Read Saluan YEHEZKIEL 33 Bible Online

YEHEZKIEL 33 - Saluan bible

YEHEZKIEL 33

¹Tumpu po ule' mule' notatae mae hi belengku, Ia notatae,

²“O manusia anu madi' tumuu' batu, poto'i hi bansang nu beleyum de Ku potokamo mae na pahampatean i sa'angu' na lipu', aiya na anu saidi' mae jadi. Mian anu jojoong ilipu' aijo' mompile'imo samian anu aijo' igampa nu aha da bau ponjagai.

³De ponjagai aijo' montoamo mae sampobali' toka ia mompo'onyi'mo salaku tanda ko bahayamo da iwi-iwi' na mian balasadiamo ahi'.

⁴De ihe na mohongomo tanda bahaya aijo' panyo madi' mompajuli, ka' sampobali' tokamo mae ka' mompateimo ia, saba' ia silaka aijo' kalana posi kasala'annyomo ahi'. Panyo de ia mompajuli ahi' tanda bahaya aijo' tantu ia salamat madi' opatei.

⁶Panyo de ponjagai aijo' montoamo mae sampobali' toka ka' ia madi' mompo'onyi' tanda bahaya aijo' lantas sampobali' mompateimo mian haha aijo' anu baladosa', Ku tuntutmo hi ia ponjagai ai-aijo' na aha sinilaka aijo'.

⁷O manusia anu madi' tumuu' batu, beleyum ihangkat-Kumo da bau ponjagai bansa Israel. Poto'i hi aha na pokinde' aiya;

⁸De Kupoto'imo saba' daagi' ko samian anu palabuatannyo ma'idek saidi' mae silakamo, panyo beleyum madi' mompokinde'i ia da ia madi'mo lewa' mombau palabuatannyo ma'i-ma'idek aijo' sahingga ia salamat, saba' ia silaka daagi' ahi' susumo mian anu baladosa'. Panyo ia sinilaka aijo' Ku tuntutmo hi beleyum.

⁹De nu pokinde'i ahi' nu beleyum na mian anu saja mombau palabuatan ma'idek ai-aijo' ka' ia madi' ahi' belenti na mombau palabuatan ma'idek ai-aijo', saba' ia silaka sumomo ahi' mian anu baladosa', panyo beleyum na salamat ahi'.”

¹⁰Tumpu notataemo mae hi belengku, “O manusia anu madi' tumuu' batu, po ule' pe'e taloakon hi aha Israel na potatae nu aha sumo uuka, ‘Kami sinusa'mo kalana nontanggungmo dosa' tiba palabuatan mami anu ma'idek. Mosia na kami timbali tumuu'?’

¹¹Poto'iakon hi aha saba' atas sanggong-Ku, Tumpu anu tumuu', Tumpu Anu Matangkas na Kuasanyo, Aku madi' sanang de mian anu palabuatannyo ma'idek silaka; panyo mule' ahi' Ku ka'ima'i da ia bolimo daagi' lewa' mombau dosa'nyo haha aijo' da ia tataap tumuu'. O bansa Israel, bolimo daagi' lewa' mombau palabuatan ma'idek! Kadaka' belemiu mongka'ima'i silaka?

¹²Jadi manusia anu madi' tumuu' batu, poto'iakon hi aha mian nu Israel taalu' de mian anu ma'ima' na kinyonyoanyo mombaumo dosa', saba' kaimaannyo u'utu mae madi' moko ala montulungi ia. De mian anu palabuatannyo ma'idek madi'mo mombau dosa' ia madi'mo ohukum, ka' de mian anu ma'ima' na kinyonyoanyo mombaumo dosa' ia madi'mo oposalamat.

¹³Memang ahi' Aku binalajanji'mo momposalamat mian anu ma'ima' na kinyonyoanyo, panyo de ia mombaumo dosa' ka' taha'imanmo tukoonyo ia oposalamat palabuatannyo ma'i-ma'ima' u'utu mae aijo', ia sala'mo. Aku madi'mo daagi' monginau' ka'ima'annyo anu toho'mo binaunyo aijo' ka' ia silakamo kalana dosa'nyo haha aijo'.

¹⁴Memang ahi' Aku nompokinde'imo mian anu palabuatannyo ma'idek aijo' silakamo. Panyo de ia madi'mo mombau dosa' ka' mombaumo palabuatan anu ma'ima' ka' anu mingkona, umpamanyo ia monsule'akonmo balang anu pinogade nu mian hi ia, kabai balang anu tinomangnyo mae ka' montulutimo atulan totu-totu'u anu momboa ia saidi' mae i kantumuu'an, saba' ia madi'mo daagi' silaka.

¹⁶Aku madi'mo daagi' monginau' iwi-iwi na dosa' anu toho'mo binaunyo, ka' ia tumuu'mo kalana ia nombaumo apaa na anu mingkona ka' ma'ima'.

¹⁷Panyo bansa aijo' nontaloakonmo tukoonyo nu aha kaputusan-Ku aijo' madi' adin! Padahan kaputusan nu aha ahi' na madi' adin.

