Read Saluan YEHEZKIEL 25 Bible Online

YEHEZKIEL 25 - Saluan bible

YEHEZKIEL 25

¹ Tumpu notataemo mae hi belengku,

²“O, manusia anu madi' tumuu' batu, kutukimo na lipu' nu aha Amon.

³Palentah na bansa aijo' da mohongo mae apaa na anu Ku poto'i hi aha,

⁴Aku Tumpu Anu Matangkas na Kuasanyo. ‘Belemiu sanang na montoa Laigan-Ku ohumimi'i ka' mule' tano' nu Israel o, ideimo ka' mule' bansang Yahudi ohakopmo ka' oboamo itampat pompojoongan aha. Mokonyo aijo' belemiu Ku pojohokmo da nu patundu'mo nu tulunan nu bansa haha aijo' anu lengkat mae i tampat anu mateges sasu Kabete'an. Aha mompotinjomo kemah nu aha ilipu' nu belemiu lantas tataapmo ikiijo'. Aha mongkaanmo bua' nu kau' nu belemiu ka' monginumo susu nu potuu'on nu belemiu.

⁵Kota' Raba Ku bali'imo timbalimo tampat polaya'an unta ka' songko-songko na lipu' Amon timbalimo tampat polaya'an domba. Sahingga nu sumbu'je nu belemiu taalu' Akumo ahi' na Tumpu.’ ”

⁶Tumpu Anu Matangkas na Kuasanyo notatae, “Belemiu mohapa'imo lima ka' lame'mo na monsalelei. Belemiu madi'mo mompajuli tano' nu Israel.

⁷Mokonyo aijo' belemiu Ku bee'mo hi to bansa-bansa anu toka mae montololangi ka' mongagoi iwi-iwi' na halata' nu belemiu. Sumo aijo' na Aku monsilakai belemiu, sahingga madi'mo timbali sa'angu' na bansa ka' madi'mo mule' ko posi lipu'. Sahingga nu sumbu'je nu belemiu taalu' Akumo ahi' na Tumpu.”

⁸ Tumpu Anu Matangkas na Kuasanyo notataemo, “Moab nontaloakon koonyo Yehuda aijo' pokakanamo ahi' susumo bansa-bansa sangga'at.

⁹Mokonyo aijo' kota-kota' anu mompo ago potempasan nu lipu' Moab Ku pojohokmo da nu tumbuhimo nu sampobali' tibamo kota-kota' anu toto ima-ima' aijo'mo: Bet-Yesimot, Baal-Meon tiba Kiryataim.

¹⁰Ku pojohokmo na to tulu-tulunan nu bansang anu lengkat mae i tampat anu mateges sasu kabete'an da mompatundu'mo Moab tibamo lipu' Amon, sahingga Moab madi'mo daagi' susumo sa'angu' na bansa.

¹¹Ku hukumo na Moab, sahingga nu sumbu'je nu aha taalu' Akumo ahi' na Tumpu.”

¹² Tumpu Anu Matangkas na Kuasanyo notataemo, “Bansang Edom nombaumo kasala'an daka' hondo kalana nombaumo palabuatan ma'idek anu taha-tahamo hi aha Yehuda salaku palabuatan mombalosakon.

¹³Kalana aijo' Ku bebakonmo taalu' Aku mohukumo Edom ka' mompateimo iwi-iwi na manusia ka' mule' iwi-iwi na binatang anu kiijo' mae. Songko-songko na lipu' aijo' lengkat pe'e mae i kota' Teman toka-toka i kota' Dedan, Kupoliingmo madi'mo ko anu ohongo na potatae, miannyo anu kiijo' singkapmo silaka i uno nu pahampatean.

¹⁴Bansang-Ku aha mian nu Israel Ku pakemo da mombalosakonmo palabuatan nu aha Edom, ka' mule' Edom okabisa'imo susumo ideknyo nu tambuha'-Ku. Nu sumbu'je nu Edom mosia na nyamitnyo, na timbalimo panintudunan nu tambuha'-Ku. Aku Tumpu Anu Matangkas na Kuasanyo no tataemo.”

¹⁵ Tumpu Anu Matangkas na Kuasanyo notataemo, “Aha to mia-mian nu Filistin nombalosakonmo pinoko idek hondo nu aha na sampobali' nu mompolee' pe'e mae nu nu aha ka' nompateimo aha kalana tahahumo hondo na aha nongka'ideki.

¹⁶Kalana aijo' Ku bebakonmo taalu' Aku montumbuhimo aha to mia-mian nu Filistin ka' mule' mompateimo aha. Iwi-iwi' na mian anu daagi' tinontuha' i sonibi nu bone' daerah nu aha Filistin Ku pateimo.

¹⁷Ku piboatimo na mohukum aha ka' Ku potudunmo na tambuha'-Ku sampeje ahi' Aku ma'osamo. De nu oa'imo nu aha na tambuha'-Ku nu sumbu'je nu aha taalu' Akumo ahi' na Tumpu.”