Read Saluan YEHEZKIEL 31 Bible Online

YEHEZKIEL 31 - Saluan bible

YEHEZKIEL 31

¹Itanggan sa'angu' bitu'on kinototolu'nyomo i uno nu taun anu kino sampulu'nyomo ka' sa'angu' tempo'nyo kami ihakop ka' binoa, Tumpu notataemo mae hi belengku,

²“O manusia anu madi' tumuu' batu, poto'i na potuunon-Ku aiya hi tomundo' Mesir ka' hi iwi-iwi' na bansanyo: Memang totu'u daka' na kakuasa'an nu beleyum! Madi' ko anu moko ala mongkakanai beleyum!

³Beleyum sumomo ahi' lontio' nu Libanon anu ma'ima' hondo manjoo' na panga'nyo anu tambok hondo na honnyo ka' ma'ima'. Batangnyo hodi' ka' maloloyuk mokiita' tuu'nyo toka-toka i kundom.

⁴Ia tumuu' kalana ueenyo sukup hondo. Kaunyo i aluk nu tano' na mombee'i kaanonnyo, mohumpisi iwi-iwi' na bakatnyo, ka' monguei kau' iwi-iwi' sangga'at.

⁵Kalana ueenyo madi' toho' maga'a, ia tumuu' molumba', panga'nyo daka' ka' mule' mantan. Iwi-iwi' na kau' isongko-songko na alas, iamo na anu lebe matangkas maloloyuk mokiita'.

⁶Mongangahan na tomonsi' mimpeta i panga'nyo. Bintang anu ma'ela' monganak i patuunyo. Iwi-iwi' na bansa anu toto daka-daka isongko-songko na dunia sumuhang mingkong i patuunyo.

⁷Kau' aijo' ma'ima' hondo na otonto'i; batangnyo hodi', panga'nyo mantan. Bakatnyo nanimpasokmo nokaiyong maleeng hondo nontokamo mata nu uee i uno nu tano'.

⁸ Iwi-iwi' na kau i uno nu Eden te taman nu Tumpu madi' timbali opokakanakon tiba ia. Madi' ko kau' lontio' anu moko ala mongkakanai ia, madi' ko kau' anu sumo aijo' na ko mantannyo na panga'nyo. Memang totu'u i uno nu taman nu Tumpu madi' ko kau' anu sumo aijo' na ko ima'nyo sumo ia.

⁹Akumo na nompojadi ia da natali' tiba to panga-panga'nyo anu toto manta-mantan ka' tambok na honnyo. Iwi-iwi' na kau' i uno nu taman nu Tumpu, madi' sanang na kinyonyoa hi ia.

¹⁰Kalana aijo' Aku, Tumpu Anu Matangkas na Kuasanyo mompoto'imo hi beleyum apaa na anu jadi saidi' mae hi kau' anu tuu'nyo toka-tokamo i kundom aijo'. Kalana de talalomo matangkas, talalomo mule' ahi' mompakabuulon na ia.

¹¹Sahingga Aku madi'mo montalima ia ka' mombee'mo ia hi kakuasa'an anu lengkat mae isalipu'an, anu saidi' mae monsala ia sitimbang tiba palabuatannyo ma'i-ma'idek.

¹²Suludadu anu lengkat mae isalipu'an anu madi' monsumbu' mongampuni na montaa' ia ka' mompojohok ia. Panga'nyo toto ise-ise' anu nopato'mo motanatamo isongko-songko na bungkutnyo ka' bangka'nyo ilipu' aijo'. Iwi-iwi' na bansang anu jojoong i patuunyo mambamo mompala'i ia.

¹³To tomo-tomonsi tokamo mae ka' manintengke' i kau' nonotua'mo aijo', ka' binatang anu toto ela-ela' mompahampeja'akonmo panga'nyo haha aijo'.

¹⁴Iwi-iwi' aijo' jadimo da otampu'uni uuka aiya madi'mo daagi' ko kau' anu tumuu' sumo aijo' na kotangkasnyo; madi'mo daagi ko tuu' nu kau' anu montoka-toka kundom maumo ahi' mohumpak uee anu molabi-labi. Iwi-iwi' tionyo ahi' silaka susumo manusia anu madi' tumuu' batu ka' sihukmo mosa'angu' tiba to mia-mian anu nintatau'mo i dunia nu mian anu sinilakamo.”

¹⁵Sumo uuka na koonyo nu Tumpu Anu Matangkas na Kuasanyo, “De kau' aijo' mintatau'mo i dunia nu mian anu sinilakamo, Kupalentahmo na uee anu i aluknyo nu tano' mongomoki ia salaku tanda ko anumo ihaangan. Sabole-bolemo Ku tahan na solok nu kaunyo ka' mongonsongimo iwi-iwi' na panga'nyo nu kaunyo. Kalana kau' aijo' inanggasmo, Ku potokamo mae na pikat aita' isinin na bungkutnyo nu Libanon ka' mompopangkalualemo iwi-iwi' na kau' i uno nu alas.

¹⁶De kau' aijo' Ku tau'akonmo i dunia nu mian anu sinilakamo, lintupnyo nu ia manabu' mompojadimo mabuhuk to bansa-bansa. Iwi-iwi' na kau' i uno nu Eden ka' to kau-kau' anu toto ima-ima' anu daagi' i Libanon anu nohumpakmo nolabi-labi na uee ka' anu nintatau'mo i dunia anu kaiyong mae hondo i aluknyo sanangmo kalana nanabu'mo na kau' aijo'.

¹⁷Aha mombatukimo mamba i dunia nu mian anu sinilakamo ka' sihukmo tiba aha anu nanabu'mo momona. Ka' iwi-iwi' na anu naipuan mae sinumuhangmo ipatuu nu kau' aijo' oboamo isongko-songko na bansa-bansa.

¹⁸Kau' aijo' molambangakon i tomundo' Mesir tiba bansanyo. Madi' ko kau' anu kiijo' i uno nu Eden matangkas sumo aijo' ka' ma'ima'. Panyo uuka aiya susumo suele to kau-kau' i uno nu Eden, kau' aijo' mule' ahi' mintatau'mo mokaiyong i dunia nu mian anu sinilakamo ka' sihukmo tiba aha anu madi' monsumbu' Tumpu Allah ka' mule' tibamo aha anu sinilakamo i uno nu pahampatean. Aku, Tumpu Anu Matangkas na Kuasanyo notataemo.”