Read Saluan YEHEZKIEL 27 Bible Online

YEHEZKIEL 27 - Saluan bible

YEHEZKIEL 27

¹Tumpu Anu Matangkas na Kuasanyo notataemo mae hi beleng-Ku, “O, manusia anu madi' tumuu' batu, nyanyiakon na nyanyian de polamunanmo Tirus sumo uuka; kota' isonibi nu ambai haha aijo' anu badagang tibamo miannyo iwi-iwi' anu jojoong isina sonibi nu ambai; Tirus binulonmo na beleyum notatae, ‘Handaangku aiya sinukupmo hondo!’

⁴Ndalangon nu anggap nu beleyum sumomo ahi laigan. Beleyum binau sumomo ahi' kapan anu ma'ima' hondo.

⁵Binau pompimpi' beleyum te kau' aras i Bungkutnyo nu Hermon binau pelelan nu beleyum te kau' cemara nu Libanon.

⁶Binau bose nu beleyum haha atina', te kau anu toto daka-daka nu Basan na binala'. Binau saloo nu beleyum kau' cemara na binala', itogong Siprus na pinongalapan mae, palahiasannyo te sae nu gaja anu mahan na olinyo na pinaha pokona.

⁷Binau kadut nu beleyum ka' anu binau tanda da osumbu' na beleyum te hude lenan anu tinonun nu aha Mesir, ka' mongangahan na sujinyo. Binau pontenda'i nu beleyum haha atina' te hude anu ma'ima' hondo lengkat mae i Siprus ka' buhitnyo mingkamumu'.

⁸Topo bose nu beleyum mian nu Sidon tiba mian nu Arwad. Anu mokalaja atina' hi beleyum mian anu toto pande-pande na sola' talabut.

⁹To tuka-tukang kau' anu mokalaja i kapan, anu toto pande-pande na batukang mian nu Gebal. Kapan anu lengkat mae ilipu' sangga'at tokamo mae monsale'i de timbali da mamba mae badagang.

¹⁰To sulu-suludadu nu Persia, Lidia, tiba Libia tinimbalimo suludadu nu beleyum. Nu paha posambitmo nu aha na kanta ka' songko' nu aha anu ko aja'nyo i pagan mesen nu kota' nu beleyum. Tinulunganmo nu aha da pinatundu'mo na sampo iwi-iwi' sahingga nompaka talasanggomo na beleyum.

¹¹To sulu-suludadu anu lengkat mae i Arwad nonjagaimo pagan mesen nu beleyum; laigan toto tangka-tangkas anu pontanggalakonan mian jinaganmo nu to mia-mian anu lengkat mae i Gamad. Kanta nu aha pinaha pojiji'mo na nomposambit i pagan mesen nu beleyum. Ahamo aijo' na nomposukup sahingga nompaka pa'ima'mo na beleyum.

¹²Beleyum nompobalukmo bala-balang anu opodagang manjoo' hondo hi aha Spanyol, ka' salaku pombayan mae nu aha beleyum nontalimamo salaka, besak, timah mopute' tiba timah mo'itom.

¹³Beleyum binadagangmo hi aha Yunani, hi aha Tubal, ka' hi aha Mesekh, ka' salaku pombayan mae nu aha beleyum nontalimamo hi aha to botu-botuan ka' mule' bala-balang anu tambaga na binau.

¹⁴To bala-balang nu beleyum pinontolosimo nu beleyum i ajahan anu bau pohela' kareta, ajahan bau kasake'an tiba bagal anu lengkat mae Bet-Togarma.

¹⁵Mian anu jojoong i Rodus suele binadagangmo mae hi beleyum ka' mule mian anu jojoong idaerah anu isonibi nu ambai nongolimo bala-balang anu nu podagang nu beleyum ka' suele aha nomboamo mae sae nu gaja tiba kau' mo'itom.

¹⁶To pada-padagang lengkat ilipu' Siria nongolimo bala-balang anu nu podagang nu beleyum ka' mule' kakaya'an sangga'at anu manjoo' hondo atina' hi beleyum. Nu bayan nu aha nu batu mainan te batu zamrud, hude momea' mingka mumu', hude anu pinaha suji, hude lenan anu ma'ima' hondo, mainan te batu koral, ka' batu momea' susumo dalima.

¹⁷Yehuda tiba aha Israel montolosi balang anu nu podagang nu beleyum tiba gandum, juu' nu uani', lanya' nu zaitun ka' lampa-lampa.

