Read Saluan YEHEZKIEL 40 Bible Online

YEHEZKIEL 40 - Saluan bible

YEHEZKIEL 40

¹Tempo'nyo aitu tanggan sampulu'mo bitu'onmo sa'angu' i taun kino uampulu'nyomo ka' olima' na kami kijoo'mo mae itampat pinomboan, sampulu'mo ka opat na taun salatan Yerusalem pinatundu'mo, ingoa'ankumo na kuasa nu Tumpu, lantas binoa-Nyomo na aku.

² Nontoamo anu pinotoa, Tumpu Allah nomboamo aku i tano' nu aha Israel ka' pinojoong-Nyomo na aku i bungkutnyo anu matangkas. I ahopku tinoangkumo na sanggombu na laigan anu pokakana susumo kota'.

³ Aku binoa-Nyomo nokiijo' ka' aku nontoamo samian na mo'ane anu jongkilaban susumo tambaga tinjo-tinjo koko sabatan daka'. Ia nontoongi kahohon bau pongukun te lenan na kinahohon ka' mule' kau' anu bau pongukun.

⁴Mo'ane aijo' notataemo mae hi belengku, “O manusia anu madi' tumuu' batu, potombihing mae ima-ima' ka' opalahatikan iwi-iwi' na anu ku potoa hi beleyum, kalana makisud aijo' sahingga beleyum binoamo mae no uuka. Poto'i hi aha iwi-iwi' bansang Israel apaa na anu tinoamo nu beleyum.”

⁵ Lantas aku nontoamo Laigan nu Tumpu anu tinikuban nu pagan mesen. Mo'ane aijo' notampu'unimo nongukun pagan mesen aijo' nu kau' anu bau pongukunnyo, ko mantannyo totolu' na meten. Sahingga sinumbu'mo na pagan mesen aijo' ko tangkasnyo totolu' na meten ka' mule' ko butolunyo suele totolu' na meten.

⁶Lapas aijo' ia nambamo i pagan mesen aijo' anu mongahopi sasu kabete'an. Ia noliba'mo i ojannyo ka' salatan tinokamo aita' mae ingukunnyomo na aita' buannyo nu tumban, ko bolanyo totolu' na meten.

⁷Ihiku nu sabatan daka' ai-aijo' daagi' ko jalan ise-ise' sa'angu' poti-potimbiha' daagi' ko suo'nyo totolu' suele. Iwi-iwi' na suo'nyo haha aijo' pokakana na kodaka'nyo; sulapa' opat ka' ko mantannyo poti-potimbiha' totolu' na meten. Mesen anu mongga'at suo'nyo toto sa'angu' pokakana na ko butolunyo ohua' ka' mintonga' na meten. Jalan ise-ise' aijo' inantan mule' tinotolu' na meten ka' nokiijo'mo idasanyo daka-daka' anu mongahopi Laigan nu Tumpu. Mo'ane aijo' nongukunmo dasanyo daka-daka' aijo' ka' sinumbu'je taalu' ko bolanyo opat na meten; dasanyo kiijo' ipusnyo nu sabatan daka' sasu unonyo anu ohani hondo tiba Laigan nu Tumpu. Mesen anu mongahopi Laigan nu Tumpu ko butolunyo sa'angu' na meten.

⁸

⁹

¹⁰

¹¹Lapas aijo' mo'ane aijo' nongukunmo ko bolanyo nu jalan ise-ise' anu i sabatan daka' aijo'; anom ka' mintonga' na meten ka' mule' kobolanyo nu sabatan daka' aijo' olima' na meten.

¹²I ahop nu suo'nyo haha aijo' suele anu ukulannyo totolu' okali totolu' na meten aijo' daagi' ko mesen pinohede' anu kotangkasnyo ola mintonga' na meten ka' mule' ko butolunyo suele ola mintonga' na meten.

¹³Lantas mo'ane aijo' nongukunmo olotnyo lengkat mae i mesen sasu hikunyo sa'angu' na suo'nyo anu bau ponjaga'an tinoka-toka i mesen sasu hikunyo i suo'nyo anu bau ponjaga'an anu sasu sambiha'nyo 12,5 meten.

