Read Saluan YEHEZKIEL 16 Bible Online

YEHEZKIEL 16 - Saluan bible

YEHEZKIEL 16

¹Tumpu po ule 'mule' notatae mae hi belengku,

²“O, manusia anu madi' tumuu' batu, soba poto'i hi aha na palabuatan-palabuatan nu Yerusalem anu toto mahu-mahumimi' bibinaunyomo.”

³Tumpu Anu Matangkas na Kuasanyo nonsaimo mae aku da mompotokakon potuunon aiya hi aha Yerusalem, “O, Yerusalem, beleyum i hampe i tano' Kana'an. Tuuma nu beleyum mian nu Amori ka' tina nu beleyum mian nu Het.

⁴Tempo'nyo beleyum i hampe madi' ko anu nompusoi beleyum, kabai nompindi' beleyum kabai nonsauti beleyum nu timuson, kabai nonsabuti nu hude beleyum.

⁵Madi' ko samian pe'e na nolibos hi beleyum sahingga timbali nombau hahan aijo' hi beleyum. Tempo'nyo beleyum i hampe madi' ko anu nongkanonongi beleyum ola mule' ahi' beleyum mamba ingalin i ale'.

⁶Lapas aijo' Aku notulumo ka' nontoamo beleyum sola' mongkohenggo kahomo baso' na butong nu beleyum, panyo madi' ahi' Aku nompojohok beleyum da silakamo.

⁷Ingalang-Ku na uee ka' binaso'an-Ku na baso' anu atina hi butong nu beleyum. Sinautan-Ku nu lanya' nu zaitun na kilit nu beleyum. Pinodaka'-Kumo na beleyum susumo sosu'anon anu molumba'. Malia' hondo na beleyum nodensu' ka' mule' mahoson ka' dinaka'mo, ka' ilumangkoyangmo. Susu nu beleyum montampu'unimo nodensu' ka' mule' ubak nu beleyum nantanmo, panyo beleyum langgo-langgo'. Tempo'nyo Aku po ule' notulu tinoang-Ku na beleyum tempo'nyomo na bakusinta. Pinosabut-Kumo na juba'-Ku hi butong nu beleyum anu langgo-langgo' atina' ka' Aku nojanji'mo Ku sintamo na beleyum. Ka' mule' jinanji'-Kumo da monika'imo beleyum, ka' beleyum Akumo na tumpunyo. Aku, Tumpu Anu Matangkas na Kuasanyo notataemo.

⁸

⁹

¹⁰Lapas aijo' pinopusok-Kumo na baju' anu kosujinyo hi beleyum ka' mule' sapatu to kilit anu ma'ima' hondo na binau, ka' mule sigut te hude lenan na binau ka' mule' juba' te sutala' na binau.

¹¹Pinakean-Kumo na beleyum nu mainan, ka' mule' lante' tiba galang.

¹²Binee'an-Kumo na beleyum sinsing anu opokona isung, ka' mule' nganting-nganting ka' mahkota'anu ma'ima' hondo.

¹³Sumo aijo' na beleyum pinakeanmo nu mosoni' tiba salaka; baju' nu beleyum te hude lenan na binau tiba sutala anu ko sujinyo. Beleyum timbali mokaan roti anu labu ma'ima' hondo na binau tiba juu' nu uani' anu ma'ima' hondo ka' mule' lanya' nu zaitun. Beleyum talalo ahi' handa ka' mule' beleyum timbalimo tomundo' boune.

¹⁴Iwi-iwi na bansa mompuji' beleyum kalana talalo handa hondo, ka' Akumo na nompojadi beleyum sahingga ihanda. Aku Tumpu Anu Matangkas na Kuasanyo notataemo.

¹⁵Panyo sinala'mo na beleyum nonggunakon butong nu beleyum anu sumo atina' na kohandanyo ka' mule' sanggo nu beleyum titinalasanggomo atina'. Yayamo na mo'ane anu motulu beleyum moduhusmo tiba ia.

¹⁶Sambagian na pakean nu beleyum ginunakonmo nu beleyum bau pombunga-bungai tampat ponsomban pilogot nu beleyum. Beleyum tinimbalimo mian anu saja' masala' ka' nombee'mo butong nu beleyum hi to momo'ane.

¹⁷Te pakean mosoni' tiba salaka anu binee'-Kumo hi beleyum, binaumo nu beleyum patong to momo'ane lantas nu pasala'imo na patong haha aijo'.

