hi to ana-anak nu beleyum anu no ohopmo, ka' mule' anu pinoso'mo i iwi-iwi' na teku'an nu jalan.

²⁰O Tumpu toamo ahi' ka' palahatikan na aha anu sinsalamo nu belento aijo'! Pa' daagi ko anu toho'mo binau nu belento susumo aijo'? Tinanyo nongkaanmo posi anaknyo anu talalo hondo nu kalibosi, imam tiba nabi pinateanmo i uno nu Laigan nu belento anu susi'.

²¹Tu'anyo tiba anu daagi olitau sinilakamo daha-dahapa ijalan. Olitau, langkoyang sinilakamo nu bajak. Isinaa belento pinusamo, belento nongkolotmo aha kalana madi'mo nongkalibosi.

²²Belento nolagamo to sampo-sampobali' anu okabuhuk mami da mombau bau-bauon anu monsilakaimo mae kami titikup. Aha nompateimo iwi-iwi' anu kinalesang mami ka' anu okalibosi. Isinaa belento pinusamo madi' kinosamian pe'e na noko ala nopalai.