Read Saluan YEHEZKIEL 29 Bible Online

YEHEZKIEL 29 - Saluan bible

YEHEZKIEL 29

¹ Itanggan sampulu' ka' ohua' bitu'on anu kinosampulu'nyomo i uno nu taun suele kinosampulu'nyomo tempo'nyo kami ihakop ka' binoa, Tumpu notataemo mae hi belengku,

²“O manusia anu madi' tumuu' batu, pisala'i na itomundo' Mesir. Poto'i hi ia taalu' ia tiba iwi-iwi' na aha mian da'isan nu Mesir obee'imo hukuman.”

³Tumpu Anu Matangkas na Kuasanyo nompokaumo mae aku da mompoto'i hi tomundo' Mesir potuunon sumo uuka, “Aku aiya sampobali' nu beleyum obuaa' daka-daka' hondo anu lewa' male' itotonga' nu kaunyo. Beleyum kinobubuunmo tukooyum beleyum na nombau ka' mule' tukooyum beleyumo na tumpunyo nu Kaunyo Nil aijo'.

⁴Ku pokaitmo na kakait ibagang nu beleyum ka' mompahapokampiti ikan atina' isonuku nu beleyum. Lantas beleyum Ku hela'mo da mosabat mae atina' i Kaunyo nu Nil tiba iwi-iwi' na ikan anu atina' kampi-kampit isonuku nu beleyum.

⁵Lapas mae beleyum tiba iwi-iwi' na ikan haha atina' Ku alinmo mamba i padang tampat anu kaho bone'nyo. Butong nu beleyum manimbantamo itano' ka' silakamo ikiijo'. Madi' ko samian anu toka mae molamun beleyum. Butong nu beleyum Ku bee'mo hi to tomo-tomonsi' ka' hi binatang sangga'at da nu kaan nu aha.

⁶ Sahingga nu sumbu'je nu aha mian daisan nu aha Mesir taalu' Akumo ahi' na Tumpu.” Tumpu notatae, “O bansa Mesir! Aha mian nu Israel montaha'imani tulungan mae nu beleyum, panyo beleyum ola mule' ahi' susumo tokon anu madi' mahoson.

⁷Salatan aha natisehamo hi beleyum, beleyum nopato'mo ka' nonsusukmo lepak nu aha sahingga tundun nu aha tinonggoisi'mo.

⁸Mokonyo aijo' Aku, Tumpu Anu Matangkas na Kuasanyo mompoto'i hi beleyum tukoong-Ku, Aku monsaimo suludadu da montumbuhi beleyum nu bajak ka' mompateimo miannyo tiba potuu'on nu beleyum.

⁹Mesir timbalimo tano' anu liingmo hondo. Sahingga nu sumbu'je nu belemiu taalu' Akumo ahi' na Tumpu.” Tumpu notatae, “O tomundo' nu Mesir! Kalana beleyum nontaloakonmo tukooyum Kaunyo nu Nil aijo' beleyum na tumpunyo ka' mule' tukooyum beleyum na nombau,

¹⁰sahingga Aku timbalimo sampobali' nu beleyum, ka' mule' sampobali' nu Kaunyo Nil anu nu beleyum ati-atina'. Songko-songko na Mesir Ku potimbalimo tano' anu liingmo hondo lengkat pe'e mae ikota' Migdol sasu utara toka-toka ikota' Aswan sasu salatan sahingga toka ipotempasan tiba Sudan.

¹¹Madi'mo daagi' ko manusia kabai binatang anu motulu ikiijo'. Patompulu' nataun na kinopinnyo madi'mo daagi' komian anu monjojoongi.

¹²Ku pojadimo na Mesir liingmo hondo sahingga mau lipu' sangga'at liing panyo iamo ahi' na lebe liing hondo. Patompulu' na taun na kota-kota' nu Mesir salaku anu ihansunmo nu lingkudui na kahansunan nu kota' sangga'at maumo pa' iyaya mae. Bansa Mesir Ku pojadimo mian anu nopalaimo. Aha mobagi-bagimo mamba i iwi-iwi na lipu' ka' jojoongmo hi aha bansa sangga'at.”

¹³Tumpu Anu Matangkas na Kuasanyo notatae, “O bansang Mesir, de lapasmo na patompulu' na taun aijo' belemiu po ule'mo Ku sule'akon mae lengkat ilipu' tampat nu belemiu namba nobagi-bagi aijo'.

¹⁴Belemiu po ule'mo Ku pokopiani ka' Ku pokaumo jojoong i Mesir bahagian salatan, tano' pinolengkatan nu belemiu mae. Ikiijo' mae belemiu mompotinjomo kalaja'an anu madi' mahoson,

¹⁵anu madi' hondo mahoson isongko-songko na dunia. Ku pojadi na belemiu madi' hondo mahoson sahingga belemiu madi' moko ala mompalentah bansa-bansa sangga'at kabai ko bubuun hi aha.

¹⁶Israel madi'mo momoita da otulungi nu belemiu. Uki' nu belemiu o bansa Mesir salaku mompotuka Israel da sinsumbu' taalu' sala' ahi' na talalo nontakabunakon Mesir susumo anu toho'mo binaunyo. Sahingga nu sumbu'je nu Israel taalu' Akumo ahi' na Tumpu Anu Matangkas na Kuasanyo.”

¹⁷Itanggan sa'angu' kinakonamo ibitu'on sa'angu' itaun kino uampulu'nyomo ka' popitu' tempo'nyo kami ihakop ka' binoa, Tumpu notataemo mae hi belengku,

¹⁸“O manusia anu madi' tumuu' batu, i Tomundo' Nebukadnezar lengkat mae i Babel montumbuhimo Tirus. Ia nompalentahmo to sulu-suludadu nonsimbu boaon anu toto boa-boat sahingga ubak nu aha ilongkungmo ka' mule' bekoang nu aha tinonggoisi'mo, panyo maumo itomundo' ka' mule' maumo suludadunyo madi' ahi' kino apa-apa anu i humpak nu aha maumo ahi' aha nalawemo susumo aijo'.

¹⁹Mokonyo aijo' Aku Tumpu Anu Matangkas na Kuasanyo notataemo: Tano' nu Mesir Ku bee'mo hi Tomundo' Nebukadnezar. Ia montololangimo ka' mongagoimo ka' mule' mongatomo iwi-iwi' na kakaya'an nu Mesir salaku bau pontamboi suludadunyo.

²⁰Tano' nu Mesir Ku bee'mo hi ia salaku pombalosi kalajanyo kalana suludadunyo nokalajamo hi beleng-Ku. Aku, Tumpu Anu Matangkas na Kuasanyo notataemo.

²¹De han aijo' jadimo, Aku mompojadimo Israel bansa anu mahoson hondo ka' mompobee'mo beleyum Yehezkiel, motatae bebasmo sahingga iwi-iwi' na mian timbalimo mompotombihing beleyum. Sahingga nu sumbu'je nu aha taalu Akumo ahi na Tumpu.”