¹⁸Mian anu jojoong i Damsyik nongolimo bala-balang anu nu podagang nu beleyum ka' mule' kakaya'an sangga'at nu beleyum ka' ia mombayan mae nu anggur anu lengkat mae i Helbon, ka' bulu nu domba lengkat mae i Sahar, ka' besak anu tinutukmo tiba santo lampa-lampa.

²⁰Mian anu jojoong i Dedan nombayanmo bala-balang nu beleyum tinolosan nu hude anu opake polatasi kasuhangan ihiku nu ajahan.

²¹Aha mian nu Arab tiba anu mongkuasai tano' Kedar nongolimo bala-balang nu beleyum tinolosan nu anak nu domba, ka' mule' domba lakinyo ka' mee'.

²²Bau pongoli bala-balang nu beleyum, aha to pada-padagang anu lengkat mae i Syeba tiba Raema nomboamo mae mainan-mainan, mosoni', ka' lampa-lampa anu ma'ima' hondo.

²³Kota-kota' Haran, Kane, Eden, to pada-padagang anu lengkat mae i Syeba, kota-kota' Asyur tiba Kilmad, iwi-iwi' binadagangmo tiba beleyum.

²⁴Aha nambamo mae nompobaluk pakean anu toto maha-mahan, hude momea' mingkamumu', hude anu ko sujinyo, ampas anu bulu nu domba na binau buhitnyo mongangahan ka' mule' ngangahan nu kahohon anu mahoson hondo.

²⁵ Bala-balang nu beleyum anu opodagang oboa nu kapan toto daka-daka' na moto-motoyuntun. Beleyum sumomo ahi' kapan anu notohopmo na muatannyo, kapan anu talabut indalangon.

²⁶Mian anu momboseakon beleyum momboamo beleyum i ambai anu ewa hondo. Beleyum tinintipmo nu mombun anu talalo ahi' hondo makansang.

²⁷Iwi-iwi na balang anu opodagang pipinomuatmo nu beleyum iwi-iwi' na mian anu sola talabut tiba anu mokalaja hi beleyum iwi-iwi' na tukang kau' tiba mian nu beleyum anu badagang toto samian na suludadu i kapan aijo' aha iwi-iwi' nolomosmo salatan beleyum tinompumo.

²⁸To mia-mian anu sola' talabut atina hi beleyum noloboo'mo kalana aha nabuhukmo. Kihis nu aha tinoka-tokamo i iwi-iwi na sonibi nu ambai na loungnyo.

²⁹Uuka aiya kapan aijo' pinala'ianmo, iwi-iwi' na anu sola' talabut ninsusule' ikatano'an.

³⁰Aha nohangimo uki' nu beleyum nososonmo ka' ihumangmo kalana nolibosmo. Aha nongkakambuhakonmo abu' i ubak nu aha ka' nale'mo i abu' salaku tanda ko anumo sinilaka.

³¹Kalana aha monginau beleyum sahingga kinismo nu aha na ubak. Nompusokmo hude kalung kalana sinusa'mo hondo. Aha ihumangmo kalana nolibosmo ka' nontando'imo uki' nu beleyum.

³²Lantas aha nanyanyimo sa'angu' na nyanyian anu onyanyi de ko anumo olamun. ‘O, Tirus ihe na anu moko ala mongkakanai beleyum? Tirus, kaiyongmo mae i ambai tempo uuka aiya imomo'mo.

³³Salatan ndalangon tinalabutanmo nu beleyum tiba muatannyo anu pinobuke'mo hondo na pinosake' pinosukupmo nu beleyum na kapalaluan nu to bansa-bansa; to tomu-tomundo' pinojadimo nu beleyum da kinaya.

³⁴Uuka aiya beleyum tinompumo ihansunmo ilananyo nu ambai. Iwi-iwi' na anu mokalaja hi beleyum ka' mule' iwi-iwi' na muatannyo nolomosmo hingga-hinggat tiba beleyum i uno nu ambai'.’

³⁵Iwi-iwi' na mian anu jojoong isonibi nu amabai ilakatnyomo na nohongo uki' nu beleyum. To tomu-tomundo' nu aha suele ahi' nabuhukmo; tinoamo i ohup nu aha na salaku tanda aha nabuhukmo.

³⁶Beleyum madi'mo otoa sampe toka sidu-sidutu'. To mia-mian anu badagang isongko-songko na dunia tinolokengkengmo kalana nabuhukmo dumo saidi' mae molasaimo susumo aijo'.”