Read Saluan MOHAANGI 4 Bible Online

MOHAANGI 4 - Saluan bible

MOHAANGI 4

¹Mosoni' anu jongkilaban madi'mo jinongkilaban iwi-iwi na batu i laigan nu Tumpu Allah nodaya-dayamo i jalan.

²Naipuan mae to ana-anak anu tumimpasmo i kota' Sion sumomo ahi' mosoni' anu mahan na olinyo, panyo uuka aiya binaumo susumo gumbang anu ola ahi' tano' na binau.

³Sadangkan tinanyo nu serigala momposusumo anaknyo, panyo mianku anu palesayamo talalo hondo buhingison susumo tomonsi' unta i padang.

⁴To bunga-bunga mea' madi'mo daagi' pinosusu, sahingga sinilakamo nu megot. To ana-anak momoita mongkaan, panyo madi' ko anu mombee'i.

⁵Aha anu saja' mongoa'i mongkaan anu to tami-tami', ka' tumuu' i uno nu kalambakan uuka aiya dinumadangkangmo molio kaanon i tambulan nu duhehe, ka' sinilakamo nu ohop tutuus jalan.

⁶ Mianku anu palesayamo i hukumo lebe maboat molingkudui aha mian anu jojoong i Sodom anu ola tolo kulap, i hansunmo na pinombau nu lima nu Tumpu Allah misa kalana pakalaja'an nu manusia.

⁷Naipuan mae to pola-polaya' mami madi' ko anu opisala'i susumo kapas anu pute' hondo. Aha betek ka' mahoson, bikas ka' madi' ko panyakit.

⁸Panyo uuka aiya ohup nu aha lebe mo'itom de opokakanakon tiba sulou nu sulu' nososalonganmo i sinin na jalan ka' mule' madi'mo ko anu nonsumbu' aha. Kilit nu aha kinumampitmo i buku nimbalu-balu'mo kau' anu nanggasmo hondo.

⁹Aha sinansala'mo ka' sinilaka kinomayu-mayu'annyoje kalana madi' hondo-hondo ko anu okaan; anu sinilaka i pahampatean, lebe ko untungnyo tiba anu sinilaka nu ohop.

¹⁰ Talalo hondo okabuhuk na balaa' aijo' anu nontuda'i mo mianku anu palesayamo sahingga to tina-tina anu ma'ima' na kinyonyoanyo nongunjangmo posi anaknyo da bau pongisi kompong.

¹¹Tumpu nompopiamo kapusan-Nyo ka' nompapuimo kota' Sion sampe i lata tiba tano'.

¹²Hi aha to tomu-tomundo ka' mian da'isan i dunia aiya madi' ko samian pe'e na anu palesaya na to saba-sabatan daka' nu kota' Yerusalem nupoko ala ahi' nu pinsoopi nu sampobali'.

¹³Panyo han aijo' jinadimo, kalana dosa' nu to ima-imam ka' to nabi-nabi. Aha nombubusakonmo baso', nu mian anu madi' ko sala'nyo.

¹⁴Mimbalu-balu' mian mapisok memo mahalajangan i sinin na jalan sumo aijo'mo na to pola-polaya' i kota' Yerusalem. Baso' nu aha nohumimi'imo baju' nu aha sahingga madi'mo ko anu mongka'oho' montiik aha.

¹⁵Mian notatae, “Lako'mo lengkat i aiya! Belemiu aiya nahumimi'mo, boli mae montiik kami!” Sahingga nambamo na aha ka' naha lajanganmo lengkat i bansa sa'angu' mokiijo' i bansa sangga'at, panyo maumo pa' ihe madi' mompobee' jojoong tataap.

¹⁶Tumpu madi'mo daagi' mompalahatikan mian-Nyo anu palesayamo; posi ia mo na nongga'a-ga'atakon aha ka' nombau to ima-imam madi'mo daagi' o'angga'i; to pola-polaya' madi'mo ko anu mongkalibosi.

¹⁷Mata mami nontoamo, montanda'imo bantuan anu madi' ko katokaannyo. Kami montaha'imanimo pontulungi mae nu sa'angu' na bansa, anu sabenannyo madi' moko ala mombee'i apa-apaa.

¹⁸Kami madi' moko posabat mokiijo' i jalan, kalana saja' nupalahatikan nu sampobali'. Kahimpusan nu kantumuu'an mami ohanimo, kalana sina nu kantumuu'an mami ginanapmo.

¹⁹Anu mololoi' kami talalo hondo malia' majo'on na pompala'inyo na ko lia'nyo nu bonyia'. Aha mololoi' kami i bungkutnyo ka' nontumbuhimo kami i padang anu mateges.

²⁰Aha nohakopmo tomundo anu pinile'anmo nu Tumpu, mian anu obuulakon mami salaku anu mombee'i kantumuu'an, ka' monjagai de ko sampobali'.

²¹Komiu bansa Edom ka' Us, kojoomo mae, lame'mo mae, salama daagi' moko ala! Balaa' tokaje mae suele hi belemiu ka' kalana malangu butong nu beleyum oposi langgo'imo.

²²Sion nonta'upmo hukumannyo kalana iwi-iwi na dosa' anu binaumo nu aha; uuka aiya kami madi' ola nupojohok nu Tumpu ka' madi'mo daagi' oboa mamba i tampat pompojoongan. Panyo beleyum, o Edom, nuhukumje nu Tumpu. Iwi-iwi' na dosa' nu beleyum oponyata'mo.