Read Saluan YEHEZKIEL 37 Bible Online

YEHEZKIEL 37 - Saluan bible

YEHEZKIEL 37

¹Aku nongoa'imo kuasa nu Tumpu tiba Roh-Nyo nomboamo aku nintua namba ibangka'nyo anu manjoo' hondo na buku.

²Aku tinakamo nu Tumpu namba nonsongkohi bangka'nyo aijo' ka' aku nontoamo songko-songko na bangka'nyo aijo' notanatamo na buku manjoo' hondo ka' mule' nanggasmo hondo.

³Tumpu nompokilawamo mae hi belengku, “O manusia anu madi' tumuu' batu, pa' timbali na buku haha daagi' po ule' tumuu'?” Aku nontaami, “Tumpu Anu Matangkas na Kuasanyo, hanya Belento na anu monsumbu' hondo.”

⁴Lantas Tumpu nompalentahmo aku da mompoto'i potuunon-Nyo sumo uuka hi buku haha aijo' anu nanggasmo,

⁵“Aku Tumpu Anu Matangkas na Kuasanyo mompuhakonmo santuu' mokiijo' i uno nu butong nu belemiu da belemiu po ule' mule' tumuu'.

⁶Ku pokonaimo uat tiba antok hi belemiu ka' Ku lupi'mo na belemiu nu kilit. Belemiu Ku bee'imo santuu' sahingga tumuu'mo. Sahingga nu sumbu'je nu belemiu taalu' Akumo ahi' na Tumpu.”

⁷Lantas aku i Yehezkiel notataemo hi buku haha aijo' susumo anu pinalentahkonmo nu Tumpu. Ka' hau-haunyo aku notatae aijo' ihongongkumo na lewo' gele-gelentutan kalana buku haha aijo' nontampu'unimo nompahaguntang sangga'at tiba sangga'at.

⁸Hau-haunyo aku mompalahatikan, buku haha aijo' nontampu'unimo kino uatnyo ka' ningantokmo, lantas kinokilitnyomo panyo butong haha aijo' ma'isa kinosantuu'nyo.

⁹Tumpu Allah notataemo mae hi belengku, “O manusia Anu Madi' tumuu' batu, potatemo hi mombun. Poto'i Aku Tumpu Anu Matangkas na Kuasanyo nompalentahmo ia da tokamo mae lengkat iyaya mae na tampat, da mompuhakonmo santuu' i uno nu butong haha aijo' anu daagi' mate sahingga aha po ule'mo tumuu'.”

¹⁰ Sahingga aku notataemo susumo koo-Nyo nu palentah nu Tumpu ka' mombun nompuhakonmo ahi' santuu' i uno nu butong haha aijo' lantas aha tinumuu'mo ka' mule' singkapmo tinuminjo. Konjoo'nyo nu aha manjoo' hondo, sukup hondo na ohangkat bau suludadu.

¹¹Tumpu Allah notataemo mae hi belengku, “O manusia anu madi' tumuu' batu, buku haha aiya molambangakon bansang Israel. Aha nososonmo koonyo nu aha, aha nanggasmo madi'mo daagi' ko anu otaha'imani isinaa aiya mae i ahop.

¹²Kalana aijo' poto'imo pa'apaa na anu jadi saidi' mae hi aha mian Israel anu palesayamo hi beleng-Ku, saba' Aku Tumpu Anu Matangkas na Kuasanyo mombukamo kubulan nu aha. Ku sabatakonmo mae na aha lengkat ikiijo' ka' po ule'mo mae momboa aha itano' nu Israel.

¹³De Ku baumo na iwi-iwi' aijo' mian anu palesayamo hi belengku monsumbu'je taalu' Akumo ahi' na Tumpu.

¹⁴Aku mompuhakonmo santuu' i uno nu butong nu aha da aha tumuu'mo, lantas aha Ku pobee'mo jojoong iposi lipu' nu aha. Sahingga nu sumbu'je nu aha taalu' Akumo ahi' na Tumpu. Aku Tumpu notataemo ka' memang ahi' mompojadimo.”

¹⁵Tumpu po ule' mule' notatae mae hi belengku,

¹⁶“O manusia anu madi' tumuu' batu, ala na tokon sa'angu' ka' potulis na potatae aiya sasu aita' mae, ‘Kalaja'an nu Yehuda'’. Lantas ala mule' na tokon sangga'at, ka' potulis sasu aita' mae ‘Kalaja'an nu Israel’.

¹⁷Lapas aijo' toongmo na tokon aijo' ohu-ohua' sahingga puusnyo mosa'angu'mo timbalimo sa'angu' na tokon.

¹⁸De bansa nu belemiu mompokilawa apaa na alati'nyo,

¹⁹poto'i hi aha, taalu' Aku, Tumpu Anu Matangkas na Kuasanyo mongalamo tokon anu molambangakon Israel ka' mompogalumo hi tokon anu molambangakon Yehuda. Ohu-ohua' na tokon aijo' Ku posa'angu'mo ka' Ku toongimo nu limang-Ku.

²⁰Toongi na tokon aijo' ohu-ohua' ka' potoa hi bansang aijo'.

²¹Lantas poto'imo hi aha, taalu' Aku, Tumpu Anu Matangkas na Kuasanyo mongalamo mae iwi-iwi' na bansang-Ku lengkat mae ilipu'-lipu' anu kinalambananmo nu aha. Aha Ku posihukmo ka' po ule'mo Ku boa mae iposi lipu' nu aha.

²²Aha Ku posa'angu'mo timbali sa'angu' na bansang itano' aijo' ibungkutnyo nu Israel. Aha nu palentahmo nu sa'angu' na tomundo' ka' madi'mo daagi' moga'a-ga'at timbali ohua' na bansa kabai kalaja'an.

²³Aha madi'mo daagi' mohenyui butong nu aha nu palabuatan mombau dosa' ka' monsombah to pilo-pilogot anu mohenyui aha. Ku pobebasmo na aha da madi'mo mombau iwi-iwi' na kasala'an anu monsaduakon aha madi'mo mompajuli mae Aku. Ku posusi'mo na aha; aha timbalimo mian anu palesayamo hi belengku ka' Aku Tumpu Allahmo nu aha.

²⁴ Aha nu posa'angu'mo nu samian na tomundo' sumo lapangnyo i tomundo' Daud anu saidi' mae mompalentah sampe toka sidu-sidutu'. Aha tulu-tulutanmo na montuluti iwi-iwi' na atulan-Ku. Ka' sampe toka sidu-sidutu' aha tiba lee' nu aha monjojoongimo tano' aijo', tano' anu binee'-Kumo hi Yakub ka' jinojoonganmo nu mompolee' nu aha.

²⁶Aku mombaumo sa'angu' na palajanjian tiba aha anu mompo amanmo aha sampe toka sidu-sidutu'. Itano' nu aha aijo' Ku baumo na Laigan-Ku anu tataapmo kiijo' mae sampe toka sidu-sidutu'.

²⁷ Aku jojoongmo tiba aha, Aku timbalimo Tumpu Allah nu aha ka' mule' aha timbalimo mian anu palesayamo hi beleng-Ku.

²⁸De Laigan-Ku daagi'mo ko anu aijo' hi aha sampe toka sidu-sidutu', nu sumbu'je nu aha bansang sangga'at taalu' Akumo ahi' na Tumpu anu nompile'imo aha Israel sahingga jinadimo mian anu palesayamo hi beleng-Ku.”