¹⁴Ia nongukun mule' dasanyo daka-daka' aijo': ko mantannyo sampulu' na meten. Sabatan nu dasanyo aijo' mokiijo' sasu popasan anu isambiha'nyo nu Laigan nu Tumpu.

¹⁵Olotnyo lengkat mae i sabatan daka' sasu sambiha'nyo toka-toka i mesen nu dasanyo daka-daka' aijo' i bahagian anu mongahopi Laigan nu Tumpu 25 na meten.

¹⁶I mesen anu sasu hikunyo ka' mesen anu mongga'at suo'nyo haha aijo' ko tolongannyo anu toto ise-ise'. Mesen haha aijo' anu i bahagian unonyo anu mongahopi jalan ise-ise' binunga-bungan nu ukilan kau' palem.

¹⁷Lapas mule' mo'ane aijo' nomboamo aku nontulu sabatan daka' nokiijo' i popasan anu isambiha'nyo nu Laigan nu Tumpu. Isambiha'nyo nu mesen anu montikubi Laigan nu Tumpu aijo binauan 30 na suo'nyo. I ahop nu suo'nyo haha aijo' sinaloan nu batu,

¹⁸anu montikubi iwi-iwi' na hatanyo aijo'. Popasannyo anu isambiha'nyo aijo' lebe hede' de opokakanakon tiba popasannyo anu i unonyo.

¹⁹Ikiijo' daagi' ko sabatan daka' sangga'at anu binau lebe matangkas ka' mule' kajalanan mokiijo' i popasannyo anu i unonyo. Mo'ane aijo' nongukunmo olotnyo nu ohu-ohua' na sabatan daka' haha aijo': 50 na meten.

²⁰Lapas mule' mo'ane aijo' nongukunmo sabatan daka' sasu utara anu montulu mokiijo' ihatanyo sasu unonyo.

²¹I sabatan daka' aijo' totototolu' na suo'nyo anu bau ponjaga'an poti-potimbiha' na jalan ise-ise' aijo', sinin na mesen anu mongga'at ka' mule' dasanyo daka-daka' aijo', iwi-iwi' pokakana na ukulannyo tiba anu kiijo' i sabatan daka' sasu kabete'an. Iwi-iwi' na jalan ise-ise' anu isabatan daka' aijo' ko mantannyo 25 meten ka' ko bolanyo 12,5 meten.

²²Ka' suele dasanyo daka-daka', iwi-iwi' na tolongannyo, ka' iwi-iwi' na ukilannyo aijo'mo kau' palem pokakana susumo anu kiijo' i sabatan daka' sasu kabete'an. Popitu' na langku-langku' nu ojan anu kajalanan mamba mokiijo' i sabatan daka' ai-aijo', ka' aijo' mae i puusnyo daagi' ko dasanyo daka-daka' anu mongahopi popasan anu i sambiha'nyo nu Laigan nu Tumpu.

²³Mengahopi sabatan daka' sasu utara daagi' mule' ko sabatan daka' sangga'at anu kajalanan mamba mokiijo' i popasan anu i unonyo pokakanamo susumo anu kiijo' isambiha'nyo nu sabatan daka' sasu kabete'an. Mian aijo' nongukun mule' olotnyo, nu ohu-ohua' na sabatan daka' ai-aijo'; 50 na meten.

²⁴Ka' mule' mo'ane aijo' nomboamo aku i sabatan daka' sasu salatan ka' nongukunmo. Sinumbu'je taalu' sabatan daka' aijo' pokakana susumo sabatan daka' haha aijo' sangga'at.

²⁵Tolongannyo i suo'nyo haha aijo' pokakana tiba anu daagi' i sabatan daka' haha aijo' sangga'at. Ko mantannyo nu jalan ise-ise' i sabatan daka' aijo' 25 meten, ka' ko bolanyo 12,5 meten.

