Read Saluan YEHEZKIEL 13 Bible Online

YEHEZKIEL 13 - Saluan bible

YEHEZKIEL 13

¹Tumpu notataemo mae hi belengku,

²“O, manusia anu madi' tumuu' batu, tambuha'i na to nabi-nabi Israel anu nontaloakonmo posi kila-kila'annyo. Pokau na aha da mompotombihing mae potataeng-Ku.”

³Tumpu Anu Matangkas na Kuasanyo notataemo, “Silakamo na to nabi-nabi anu singkap ponga' haha aijo'! Pikilannyo ihumpaknyo anu ola pinosi tutugannyo ka' anu tinoanyo madi' ahi' totu'u.

⁴O, Israel, nabi nu belemiu haha atina' madi' kogunanyo, pokakanamo susumo serigala-serigala anu tumuu' itotonga' nu kota' anu ihansunmo.

⁵Aha madi' monjagai tampat-tampat anu nohobo'mo na pagan mesen ka' mule' madi' mompokopiani pagan mesen haha aijo'. Jadi, Israel madi'mo daagi' moko ala totahan de tokamo na pahampatean isinaa nu Aku, Tumpu tokamo mae mohukum.

⁶Iwi-iwi' na anu tinoamo nu aha madi' totu'u ka' mule' anu sola' nu kila-kila nu aha leko' ahi' samata-mata. Aha nongakuimo nomboamo potuunon lengkat mae hi belengku padahan Aku madi' toho' nonsai aha. Mosia na aha montaha'imani kila-kila' nu aha bisa jadi?

⁷Aku, Tumpu Anu Matangkas na Kuasanyo motatae hi aha, ‘Iwi-iwi' na anu Tinoamo nu belemiu aijo' madi' totu'u ka' mule' kila-kila'an nu belemiu atina' ola ahi' leko' samata-mata. Belemiu nompoto'imo, koonyo nu belemiu aijo' potuunon-Ku, padahan Aku madi' toho' notatae hi belemiu! Kalana aijo' Aku timbalimo sampobali' nu belemiu.

⁹Aku mohukumo belemiu, o, to nabi-nabi anu nontaloakonmo kila-kila'an anu leko' samata-mata ka' sola' mompotutugakon iwi-iwi na anu tinoa! Belemiu madi'mo timbali mombee'i kaputusan i uno nu rapat-rapat nu aha mian anu palesayamo hi beleng-Ku. Sanggo nu belemiu ogarismo i uno nu daftar nu aha mian Israel ka' mule' belemiu madi'mo daagi' minsusule' itano' kinahampean nu belemiu. Sahingga nu sumbu'je nu belemiu taalu' Akumo ahi' na Tumpu Anu Matangkas na Kuasanyo.

¹⁰ O, to nabi-nabi anu madi' totu'u! Belemiu nomposala'mo jalan nu mian anu palesayamo hi beleng-Ku kalana nontaloakonmo koonyo nu belemiu iwi-iwi' madi'mo momosia ka' na'ima'mo. Padahan imadi' ahi! Mian anu palesayamo hi beleng-Ku nombaumo pagan mesen madi' nahoson na nompokona batu, lapas aijo' belemiu tinokamo nonset nu tiilon.

¹¹O, to nabi-nabi anu madi' totu'u, pagan mesen nu belemiu ola mohobo'. Ku tudunakonje mae na ujan anu daka' hondo. Pagan mesen haha aijo' nu tuda'je mae nu baleba' anu makansang hondo ka' tokaje mule' mae na ujan eis,

¹²sahingga mohobo'mo, ka' toto samian mompokilawamo apaa na gunanyo pagan mesen haha aijo' sinetmo nu tiilon.’ ”

¹³Tumpu Anu Matangkas na Kuasanyo notatae, “De Aku motambuha'mo, Ku potokamo mae na baleba' anu makansang hondo, ujan anu daka' hondo ka' mule' ujan eis da mohansunimo pagan mesen haha aijo'.