¹⁸Nu popusokimo nu beleyum baju' anu ko sujinyo anu binee'-Kumo hi beleyum. Nu sombahkonmo nu beleyum hi aha na lanya' nu zaitun tiba kamangian anu ihumpak nu beleyum hi beleng-Ku.

¹⁹Binee'an-Kumo anu okaan na beleyum labu anu ma'ima' hondo, juu' nu uani' tiba lanya' nu zaitun anu ma'ima' hondo madi' ko galo'nyo. Panyo iwi-iwi' aijo' sinombahkonmo nu beleyum hi pilogot haha aijo' da bau pomposanang kinyonyoa nu aha. Aku, Tumpu Anu Matangkas na Kuasanyo notataemo.

²⁰Lapas aijo' sinombahkonmo nu beleyum na to ana-anakto, to momo'ane tiba to bou-boune da bau koloban hi pilogot. Te ma'isa sukup na beleyum madi'mo tinulu-tulutan hi beleng-Ku?

²¹Sahingga nompaka ala mule' to ana-anak-Ku ka' nongkolobanakonmo aha hi pilogot haha aijo?

²²I uno nu kantumuu'an nu beleyum anu okahegatimo salaku mian anu saja'masala' susumo aijo', mau sangkiding pe'e madi' tonginau hi beleyum na beleyum daagi' ise' naipuan mae anu ihikuhakonmo, tempo'nyo beleyum langgo-langgo ka' lewa' mongkohenggo ka' kahomo baso' na butong nu beleyum.”

²³Tumpu Anu Matangkas na Kuasanyo notatae, “Silakamo na beleyum! Memang silakamo! Beleyum nombaumo iwi-iwi' na palabuatan anu ma'idek haha aijo'.

²⁴Ka' mule' itampat-tampat anu loas na tano'nyo uno nu kota' ka' i sohipi nu jalan beleyum nombaumo ponsomban pilogot ka' sola' masala' itampat aijo'.

²⁵Beleyum mohumimi'imo butong nu beleyum anu handa sumo atina'. Butong nu beleyum nu bee'mo hi to momo'ane anu motulu, ka' madi' kokabelentiannyo na beleyum masala'.

²⁶Mesir anu mompaha ohani beleyum talalo hondo masawala' hi to bou-boune sinampoduhusmo nu beleyum. Tinotonggolakonmo nu beleyum na masala' da Aku motambuha'.

²⁷Uuka aiya Aku bagalagimo mohukum beleyum ka' po ule'mo Ku ala na balakat anu binee'-Kumo hi beleyum. Ku bee'mo na beleyum hi aha mian nu Filistin anu mongkaddeki beleyum ka' anu bubunmo na montoa palabuatan nu belemiu mahu-mahumimi' atina'.

²⁸Panyo beleyum ma'isa ahi' ma'osa; mokonyo aijo' sola'mo nu loloi' na aha mian nu Asyur. Beleyum tinimbalimo mian anu saja' masala' tiba aha, panyo madi' ahi' nu osai mae nu aha.

²⁹Lantas beleyum tinimbalimo mian anu saja' masala' tiba aha mian nu Babel, bansa anu saja' badagang haha aijo'. Panyo aha suele madi' ahi' moko ala mompopa'osa beleyum.”

³⁰Tumpu Anu Matangkas na Kuasanyo notatae, “Iwi-iwi' aijo' binaumo nu beleyum susumo mian anu saja' masala' mai-madi'mo monsumbu' ambang.

³¹I tampat-tampat anu loas na tano'nyo i uno nu kota' ka' isohipi' nu jalan beleyum nombaumo ponsomban pilogot ka' sola' masala' itampat aijo'. Panyo beleyum misa' sumo mian sangga'at lelewa' masala' anu mompalaui doi.

³²Beleyum sumo bengkele' nu mian anu madi'mo nongadati langkai'nyo ka' nombaumo anu ma'idek tiba mo'ane sangga'at.

³³Samian na boune anu saja' masala' na mohumpak ahi' bau pombayali ia, panyo hi beleyum na madi' ahi' sumo aijo', beleyum mule' ahi' na mombee'i palasen hi to miamian anu monsinta beleyum, pakalaus mule' pagala nu sale'i nu beleyum na aha da obee'ije doi da toka lengkat mae iyaya na tampat ka' moduhusmo tiba beleyum.