¹⁸Po ule' pe'e minsan aiya na Ku poto'i taalu' de mian anu ma'ima' na kinyonyoanyo mombaumo palabuatan anu ma'idek, ia silakamo kalana nu saduakon nu aijo'.

¹⁹De mian anu palabuatannyo ma'idek madi'mo mombau dosa' ka' mombaumo apaa na anu ma'ima' ka' anu mingkona, ia tumuu'mo kalana palabuatannyo ai-aijo'.

²⁰Maumo ahi' sumo aijo' bansa Israel nontaloakonmo tukoonyo nu aha kaputusan-Ku na madi' ahi' adin. Memang totu'u, Aku momputusimo hukuman nu aha toto samian sitimbang tiba palabuatan nu aha.”

²¹ Itanggan olima' bitu'on kinosampulu'nyomo ka' taun kinosampulu'nyomo ka' ohua' tempo'nyo kami ihakop ka' binoa, samian anu noko popalai mae lengkat i Yerusalem tinokamo ka' nompoto'imo hi belengku tukoonyo kota' aijo' pinatundu'mo.

²²Pihi-pihi ma'isa pe'e ia tinoka, ingoa'ankumo na kuasa nu Tumpu. Jadi salatan mian aijo' tinokamo mae hi belengku aku noko alamo notatae ka' madi'mo daagi' imomo'.

²³Tumpu notataemo mae hi belengku,

²⁴“O manusia anu madi' tumuu' batu, aha to mia-mian anu jojoong i kota-kota' i tano' nu Israel anu singkapmo ihansun aijo'. Nontaloakonmo, ‘I Abraham na nohumpak tano' aiya' iwi-iwi' padahan ia ola sausa'nyo. Kita aiya na manjoo', jadi tano' aiya kitamo ahi' na tumpunyo.’ ”

²⁵Kalana aijo' Tumpu Anu Matangkas na Kuasanyo nompalentahmo mae aku da mompotokakon potuunon-Nyo aiya hi aha, “Belemiu mongkaan antok nu binatang anu daagi' ko baso'nyo; belemiu monsombah pilogot ka' mompatei. Baani hondo na belemiu mongakui tano' aiya belemiumo na tumpunyo.

²⁶Belemiu montakabunakonmo bajak nu belemiu. Katantuan nu belemiu atina' mahenyu hondo. Belemiu iwi-iwi' saja'mo masala'. Daagi' mongakui mule' na belemiu tano' aiya, belemiu na tumpunyo?

²⁷Atas sanggong-Ku, Tumpu anu tumuu', Tumpu Anu Matangkas na Kuasanyo, to mia-mian anu jojoong i kota' haha aijo' anu singkapmo i hansun silakamo opatei. Aha anu jojoong i tampat padang anu ewa nu kaanmo nu binatang anu mahangas. Aha anu matisuluk i iwi-iwi na bungkutnyo ka' i to lia-liang silakamo kalana panyakit anu molele.

²⁸Lipu' aijo' Ku pojadimo padang tampat anu mateges ka' liingmo, ka' kakuasa'an nu kabubunakon nu aha aijo' mingkotmo. To bungku-bungkutnyo nu Israel timbalimo liing hondo, sahingga madi' ko mian anu baani motulu ikiijo'.

²⁹De Ku hukumo na bansa aijo' kalana iwi-iwi na dosa' nu aha ka' mompojadimo lipu' aijo' liingmo hondo, nu sumbu'je nu aha taalu' Akumo ahi' na Tumpu.”

³⁰Tumpu notatae, “O manusia anu madi' tumuu' batu, beleyum saja'mo bau sisik nu aha bubuu' bansa nu belemiu de aha mompaha singka-singkabotmo koko pagan mesen nu kota' kabai i ahop nu sabatan nu laigan. Aha basisikmo samian tiba samian, ‘Donganmo, da kita mohongomo apaa na koonyo nu potuunon nu Tumpu sinaa aiya.’

³¹Aha toka mae manjoo' hondo na mian ka' salaku mian anu palesayamo hi belengku, aha sumuhangmo mompotombihing potatae nu beleyum, panyo apaa na anu nu palentahkon nu beleyum madi' ahi' nu tuluti nu aha. Biwi nu aha montaloakon potatae mongka'ima'i panyo kinyonyoa nu aha na ola ahi' mompotutugakon mosia na mohumpak ka'untungan.

³²Beleyum o'anggap mian anu saja' manyanyi anu monyanyiakon palasinta'an anu sualanyo ma'ima' hondo ka' mule' pande na mongkuti' kasapi'. Memang nu hongo ahi' nu aha na potatae nu beleyum panyo madi' ahi' montuluti.

³³Iwiiwi' na anu nu taloakon nu beleyum atina' saidi' mae tionyo ahi' jadi, ka' de tempo'nyo aijo' tokamo mae nu sumbu'je nu aha taalu' daagi' toho' kino nabi tinoka aijo' hi aha.”