Read Saluan YEHEZKIEL 17 Bible Online

YEHEZKIEL 17 - Saluan bible

YEHEZKIEL 17

¹Tumpu notataemo mae hi belengku,

²“O, manusia anu madi' tumuu' batu, sisikakon hi to mia-mian Israel na kantuangan aiya,

³anu Aku, Tumpu Anu Matangkas na Kuasanyo mompoto'imo hi aha: Daagi' ko sa'angu' na bonyia' anu daka' hondo bulunyo ma'ima' hondo ka' polipiknyo bola ka' mule' mahoson. Ia ilumahapmo nokiita' i bungkutnyo nu Libanon, nompato' londik nu sangkau na kau' lontio',

⁴lantas binoanyomo ka' pinotimpasnyomo ikota' dagang anu lame' hondo.

⁵Lapas aijo' ingalanyomo na sangkau na kau' anu daagi' ise' lengkat mae i tano' nu Israel, ka' sinu'annyomo i ale' anu ma'omuk anu madi' toho' kasusa'an i uee.

⁶Kau aijo' tinimbalimo kau' anggur ka' tumuu'nyo hede' ka' dinumandangmo manta-mantan. Panga'nyo haha aijo' mompanjolongi bonyia' ai-aijo' ka' bakatnyo nanimpasokmo hoso-hoson i tano'. Kau' anggur aijo' tambok hondo na honnyo.

⁷Tempo'nyo aijo' daagi' mule' ahi' ko sa'angu' na bonyia' sangga'at anu suele daka' hondo; polipiknyo bola ka' bulunyo tambok hondo. Lantas kau' anggur ai-aijo', iwi-iwi' na bakatnyo tinumuu'mo no kiijo' ka' mule' panga'nyo iwi-iwi' tinumuu'mo nokiijo' i bonyia' anu sangga'at aijo' da tantu tomonsi' aijo' lebe mule' mombee'i uee manjoo' apaa na anu daagi'mo i ale' aijo'.

⁸Padahan kau' anggur aijo' tinumuu'mo i tano' anu ma'omuk ka' mule' ueenyo manjoo' hondo sahingga tambok na honnyo, mahampe na bua'nyo, ka' tinimbalimo kau' anggur anu ma'-ima'.

⁹Sahingga, Aku, Tumpu Anu Matangkas na Kuasanyo nompokilawamo: Pa' timbali ahi' na kau' anggur aijo' tumuu' ka' mompaka podensu'? Pa' bonyia' anu momona aijo' madi' ahi' monggautakon ia tibamo iwi-iwi' na bakatnyo ka' mohontang bua'nyo iwi-iwi', ka' mompato'i panga'nyo iwi-iwi' ka' mompojohokmo da ia mangkaluale? Madi' palalu mian kabai bansa anu toto hoso-hoson na monggautakon kau'a ijo' sampe toka-toka i bakatnyo.

¹⁰Memang ia nahosonmo na tinumuu', panyo pa' moko ala ahi' na ia satu tumu'nyomo ka mompaka podensu'? Pa' madi' ahi' ia mangkaluale de nu puhimo mae nu mombun anu lengkat mae i sasu Kabete'an? Pa' madi' ahi' i manggas i tampat kinatumuu'annyo?”

¹¹Tumpu notataemo mae hi belengku,

¹² “Pokilawa hi aha to mia-miana nu saja' motomuhuk haha aijo' pa' nu sumbu' ahi' nu aha na alati'nyo nu kahantuangan ai-aijo. Poto'i hi aha saba' tomundo' nu aha Babel tinokamo mae i Yerusalem ka' nomboamo tomundo' nu aha Yehuda tiba aha to mia-mian anu toto tangaka-tangkas na pangkatnyo i kota' aijo' ka' binoamo i Babel.

¹³Lantas ia nompile'imo sala'samian na poto utusan mae nu tomundo' Yehuda ai-aijo', ka' nombaumo palajanjian tiba ia, ka' nompokaumo ia binasumpa' da montulutimo ia. Tomundo' nu aha Babel aijo' nontahanmo mian anu toto penti-penting haha aijo',

¹⁴da kalaja'an Yehuda bolimo daagi' poule' totinjo ka' mule' salaku usaha da palajanjian aijo' totu-totu'u ahi' opojalan.

¹⁵Panyo i tomundo' Yehuda notomuhukmo ka' nonsaimo mian namba i Mesir da mohumpak ajahan tiba mule' suludadu manjoo'. Pa' usaha aijo' nu humpak ahi'? Pa' ia opojohokmo ahi' da mopalai? Madi' bisa na ia molanggai palajanjian ka' madi' mohumpak hukuman!

¹⁶Atas sanggong-Ku, Tumpu anu tumuu', Tumpu Anu Matangkas na Kuasanyo, i tomundo' Yehuda silakamo kiijo' mae i Babel, kalana ia nolanggaimo sumpa'nyo ka' nolanggaimo mule' palajanjiannyo hi tomundo' Babel anu nombee'imo kapalentahan hi ia.

¹⁷Pakalaus aha suludadu nu Mesir anu toto babaani aijo' madi' ahi' moko ala montulungi ia da timbali mongewa mian nu Babel anu sola'mo nontambun tano' ka' sola'mo nongkeke got bau pompateian mian njojoo'.

¹⁸Kalana ia nolanggaimo sumpa' tiba palajanjiannyo, ia madi'mo daagi' moko ala mopalai.

¹⁹Atas sanggong-Ku, Tumpu anu tumuu', Tumpu Anu Matangkas na Kuasanyo, tomundo' nu aha Yehuda Ku hukumo kalana nolanggaimo palajanjiannyo hi tomundo' Babel padahan ia binasumpa'mo hi sanggong-Ku da palajanjian aijo' totu-totu'u ahi' opojalan.

²⁰Ku sambuangakonmo na buani bau pohakop ia. Ia Ku boamo i Babel ka' Ku hukumo kiijo' mae kalana ia madi' tulu-tulutan hi beleng-Ku.

²¹Suludadunyo anu toto hoso-hoson silakamo i uno nu pahampatean ka' anu moko ala mopalai mosungke-sungkehetmo pa' moya. Sahingga nu sumbu'je nu mian anu palesayamo hi beleng-Ku taalu' Akumo ahi' na Tumpu anu notataemo.”

²²Sumo uuka na anu pinoto'imo nu Tumpu Anu Matangkas na Kuasanyo “I kau' lontio' tangka-tangkas aijo' Ku pato'mo na londiknyo lantas Ku pato'akonmo na sampanga' anu ma'isa motu'a; Panga'nyo Ku su'anmo i bungkutnyo anu matunjo mokiita' i kundom.

²³I bungkutnyo anu matangkas hondo i Israel ia Ku posusukmo. Ikiijo' mae ia minsumpemo ka' mimbua'mo, lantas timbalimo kau' lontio' anu ma'ima' ka' daka' hondo. Mongangahan na tomonsi' mimpeta aijo' ipanga'nyo, ka' mingkong akaong i patuunyo.

²⁴Iwi-iwi' na kau' anu daagi' ilipu' nu mian saidi' mae mangalati'je taalu' Akumo ahi' na Tumpu. Kau' anu matangkas Ku taa'mo; kau' anu hede' Ku potumuu'mo da matangkas hondo. Kau' anu tumuu' molunou Ku pomanggasmo hondo-hondo; ka' mule' kau' anu nanggasmo Ku potumuu'imo sumpenyo ka' bunganyo. Aku, Tumpu, notataemo, iwi-iwi' na potataeng-Ku saidi' mae tionyo ahi' jadi.”