²⁶Popitu' na langku-langku' anu bau kalambanan mokiijo' i sabatan daka' ai-aijo' ka' mule' dasanyo daka-daka' suele daagi' aijo' mae i puusnyo, mongahopi popasan sasu sambiha'nyo Laigan nu Tumpu. Mesen haha aijo' anu ibahagian unonyo anu mongahopi jalan ise-ise' binunga-bungan nu ukilan-ukilan kau' palem.

²⁷Ikiijo' daagi' suele ko sabatan daka' anu bau kalambanan mokiijo' i popasan sasu unonyo. Mo'ane aijo' no ngukunmo olotnyo nu ohu-ohua' na sabatan daka' ai-aijo'; 50 meten.

²⁸Ka' mule' mo'ane aijo' nomboamo aku nontulu sabatan daka' sasu salatan ka' ninsoopmo ipopasan sasu unonyo. Ia nongukunmo sabatan daka' sasu salatan aijo', ka' ukulannyo pokakanamo susumo sabatan daka' haha aijo' anu sasu sambiha'nyo.

²⁹Suo'nyo haha aijo' anu bau ponjaga'an, dasanyo daka-daka', ka' mesennyo haha aijo' anu i unonyo pokakanamo susumo anu daagi sabatan daka' haha aijo' sangga'at. Suo'nyo haha aiya i sabatan daka' suele ko tolongannyo ahi'. Jalan ise-ise' i sabatan daka' ko mantannyo 25 meten ka' ko bolanyo 12,5 meten.

³⁰

³¹Panyo dasanyo daka-daka' mongahopi popasan sasu sambiha'nyo. Mesen haha aijo' anu i bahagian unonyo mongahopi jalan ise-ise', suele ahi' binunga-bungan nu ukilan-ukilan kau' palem. Ualu' na langku-langku' nu ojan aijo' anu bau kajalanan mokiijo' i sabatan daka' aijo'.

³²Salatan ilapasmo na aijo' mo'ane ai-aijo' nomboamo aku nontulu sabatan daka' sasu kabete'an ka' ninsoopmo i popasan sasu unonyo. Ia nongukunmo sabatan daka' aijo' ka' ukulannyo pokakanamo susumo sabatan daka' haha aijo' sangga'at.

³³Suo'nyo haha aijo' anu bau ponjaga'an, mesennyo haha aijo' anu sasu unonyo tiba dasanyo daka-daka' ukulannyo sumomo suele anu daagi' i sabatan daka' haha aijo' sangga'at. Isuo'nyo haha aijo' tiba i dasanyo daka-daka' daagi' ko tolongannyo. Ko mantannyo nu jalan ise-ise' nu sabatan daka' aijo' 25 meten ka' kobolanyo 12,5 meten.

³⁴Dasanyo daka-daka' mongahopi popasan sasu sambiha'nyo. Mesennyo haha aijo' anu i bahagian sasu unonyo anu mongahopi jalan ise-ise', binunga-bungan nu ukilan-ukilan kau' palem. Ualu' na langku-langku' nu ojan aijo' anu bau kajalanan mokiijo' isabatan daka' aijo'.

³⁵Ahennyo mo'ane aijo' nomboamo aku isabatan daka' sasu utara. Ia nongukunmo sabatan daka' aijo' ka' ukulannyo pokakana susumo sabatan daka' haha aijo' sangga'at.

³⁶Ka' suele suo'nyo haha aijo' anu bau ponjaga'an, mesennyo haha aijo' anu sasu unonyo tiba dasanyo ko daka'nyo pokakanamo susumo anu kiijo' isabatan daka' haha aijo' sangga'at. I suo'nyo haha aijo' tiba idasanyo haha aijo' ko tolongannyo. Ko mantannyo nu jalan ise-ise' i sabatan daka' aijo' 25 meten ka kobolanyo 12,5 meten.

