Read Saluan YEHEZKIEL 19 Bible Online

YEHEZKIEL 19 - Saluan bible

YEHEZKIEL 19

¹Tumpu nompalentahmo aku da monyayiakon nyanyian aiya bau pohangi anu sinilakamo aijo'mo anak nu tomundo' Israel:

²Tina nu beleyum sumomo ahi' tina nu singa anu opaliasi ka' mule' madi' ko anu mongkakanai. Ia nompidaka'imo to ana-anaknyo, aijo' itotonga' nu to singa-singa anu to babaani.

³Sa'angu' na anaknyo ingajannyomo, ka' pinogulu'nyomo da monsumbu' molio kaanonnyo. Sahingga jinadimo na ia singa anu dinaka'mo, pansa'u hondo ka' pangkaan hondo manusia.

⁴To bansa-bansa anu nohongomo mae lelenyo aijo', sinihukmo mae kahanda' da mohakopmo ia. Ia ihakopmo i uno nu bolo' ka' binoamo, lantas ihela'mo nu kakait namba i Mesir.

⁵Palasuma' na tinanyo lewa' nontanda'i anaknyo; lantas sinumbu'nyoje taalu' madi'mo ko anu nu taha'imani. Sahingga anaknyo sangga'at suele ingajannyomo, da timbali singa anu bahangihi' ka' mule' baani.

⁶Anak nu singa aijo' dinaka'mo, ka lewa'mo nosangalu tiba singa-singa sangga'at. Ia suele sola'mo nolio kaanonnyo, ka' suele pinangkaanmo mian.

⁷Benteng-benteng pinaha hobo'akonnyomo, kota-kota' pinaha hansunannyomo. Songko-songko na lipu' aha miannyo nabuhukmo kalana, nohongomo hu'nyo anu daka' hondo aijo'.

⁸Panyo aha bansa-bansa i daerah anu aitu mae mompaha ohani aha, sinumolinsapmo mae na nontumbuhi. Aha nombokamo buani' nu aha da bau pohakopnyo mae ka' ia suele kinonamo nu pohakop nu aha.

⁹Ia pinosoopmo iganggin nu singa, lantas binoamo ilipu' Babel da opopangadapmo hi tomundo'. Ia jinaganmo hondo-hondo da ia molohu' madi'mo kahongoan, toka-toka aita' mae i iwi-iwi na puge'nyo nu Israel anu toto tangka-tangkas.

¹⁰Tina nu beleyum sumomo ahi' kau' anggur anu ma'ima hondo anu tinumuu' i ale' koko sepa'nyo nu kaunyo. Ia tinambokmo na honnyo ka' nimbua'mo, kalana ueenyo ikiijo' manjoo' hondo.

¹¹Panga'nyo mahoson madi' dengke na mopato', timbali obau tokon nu kalaja'an Tuu'nyo matangkas hondo matunjo mokiita', montoka-tokamo kundom Ia nu kabangangimo nu mian iwi-iwi', kalana ia matangkas tiba honnyo mule' tambok.

¹²Panyo ia ginautmo nu lima nu to mia-mian anu pinusamo, lapas aijo' ilumbu'akonmo i tano'. Mombun anu lengkat mae isasu Kabete'an, nomanggasimo bua'nyo anu ma'ima'. Panga'nyo nopato'mo ka' nanggasmo lantas pinapuanmo.

¹³Tempo uuka aiya sinu'anmo i padang tampat anu kaho bone, i tano anu kinunmo ka' mule' madi' ko ueenyo.

¹⁴Batang nu anggur aijo' kinaanmo nu apu anu nolele, panga'nyo tiba bua'nyo nopapumo ingko-ingkot. Panga'nyo tempo uuka aiya madi'mo nahoson, madi'mo timbali obau tokon nu kalaja'an. Aijo'mo na haang anu saja' opo uli-ulit na onyanyiakon nu aha mian.