³⁴Beleyum mian anu saja' masala' panyo madi' ahi' hondo-hondo pokakana tiba sangga'at. Madi' ko anu mompakisa beleyum da timbali mian anu saja' masala'. Beleyum madi' obayan, panyo beleyum mule' ahi' na mombayali. Memang beleyum madi' ahi' hondo-hondo pokakana tiba sangga'at.”

³⁵O, Yerusalem, anu saja' masala', potombihing mae apaa na anu tinaloakonmo nu Tumpu Anu Matangkas na Kuasanyo, “Beleyum nongukatmo baju' nu beleyum, ka' salaku mian anu saja' masala' binee'mo nu beleyum na butong nu beleyum hi to sinta-sinta nu beleyum tiba hi to pilo-pilogot nu beleyum anu okahegati aijo'. To ana-anak nu beleyum pinateanmo nu beleyum ka' kinolobanakonmo nu beleyum hi pilogot haha aijo'.

³⁶

³⁷Kalana aijo' anu toho'mo nonsinta beleyum, iwi-iwi' Ku posihukmo, mau anu nu ka'ima'i nu beleyum mau anu nu ka'ideki nu beleyum. Aha tuminjoje saidi' mae montikubi beleyum ka' mongukatakonmo iwi-iwi' baju' nu beleyum sahingga timbalimo nu toa nu aha songko-songko na butong nu beleyum anu ilanggo'mo atina.

³⁸Beleyum Ku hukumo kalana saja'mo nasala' ka' saja'mo nompatei bibinaumo nu beleyum. Kalana pusang-Ku ka' mule' tambuha'-Ku beleyum Ku hukumo mate.

³⁹Beleyum Ku bee'mo hi sinta nu beleyum haha atina' ka' nu hobo'akonmo nu aha na tampat-tampat anu sola' pinasala'an nu beleyum ka' nonsombah pilogot. Iwi-iwi' na baju ka' pakean mosoni' tiba salaka anu puso-pusok hi beleyum nu agoimo nu aha sahingga beleyum langgo'mo.

⁴⁰Nu pokaumo nu aha na mian da'isan da mompahambunu'akonmo beleyum nu batu ka'mule' mompahantotokakonmo butong nu beleyum nu bajak.

⁴¹Nu papuimo nu aha na laigan nu belemiu iwi-iwi' ka' mompokaumo to bou-boune monsakisi hukuman anu opokonamo hi belemiu. Sumo aijo' na Aku mompobelenti palabuatan nu belemiu sasaja' masala'. Beleyum madi'mo daagi' sola' mombagi-bagiakon palasen hi to sinta-sinta nu beleyum.

⁴²Atina'je ka' Aku madi'mo motambuha' ka' tendamo na kinyonyoang-Ku, Aku madi'mo sola' motambuha' kabai sola' mombata-batai.

⁴³Aku mohukumo beleyum kalana beleyum madi'mo daagi' nonginau'mae mosia na Aku nompalakaimo beleyum tempo'nyo nai puan mae daagi' ise'. Palabuatan nu beleyum ma'i-ma'idek atina' na nonsabapi Aku nontambuha'i beleyum. Kadaka' palabuatan nu beleyum anu oka-okahegati atina' iwi-iwi' daagi' mule' nu paka tuangi nu palabuatan masala'? Aku Tumpu Anu Matangkas na Kuasanyo notataemo.”

⁴⁴Tumpu notatae, “O, Yerusalem, to mia-mian montaeakonmo potatae aiya hi beleyum, ‘Susumo tinanyo, sumo aijo'mo na anaknyo boune.’

⁴⁵Memang beleyum anak boune nu tina nu beleyum. Ia nongka'idekimo langkai'nyo ka' suele to ana-anaknyo. Beleyum suele montiho to utu-utus nu beleyum anu toto bou-boune anu suele mongka'ideki langkai'nyo tiba to ana-anaknyo. Beleyum tiba to utu-utus nu beleyum aijo'mo kota-kota' anu ohani hi beleyum ko tinanyo aha mian nu Het ka' mule' tuumanyo aha mian nu Amori.

⁴⁶Utus tu'a nu beleyum atina'mo Samaria isasu utara tibamo kampungnyo anu toto ise-ise'. Ka' utus ise nu beleyum atina'mo Sodom isasu salatan tibamo kampungnyo anu toto ise-ise'.

⁴⁷Pa' na'osamo na beleyum nombatuki kalakuan nu aha ka' nontiho palabuatan nu aha anu okahegati aijo'? Ma'isa! Madi'mo daagi' pin beleyumo ahi' na anu tala-talalo palaganta nu lingkuduimo nu beleyum na aha.