³⁷Dasanyo anu isasu ahopnyo suele ahi' mongahopi popasan sasu sambiha'nyo. Mesen haha aijo' anu bahagian unonyo anu mongahopi jalan ise-ise' binunga-bungan nu ukilan-ukilan kau' palem. Ualu' na langku-langku' nu ojan anu bau kalambanan mokiijo' isabatan daka' ai-aijo'.

³⁸Ipopasan sasu sambiha'nyo daagi' ko suo'nyo sa'angu' salaku pinontuangi sabatan daka' bahagian unonyo sasu utara. Lengkat i suo'nyo anu salaku pinontuangi aijo' daagi' ko sa'angu' na sabatan anu bau kalambanan mokiijo' idasanyo. Ikiijo'mo mae na pombaso'ian bintang-bintang anu okolobanakonmo opotunu.

³⁹Idasanyo aijo' daagi' ko meja' opat, toto ohua sambiha' ka' sambiha'. Aita' imeja' haha aijo' na pongkolotan binatang anu okolobanakon opotunu kabai koloban bau pohapusi dosa' kabai koloban pombolosi kalugi'an.

⁴⁰Isambiha'nyo nu dasanyo aijo' daagi' mule' ko meja' opat, toto ohu' sambiha' ka' sambiha' i sabatan daka' sasu utara aijo'.

⁴¹Jadi iwi-iwi'mo ualu' na meja' tampat pongkolotan anu bau koloban: opat sasu unonyo, ka' opat mule sasu sambiha'nyo nu popasan.

⁴²Opa-opat na meja' anu kiijo' i suo'nyo sala-salaku pinontuangi anu opake momposadia koloban anu opotunu meja aijo' batu na pina'at. Meja aijo' ko tangkasnyo mintonga' na meten, ka' sasu aita' ibawonyo sulapa' opat, komantannyo ka' kobolanyo pokakana tiga perempat meten. Aijo'mo imeja haha aijo' na pompo'una'an pakakas bau pongkolot binatang anu okolobanakon.

⁴³Panyo meja' haha aijo' kobingkainyo ka' kobolanyo 75 milimeten. Iwi-iwi' na antok nu binatang anu okolobanakon opotimpas imeja haha aijo'.

⁴⁴Lapas mule' mo'ane aijo' nomboamo aku ipopasan sasu unonyo. Ikiijo' daagi' ko laigan ohua', sa'angu' isohipi' nu sabatan daka' sasu utara ka' mongahopi salatan ka' sa'angu' mule' isohipi' nu sabatan daka sasu salatan ka' mongahopi utara.

⁴⁵Mo'ane aijo nompoto'imo mae hi belengku koonyo laigan anu mongahopi salatan aijo' pinosadia da bau kajojoongan nu to ima-imam anu mokalaja i Laigan nu Tumpu,

⁴⁶ka' mule' laigan anu mongahopi utara pinosadia da bau kajojoongan nu to ima-imam anu mokalaja imezbah. Iwi-iwi' na imam haha aijo' tionyo ahi' lee' i Zadok. Kalana hi tulunan mae nu bansa Lewi ola hi lee' i Zadok na timbali mangadap hi Tumpu mombau apaa na anu Nu palentahkon monsombah Ia.

⁴⁷Mo'ane aijo' nongukunmo popasan sasu unonyo. Ko ewanyo sulapa' opat: komantannyo tiba kobolanyo pokakana 50 meten. Laigan nu Tumpu aijo' sasu kinsoban ka' i ahopnyo daagi' komezbah sa'angu'.

⁴⁸Lapas aijo' binoanyomo na aku idasanyo anu sasu ahopnyo nu Laigan nu Tumpu ka' noliba' nokiita' nontulu pa' sangkuka na langku-langku' nu ojan. Ia nongukunmo dasanyo pipinsoopan aijo'; ko ewanyo tuju kali dua meten ka' mintonga' tibamo pimpi'nyo ohu-ohua' kobutolunyo sa'angu' ka' mintonga' na meten. Isasu koanan tiba kowinyo ko pentrasinyo. Dasanyo anu sasu ahop aijo' komantannyo sampulu' na meten ka' kobolanyo anom na meten.