¹⁴Aku ko niatmo mohobo'akon pagan mesen anu sinetmo nu belemiu nu tiilon, momposungkehetmo sahingga memo ahi' pundasinyo na anu daagi' tontuha'. Pagan mesen haha aijo' montuda'mo belemiu ka' mule' mompateimo belemiu iwi-iwi'. Sahingga nu sumbu'je nu belemiu taalu' Akumo ahi' na Tumpu.

¹⁵Pagan mesen haha aijo' tiba belemiu anu nonsetmo nu tiilon mongoa'ije tambuha'-Ku anu taha-tahahumo. Lapas aijo' ku poto'ije hi belemiu taalu' pagan mesen haha aijo' imadi'anmo pokakanamo susumo belemiu anu nonsetmo nu tiilon,

¹⁶o, to nabi-nabi anu madi' totu'u! Belemiu nongkila-kilamo saba' Yerusalem madi'mo momosia ka' na'ima'mo, padahan imadi' ahi'!” Sumo aijo' na koonyo nu Tumpu Anu Matangkas na Kuasanyo.

¹⁷Tumpu notatae, “Uuka aiya o, manusia anu madi' tumuu' batu, palahatikan na to bou-boune anu montiho-tihomo nabi boune atina' hi bansang nu belemiu. Tambuha'i na aha,

¹⁸ka' poto'i apaa na anu pinoto'ing-Kumo hi aha, Aku Tumpu Anu Matangkas na Kuasanyo notataemo: ‘Silakamo na belemiu! Belemiu nombaumo galang-galang ajimat, da iwi-iwi' na mian mompake ka' kokudung anu ko rohnyo ma'idek, da mian anu mompake timbali mongkuasai kantumuu'an nu mian sangga'at. Belemiu kahanda' mongkuasai kantumuu'an tiba kapatean nu mian anu palesayamo hi beleng-Ku ka' kakuasa'an aijo' opake nu belemiu da bau posi ka untungan nu belemiu.

¹⁹Belemiu nompopo ambangmo mae Aku ola kalana da mohumpak to pia-piangkakup na jelai tiba to pia-piangkolong na roti. To mia-mian anu madi' ko kasala'an opatei nu belemiu padahan anu aha to mia-mian anu pantasmo mate na ola ahi' opojohok nu belemiu tumuu'. Lantas mian anu palesayamo hi beleng-Ku obaleko'i nu belemiu sahingga aha palesayamo hi belemiu.’ ”

²⁰Tumpu Anu Matangkas na Kuasanyo nompoto'imo hi boune haha aijo' anu montiho-tiho nabi boune, “Ku ka'ideki na montoa galang-galang ajimat haha aijo' anu opake nu belemiu da bau pongkuasai kantumuu'an tiba kapatean nu mian anu palesayamo hi beleng-Ku. Galang haha aijo' Ku hahumbitakonmo hi anu pinompopakean galang nu belemiu ka' to mia-mian anu kinuasanmo nu belemiu Ku pobebasmo.

²¹Kokudung kokudung nu belemiu anu ko rohnyo ma'idek Ku bea-beakmo ka' mule' mian anu palesayamo hi beleng-Ku Ku patikojo'onakonmo da madi' nu kona nu kakuasa'an anu ma'idek anu atina' hi belemiu sampe toka sidu-sidutu'. Sahingga nu sumbu'je nu belemiu taalu' Akumo ahi' na Tumpu.

²²To mia-mian anu manonong na kinyonyoanyo anu madi' Ku poposia jinadimo na ambang na aha kalana kabaleko'an nu belemiu. To mia-mian anu ma'idek na kinyonyoa nu aha jinadimo tataap baladosa' ka' madi'mo oposalamat.

²³Uuka aiya madi'mo daagi' ko anu sola' otoa madi-madi' totu'u aijo' ka' mule' anu saja' okila-kila nu belemiu bale-baleko' atina'. Ku posalamatmo na mian anu palesayamo hi beleng-Ku da madi'mo nu kuasai nu kuasa anu ma'idek anu atina' hi belemiu. Sahingga nu sumbu'je nu belemiu taalu' Akumo ahi' na Tumpu.”