⁴⁸Atas sanggong-Ku, Tumpu anu tumuu' na koonyo nu Tumpu Anu Matangkas na Kuasanyo, to utu-utus nu beleyum Sodom tibamo kampungnyo anu toto ise-ise' ma'isa toho' palabuatan nu aha naidek susumo ko ideknyo nu palabuatan nu beleyum tibamo kampung nu beleyum anu toto ise-ise'.

⁴⁹Sodom tibamo kampungnyo anu toto ise-ise' buulon kalana palasadia'an anu okaan nanjoo'mo ka' mule' sinanangmo na kantumuu'an nu aha. Panyo aha madi' mongkalinga mian anu tumuu' kasiasi tiba mian anu susa'.

⁵⁰Aha buulon tiba mule' panggaga, ka' mule' nombaumo hahan anu Ku ka'ideki. Kalana aijo' aha ihansunan-Kumo susumo anu tinoamo nu beleyum.

⁵¹Memang Samaria ma'idek na palabuatannyo, panyo dosa'nyo madi' mompomintonga' i dosa-dosa' nu beleyum. Kalakuan nu beleyum na molingkudui lebe ma'idek mule'. To utu-utus nu beleyum anu toto bou-boune de obandingkan tiba beleyum na ugaat ahi' timbali o'anggap madi' kokasala'annyo. Beleyum tionyo ahi' mongoa'i ma'ambang ka' mongakui na idekmo na palabuatan!”

⁵²

⁵³Tumpu notataemo hi Yerusalem, “Sodom tiba Samaria ka' mule' kampung nu aha anu toto ise-ise' po ule'mo Ku pojadi sanang na kantumuu'an nu aha. Lapas aijo' atina'je ka' beleyum suele Ku pojadi sanang na kantumuu'an.

⁵⁴Tiba jalan anu sumo aijo' atina'je ka' nu ka'ambangi na posi butong nu beleyum, ka' kasusa'an nu beleyum atina' momponyata' hi to utu-utus nu beleyum taalu' na' ima'mo ahi' hondo na kantumuu'an nu aha.

⁵⁵Aha tiba kampung toto ise-ise' nu aha saidi' mae po ule'mo sanang na kantumuu'an nu aha, ka' suele beleyum tiba kampung toto ise-ise' nu beleyum.

⁵⁶Temisa' beleyum toho'mo ahi' nongkokojoi Sodom tempo'nyo beleyum daagi' kinobubuun.

⁵⁷Ka' palabuatan ma'idek anu binaumo nu beleyum ma'isa sinumbu'? Uuka aiya beleyum pinokakanamo ahi' tiba ia; beleyum tinimbalimo sisik anu sola' okokojoi nu mian Edom, nu mian Filistin, tiba anu mompaha ohani beleyum sangga'at mongkaddeki beleyum.

⁵⁸Beleyum tionyo ahi' molasai kasansala'an salaku hukuman nu palabuatan nu beleyum mahu-mahumimi' ka' anu okahegati atina'. Aku, Tumpu notataemo.”

⁵⁹Tumpu Anu Matangkas na Kuasanyo notatae, “Beleyum Ku hukumo sitimbang tiba palabuatan nu beleyum, kalana beleyum madi'mo nontuluti anu sinumpa'akonmo nu beleka' mule' nolanggaimo palajanjian-Ku anu binaumo tiba beleyum.

⁶⁰Panyo Aku na monginau' ahi' palajanjian anu binaung-Kumo tiba beleyum daagi' pe'e beleyum langkoyang ka' nombaumo palajajian tiba beleyum anu opake sampe toka sidu-sidutu'.

⁶¹Beleyum saidi' mae tonginau'mo i palabuatan-palabuatan nu beleyum ka' ma ambangmo de to utu-utus nu beleyum Ku sule'akonmo mae hi beleyum. Aha saidi' mae' Ku pojadimo susumo to ana-anak nu beleyum, maumo ahi' han aijo' madi' ninsoop i uno nu palajanjian-Ku tiba beleyum.

⁶²Aku mombaumo palajanjian anu salaje' obau tiba beleyum. Sahingga nu sumbu'je nu beleyum taalu' Akumo ahi' na Tumpu.

⁶³Ku ampunimo na kasala'an nu beleyum iwi-iwi', panyo beleyum na madi' ahi' mongkolilimi ka' beleyum ma ambangmo na montaloakon maumo pa' apaa. Aku, Tumpu Anu Matangkas na Kuasanyo notataemo.”