Read Saluan YEHEZKIEL 34 Bible Online

YEHEZKIEL 34 - Saluan bible

YEHEZKIEL 34

¹Tumpu notataemo mae hi belengku,

²“O manusia anu madi' tumuu' batu, pisala'i na to tomu-tomundo' nu aha Israel, ka' poto'i apaa na anu tinaloakon-Kumo nu Aku Tumpu Anu Matangkas na Kuasanyo hi aha, ‘Silakamo na belemiu o to pola-polaya' nu Israel. Belemiu ola mompotutugakon posi kapentingan nu belemiu misa' da bau kapentingan nu domba nu belemiu haha atina.

³Susunyo o inum nu belemiu, bulunyo obau nu belemiu pakean, ka' domba anu molompo' hondo okolot ka' okaan nu belemiu. Belemiu madi' toho' mongkalesang domba nu belemiu haha atina.

⁴Domba nu belemiu haha atina' anu madi'mo mahoson madi'mo okalesang nu belemiu, anu masakit madi'mo opakuli'i, anu binelaonmo madi'mo obobodi nu belemiu, anu tinalasmo ka' nolapusmo madi'mo olio nu belemiu ka' osule'akon mae. Pakalaus iwi-iwi' na domba haha aijo' talalo ahi' osigohi nu belemiu.

⁵ Kalana madi'mo ko to pola-polaya'nyo sahingga domba haha aijo' noga'a ga'atmo ka' jinadimo kaanon nu binatang anu mahangas.

⁶Sahingga dombang-Ku haha aijo' lewa'mo namba ito puge-puge'nyo anu matangkas ka' mule' ito bungku-bungkutnyo. Aha noga'a-ga'atmo namba isongko-songko na dunia, madi' kinosamian na anu mompalahatikan aha kabai molio aha.

⁷Jadi belemiu to pola-polaya' potombihing apaa na anu Kupoto'i nu Aku Tumpu Anu Matangkas na Kuasanyo nontaloakonmo hi beleyum.

⁸Atas sanggong-Ku Tumpu Allah anu tumuu' palahatikan ahi'! Dombang-Ku haha aijo' sina'umo ka' mule' kinaanmo nu binatang anu mahangas, kalana madi' ko anu nolaya' aha. Belemiu to pola-polaya'-Ku madi'mo nongkalesang domba haha aijo'. Belemiu ola ahi' mompotutugakon posi butong nu belemiu, misa'mo kapentingan nu domba haha aijo'.

⁹Jadi potombihing mae o to pola-polaya',

¹⁰Aku, Tumpu Anu Matangkas na Kuasanyo notataemo hi beleyum, taalu' Aku aiya sampobali' nu beleyum. Dombang-Ku haha atina' po ule'mo Ku ala, ka' madi'mo Ku poki kalesang hi beleyum; belemiu madi'mo daagi' Ku pobee' mompotutugakon apaa na posi kapentingan nu beleyum. Dombang-Ku haha atina' Ku posalamatmo sahingga aha madi'mo daagi' bau kaanon nu belemiu.’ ”

¹¹Tumpu Anu Matangkas na Kuasanyo notatae, “Posi Akumo na molio dombang-Ku haha aijo' ka' mongkalesang aha,

¹²susumo samian na polaya' molio ka' momposihuk to domba-dombanyo anu noga'a-ga'atmo lantas mongkalesang aha. Aha Ku sule'akonmo mae lengkat mae isongko-songko na tampat anu pinoga'a-ga'atan nu aha, toka itempo'nyo sinaa pikatmo ka' sinaa anu madi'mo ma'ima' aijo'.

¹³Aha Ku sabatakonmo mae lengkat mae hi aha to bansa-bansa tiba to lipu-lipu' anu isalipu'an lantas Ku posihukmo ka Ku boamo iposi lipu' anu aha. Aha Ku laya'mo mamba ito bungku-bungkutnyo ka' ibangka'nyo haha aijo' i Israel ka' Ku boamo na aha ipadang tampat nu hemputon ka' anu ma'ima'an.

¹⁴Memang totu'u Ku posadiaimo na aha padang tampat anu hemputon anu molumba' aita' mae i bungkutnyo tiba ito bangka-bangka'nyo i tano' nu Israel. Ikiijo' mae aha mingkainmo ka' mongototmo hemput madi'mo ko anu mompoposia.

¹⁵Posi Akumo na timbali polaya' nu to domba-dombang-Ku ka' mompo sadiakon tampat da bau pilawean nu aha; Aku, Tumpu Anu Matangkas na Kuasanyo no tataemo.

