Read Saluan YEHEZKIEL 42 Bible Online

YEHEZKIEL 42 - Saluan bible

YEHEZKIEL 42

¹Lapas mule' mo'ane aijo' nomboamo aku ipopasan sasu sambiha'nyo ka' nontakamo aku namba ilaigan sangga'at anu isasu utara Laigan nu Tumpu, madi' majo'on ilaigan daka-daka' anu isasu kinsoban Laigan nu Tumpu aijo'.

²Laigan aijo' komantannyo limampulu' na meten ka' kobolanyo uampulu' ka' olima' na meten.

³Sambiha' na laigan aijo' mongahopi gandalia anu kobolanyo sampulu' na meten aijo', ka' sambiha' mule' sangga'at mongahopi salo mesen anu isasu sambiha'nyo nu popasan. Laigan aijo' tolunsusun; toto sa'angu' na susunannyo gagana' tonsoop sasu unonyo nu liu-liu mokiijo' sasu unonyo na anu akaong i aluknyo.

⁴I ahop nu suo'nyo haha aijo' anu sasu unonyo daagi' ko jalan ise-ise' anu ko bolanyo olima' na meten ka' komantannyo limampulu' na meten. Sabatannyo iwi-iwi' mongahopi sasu utara.

⁵Suo'nyo iwi-iwi' anu isusunannyo sasu mokiita' lebe soki de obandingakon tiba suo'nyo anu akaong mae i aluknyo, kalana jalan toto ise-ise' i ahop nu suo'nyo anu sasu aita' mae lebe bola de obandingakon tiba anu akaong mae i aluknyo.

⁶Suo'nyo haha aijo' totolu' na susunannyo ka' madi' tinungkon nu to ohi-ohi' susumo laigan toto daka-daka' anu aijo' mompaha ohani.

⁷Sambahagian na susunannyo anu akaong i aluknyo anu mantannyo uampulu' ka ilima' na meten na ola ahi' susumo salaku mesen fundasinyo, panyo sangga'at anu daagi' komantannyo suele uampulu' ka' olima' na meten, pinaha bauanmo suo'nyo. Isusunannyo anu aita'mo mae hondo ko suo-so'nyo, iyamo ahi' komantan nu laigan aijo', aijo'mo na pinaha bauan suo'nyo.

⁹I aluknyo nu suo'nyo haha aijo' anu ipuusnyomo sasu kabete'an nu laigan ai-aijo', ka' mule' akaong mae i fundasinyo daagi' ko sa'angu' na sabatan anu bau kalambanan mokiijo' ipopasan sasu sambiha'nyo. Ibahagian sambiha' sasu salatan Laigan nu Tumpu daagi' ko laigan anu pokakana susumo aijo', madi' majo'on lengkat ilaigan anu isasu kinsoban.

¹¹I ahop nu suo'nyo haha aijo' daagi' kojalan ise-ise' sa'angu' anu pokakana susumo jalan ise-ise' isasu utara. Ukulannyo pokakana, potongannyo pokakana ka' suele sabatannyo iwi-iwi' pokakana.

¹²I aluknyo nu suo'nyo haha aijo' anu isambiha' sasu salatan aijo'mo ipuusnyo sasu kabete'an anu akaong mae ifundasinyo suele ahi' daagi' ko sabatannyo sa'angu'.

¹³Mo'ane aijo' notataemo mae hi belengku, “Ohu-ohua' na laigan aijo' susi'. Ikiijo'mo na to ima-imam anu timbali mangadap hi ahop nu Tumpu, mongkan koloban anu susi' hondo. Ikiijo'mo ahi' na pompo'una'an nu aha koloban anu susi' hondo, aijo'mo: koloban gandum tiba koloban pohapusi dosa' kabai koloban pombolosi lugi'.

¹⁴De to ima-imam lapasmo na mokalaja i Laigan nu Tumpu ka' kahanda'mo mamba ipopasan anu isambiha'nyo, saba' baju' anu samata-mata nu pusok nu aha de mokalajamo i Laigan nu Tumpu tionyo ahi' nu po una' nu aha isuo'nyo haha aijo'. Aha tionyoje ahi' mompusok baju' aijo' atina'je ka' aha mamba itampat kasihukan nu mian da'isan.”

¹⁵Nokolapas na mo'ane aijo' nongukun Laigan nu Tumpu sasu unonyo binoanyomo na aku isambiha'nyo nontulu sabatan daka' sasu kabete'an, lantas nongukunmo bahagian titikup Laigan nu Tumpu.

¹⁶Tokon pongukunnyo na binau pongukunnyo bahagian sambiha' sasu kabete'an: 250 meten.

¹⁷Lapas mule' ia nongukunmo bahagian sambiha' sasu utara, bahagian sasu salatan, tiba bahagian sasu kinsoban; toto sambiha' na bahagiannyo aijo' komantannyo pokakana aijo'mo; 250 meten.

²⁰Jadi daerah Laigan nu Tumpu nongakohimo tano' anu sulapa' opat, ukulannyo 250 meten toto sambiha' na bahagian. Tano' aijo' nu tikubi nu pagan mesen salaku bau pongga'at daerah anu samata-mata katokaan nu Tumpu tiba daerah anu bau katokaan nu mian da'isan.