Read Saluan YEHEZKIEL 30 Bible Online

YEHEZKIEL 30 - Saluan bible

YEHEZKIEL 30

¹Tumpu po ule' mule' notatae, Ia notatae,

²“O manusia anu madi' tumuu' batu, soba kila-kilamo ka' poto'i hi bansang Mesir apaa na anu Kupoto'i hi aha Aku Tumpu Anu Matangkas na Kuasanyo. Potataemo daka-daka' ka' haangmo sumo uuka; Ibeh! Sinaa nu Tumpu toka malia'mo mae! Ia sampamo mompalentah. Sinaa aijo' pikat kundomon, tempo'nyomo na to bansa-bansa mohumpakmo hukuman.

⁴Balaa' anu daka' hondo montuda'mo mae Sudan. Kiijo' i Mesir ko anumo mahampate. Anu silaka singkapmo manimbandang; songko-songko na lipu' otololangimo ka' ohansunimo.

⁵I uno nu pahampatean aijo' suele ahi' opateimo na to sulu-suludadu anu tinamboan lengkat mae i Sudan, Lidia, Libia, Arab, Kub ka' mule' posi bansang-Ku ahi'.”

⁶Tumpu Anu Matangkas na Kuasanyo notatae, “Lengkat mae i Migdol sasu utara sampe toka-toka i Aswan sasu salatan, iwi-iwi' na anu binasangaja'mo tiba Mesir saidi mae silakamo i uno nu pahampatean. Ka' suludadu nu aha Mesir anu talalo buulon aijo' singkapmo hansun. Aku Tumpu Anu Matangkas na Kuasanyo notataemo.

⁷Lipu' aijo' timbalimo lipu' anu liing hondo de obandingakon tiba lipu'-lipu' sangga'at anu suele iliingmo ka' mule' iwi-iwi' na kota'nyo timbalimo bekas nu kahansunan.

⁸De Ku papuimo na lipu' nu Mesir ka' mompateimo iwi-iwi' na anu sinangaja'mo tiba ia nu sumbu'je nu aha taalu' Akumo ahi' na Tumpu.

⁹De sinaa aijo' tokamo mae ka' Mesir hansunmo, Ku saimo na mian osake' ikapan da mompotolokengkeng aha mian nu Sudan anu madi' ko sangka'an ko sampobali mae toka, sahingga aha mabuhukmo hondo. Memang totu'u sinaa aijo' tokamo mae!”

¹⁰Tumpu Anu Matangkas na Kuasanyo notatae, “I Tomundo' Nebukadnezar na Ku pake lengkat mae i Babel da mohansuni iwi-iwi na kakaya'an nu Mesir.

¹¹I Nebukadnezar tiba suludadunyo anu madi' monsumbu' mongampuni tokamo mae mohansuni tano' aijo'. Nu tumbuhimo nu aha na Mesir nu bajak ka' mian anu silakamo motanatamo ilipu' aijo'.

¹²Ku po'otimo na Kaunyo nu Nil ka' songko-songko na Mesir obee'mo hi aha mian anu ma'idek na kinyonyoanyo. Aha to mia-mian anu isalipu'an mae Ku pokaumo mohopu'i songko-songko na lipu' aijo'. Aku, Tumpu notataemo.”

¹³Tumpu Anu Matangkas na Kuasanyo notatae, “Ku hansunimo na kapalesaya'an anu madi' totu'u tiba to pilo-pilogot anu kiijo' i Memfis. Madi'mo daagi' ko tomundo'nyo kiijo' Mesir. Iwi-iwi' na mian anu jojoong ikiijo' Ku pojadimo mabuhuk.

¹⁴Songko-songko na Mesir sasu salatan Ku pojadimo liing hondo ka' mule' kota' Soan anu sasu utara Ku papumo,

¹⁵ka' kakaya'annyo Ku hansunimo. Ku potudunmo na tambuha'-Ku hi Pelusium kota' anu binaumo benteng nu Mesir,

¹⁶ka' kota' aijo' mongoa'imo kasansala'an. Memang totu'u Ku papumo na Mesir. Iwi-iwi na pagan mesen nu kota' Tebe mohobo'mo ka' mule' kota' aijo' nu anjuhakonmo nu iaba'.

¹⁷To oli-olitau nu kota' Heliopolis tiba Bubastis silakamo i uno nu pahampatean ka' mule' to bou-bounenyo ohakopmo ka' oboa.

¹⁸De Ku pomingkotmo na kapalentahan nu Mesir ka' mongalamo kakuasa'annyo anu nu kabubunakan aijo', Tahpanhes nu saputmo nu pikat ka' to bou-bounenyo ohakopmo ka' oboa.

¹⁹Sumo aijo' na Aku mohukum Mesir, sahingga nu sumbu'je nu aha taalu' Akumo ahi' na Tumpu.”

²⁰Itanggan popitu' bitu'on sa'angu' i uno nu taun kinosampulu'nyomo ka' sa'angu' tempo'nyo kami ihakopmo ka' binoamo, Tumpu notataemo mae hi belengku,

²¹“O manusia anu madi' tumuu' batu, pinato'-Kumo na limanyo i tomundo' Mesir, ka' madi' ko anu nombobodi limanyo aijo' kabai nongilanju' da ma'alin ka' po ule' mule' mahoson na montoongi mule' bajak.

²²Aku, Tumpu Anu Matangkas na Kuasanyo notataemo: Aku aiya sampobali' nu tomundo' Mesir, ka' ohu-ohua' na limanyo Ku pato'akonmo, mau anu daagi' mahoson kabai anu nopato'mo. Sahingga bajak aijo' tongkakabasmo aijo' ilimanyo.

²³Ku ga'a-ga'atakonmo na mian nu Mesir mamba isongko-songko na dunia.

²⁴Lantas Ku pohosonmo na limanyo i tomundo' Babel, ka' Ku potoongmo na bajak-Ku ilimanyo. Panyo lima i tomundo' Mesir Ku pato'akonmo sahingga ia molotando'mo ka' mule' silakamo i ahop i tomundo' Babel, sampobali'nyo.

²⁵Memang totu'u, tomundo' Mesir madi'mo Ku pohoson panyo i tomundo' Babel Ku pohosonmo. De Ku bee'mo na bajak-Ku hi ia, ka' nu tangkakonmo sasu mokiijo' Mesir, nu sambu'je nu aha taalu' Akumo ahi' na Tumpu.

²⁶Ku ga'a-ga'atakonmo na aha mian nu Mesir mamba isongko-songko na dunia. Sahingga nu sumbu'je nu aha taalu' Akumo ahi' na Tumpu.”