Read Saluan MOHAANGI 5 Bible Online

MOHAANGI 5 - Saluan bible

MOHAANGI 5

¹Inau' pe'e mae, o Tumpu, apaa na anu jinadimo aiya hi kami. Toa mae na kami, ka' tonto'i mae na kahina'an mami.

²Halata' pe'e nu mompolee' mami tinoonganmo nu mian sangga'at, to lai-laigan mami jinojoonganmo nu mian anu isalipu'an.

³Tuuma mami pinateanmo nu sampobali'; uuka aiya tina mami binalumo, ka' kami ingunonmo.

⁴Uee anu o'inum ka' kau' anu oposun tionyo ahi' o'oli mami.

⁵Susumo binatang, kami opakisa na mokalaja anu maboat, kami nalawemo, panyo madi' opobee' na milawe.

⁶Kami mamba lewa' momoita kiijo' i Mesir, kami momoita anu okaan kiijo' i Asyur.

⁷Mompolee' mami binaladosa'mo, uuka aiya aha madi'mo daagi'; panyo kami tionyo ahi', mongoa'imo kasansala'an kalana dosa' nu aha iwi-iwi'.

⁸Kami pinalentahmo nu to mia-mian anu sumo-sumomo ahi' posaihon; madi' ko anu balakuasa molapasakon mae kami aijo' hi aha.

⁹I sambiha' nu kota', anu lewa' mompatei memo ahi' saja mololo; butong mami kahanda'mo nupatei nu aha de kami mamba molio mongkaan.

¹⁰Kami sinansalamo nu ohop, sahingga kilit mami nomea'mo susumo pomposulian apu.

¹¹To bou-boune i Sion pinasala'mo nu mian ka' to lalangkoyang ikampung-kampung Yehuda lewa'mo binia-biangakon.

¹²To pola-polaya' mami i hakopmo ka' pinokalayo' to tu'a-tu'anyo mami madi'mo daagi' iholomatan.

¹³To oli-olitau mami pinakisamo na nokalaja i ponggilingan to ana-anak mo'ane ingutunanmo nu kau' anu sinimbu sampe pinoso'.

¹⁴To tu'a-tu'anyo madi'mo sinilimu' i sabatan daka' nu kota', musik madi'mo daagi' ihongo hi aha to oli-olitau ka' to lalangkoyang.

¹⁵Kami madi'mo daagi' nongoa'i kasanangan Kasusa'an nu tomate binaumo pombolosi lewa' mosalele i bau-baun.

¹⁶Katalasanggoan mami madi'mo daagi kami binalaa'mo kalana binaladosa'mo.

¹⁷Bungkutnyo nu sion i liingmo ka' pinala'ianmo; i kiijo' mae dedeng nu alas lewa'mo nololo. Kalana aijo' kinyonyoa mami i na'idekanmo hondo, kami i humangmo sampe pinahaamo na kami montoa.

¹⁹Panyo Belento, o Tumpu, tataap balakuasa Belento mompalentah sampe toka sidu-sidutu'.

²⁰Kadaka' Nu pala'i na kami sumo aijo'mo na kopinnyo? Ugaat beleyum mongkolilimimo mae kami sampe toka sidu-sidutu'?

²¹O Tumpu, boa na kami po'ule' minsusule' hi Belento; kami po'ule'mo minsusule' hi Belento! Po'ule'akonmo mae na ka'ada'an mami susumo naipuan mae.

²²Kabai o madi'mo Nu ala na kami totu-totu'u? Madi'mo ko batasnyo na kapusan nu Belento hi kami?