¹⁶Anu nolapusmo Kulio, anu tinalasmo Ku sule'akonmo, anu binelaonmo Ku bobodi, anu masakit Ku pakuli'imo; panyo anu molompo' ka' mule' mahoson Ku pateimo kalana Akumo na polaya' anu momba-mombau apaa na anu ma'ima'.

¹⁷Potombihing mae oto domba-dombang-Ku! Aku, Tumpu Anu Matangkas na Kuasanyo notataemo hi beleyum saba' Aku momputusimo hukuman nu belemiu toto samian ka' mongga'atakonmo anu ma'ima' da bolimo maninggalo' hi anu ma'idek aijo'mo domba-domba da bolimo maninggalo' hi mee'.

¹⁸Anu atina' hi belemiu daagi' ko anu madi' ma'osa de ola mompomingkot hemput anu ma'ima' hondo, panyo mule' ahi' mompahampeja'akon hemput anu madi' nu otot nu aha! Aha monginum uee anu molino hondo lantas mongketok da mohibu na uee anu madi' nu inum nu aha!

¹⁹Domba-dombangKu sansangga'atannyo na mongkamilui ahi' mongotot hemput anu sola'mo pinahampeja'akon ka' kahanda' ahi' monginum uee anu nohibumo aijo'.

²⁰Kalana aijo' Aku, Tumpu Anu Matangkas na Kuasanyo nontaloakonmo hi beleyum, o, domba-domba anu toto lompo-lompo', Aku tokamo mae timbali mian kopian atina hi to domba-domba anu toto hoso-hoson ka' hi domba anu madi'mahoson.

²¹Belemiu mompaha gege-gegensomo ka' montandukmo domba anu masakit sahingga aha mambamo madi'mo maninggalo' igombuan nu domba sangga'at.

²²Panyo posi Akumo ahi' na momposalamat domba-dombang-Ku, da aha madi'mo daagi' sola'osigohi. Akumo na momputusi hukuman nu to domba-dombang-Ku toto sa'angu' ka' mule' mongga'atakon anu ma'ima' da madi'mo maninggalo' hi anu ma'idek.

²³ Aku mohangkatmo samian na tomundo' anu pokakana sumo posaihon-Ku i Daud da timbali bau polaya' aha, ka'iamo na mompalakai aha.

²⁴ Aku, Tumpu timbalimo Tumpu nu aha ka' tomundo' anu pokakana sumo posaihon-Ku i Daud aijo' mongkuasaimo aha. Aku, Tumpu notataemo.

²⁵Aku mombaumo palajanjian tiba aha anu timbali otaha'imani monjagai aha. Ku laa'mo na binatang iwi-iwi' anu mahangas isongko-songko na lipu', sahingga to domba-dombang-Ku jojoongmo sanang i iwi-iwi na padang ka' lumukutmo i iwi-iwi na alas.

²⁶Ku balakatimo na aha ka' mompobee'mo aha jojoong i bungkutnyo anu susi' anu Aku na tumpunyo. Aha Ku bee'imo ujan de nu palalui nu aha.

²⁷Iwi-iwi' na kau' mimbua'mo, iwi-iwi' na ale' ko hasinnyomo ka' iwi-iwi' na mian jojoong madi'mo ko anu mompoposia itano'nyo. De lante' anu pinompungu mian anu palesayamo hi beleng-Ku, Ku botu'akonmo ka' aha Ku pobebasmo da madi'mo nu botuani nu tomia-mian anu nombotuanimo aha, nusumbu'je nu aha taalu' Akumo ahi' na Tumpu.

²⁸Aha madi'mo daagi otololangi nu to bansa-bansa anu madi' monsumbu' Aku, kabai nu sa'u nu to bina-binatang anu mahangas. Aha tumuu'mo ma'ima' ka' madi'mo daagi ko samian anu lewa' mompahatakut aha.

²⁹Ku pojadimo molumba' na ale' iwi-iwi' nu aha, sahingga madi'mo daagi' ko tempo' kasusa'an i anu okaan, ilipu' aijo'. Aha madi'mo daagi' lewa' o, alu nu to bansa-bansa sangga'at.

³⁰Sahingga nu sumbu'je nu mian iwi-iwi' taalu' Israel aijo'mo na mian-Ku anu palesayamo hi beleng-Ku, ka' taalu' Aku na monjagai aha. Aku, Tumpu Anu Matangkas na Kuasanyo notataemo.

³¹Memang totu'u belemiumo na tompukan nu dombang-Ku anu Ku bee'i mongkaan. Belemiu atina'mo na mian anu palesayamo hi beleng-Ku, ka' mule' Aku, Tumpu nu belemiu. Aku, Tumpu Anu Matangkas na Kuasanyo notataemo.”