Read Saluan YEHEZKIEL 43 Bible Online

YEHEZKIEL 43 - Saluan bible

YEHEZKIEL 43

¹Lapas mule' mo'ane aijo' nomboamo aku isabatan daka' anu mongahopi kabete'an,

² ka' ikiijo mae tinoangkumo na jingka anu jongkilaban hondo lengkat mae isasu kabete'an anu salaku tanda saba' Tumpu Israel tokamo mae. Potatae nu Tumpu ihongo sumomo ahi' buhok nu ndalangon, ka' mule' dunia najingkamo kalana jingka nu katokaanmo nu Tumpu.

³Anu tinoa aijo' pokakanamo susumo anu tinoangku tempo'nyo Tumpu tinoka mae nohansuni Yerusalem, ka' mule' pokakana susumo anu tinoangkumo i Kaunyo Kebar. Lantas aku tinolodadupumo ka' nonsombah.

⁴Jingka anu jongkilaban hondo aijo' nontulu mae sabatan daka' sasu kabete'an lantas ninsoopmo i uno nu Laigan nu Tumpu.

⁵Aku ihangkatmo nu Roh nu Tumpu ka' binoa-Nyomo na aku ipopasan anu sasu unonyo; ikiijo tinoangkumo na Laigan nu Tumpu sinaputmo nu jingka nu katokaan nu Tumpu.

⁶Tempo'nyo mo'ane aijo' daagi' tinjo-tinjo koko aku, ihongongkumo na Tumpu notatae hi belengku lengkat mae kiijo' i Laigan nu Tumpu, koo-Nyo,

⁷“O manusia anu madi' tumuu' batu, aiyamo na kajojoongan-Ku. Aiyamo na tampat kajojoongan-Ku itotonga' nu aha mian Israel ka' mompalentahmo aha sampe toka sidu-sidutu'. Maumo aha kabai to tomu-tomundo' nu aha, madi'mo daagi' mohumimi'i sanggong-Ku anu susi', nu saduakon nu aha monsombahmo pilogot kabai kalana mongkolobanakonmo bangke' nu to tomu-tomundo' nu aha itampat aiya.

⁸Naipuan mae tomundo' nu aha haha aijo' nombaumo buan nu aita' sabatan tiba ohi' nu sabatan nu laigan nu aha golo-golot ka' buan nu sabatan tiba ohi' nu sabatan nu Laigan-Ku, sahingga me sa'angu' na pimpi' na mongoloti. Aha nohumimi'imo sanggong-Ku anu susi' nu saduakon nu palabuatan nu aha anu okahegatimo. Kalana aijo' Ku silakaimo na aha nu tambuha'-Ku.

⁹Panyo otampu'uni uuka aiya aha tionyo ahi' bolimo daagi' monsombah pilogot ka' molalinmo ahi' bangke' nu to tomu-tomundo' nu aha. Lapas aijo' Aku jojoongmo ahi' itotonga' nu aha sampe toka sidu-sidutu'.”

¹⁰Lantas po ule'mo mae notatae na Tumpu, “O manusia anu madi' tumuu' batu, poto'i hi aha mian nu Israel, na Laigan-Ku aiya ka' pokau na aha da mompotutugakon apaa na anu tinanga'anmo nu aha. Obau na aha da mongoa'i ambang kalana dosa' nu aha iwi-iwi'.

¹¹Ka' salatan aha ma'ambangmo nunu saduakon nu palabuatan nu aha, atinaje' ka' poto'i mosia na montanga'i Laigan-Ku aiya na aha: potongannyo, iwi-iwi' na sabatannyo bau pinsoopan tiba posabatan, mosia na susunannyo nu laigan, iwi-iwi' na palentah tiba iwi-iwi' na atulannyo. Tulismo na iwi-iwi' aijo' da nu toongi nu aha da timbali nu toa nua aha ka' mompalahatikan mosia na mongatun iwi-iwi' aijo', ka' montuluti iwi-iwi' na atulannyo.

¹²Sumo uuka na anu ahi' saja' obau i Laigan nu Tumpu: Songko-songko na daerahnyo anu ibawo nu bungkutnyo susi' hondo.”

¹³ Sumo uuka na ukulan nu mezbah tiniho ikulan anu pinake nongukun Laigan nu Tumpu. Duhu-duhu' na tengke nu mezbah daagi' ko gotnyo koleengnyo mintonga' na meten ka' mule' kobolanyo suele mintonga' na meten, ka' sonibinyo sasu sambiha'nyo kotangkasnyo sa'angu' na meten obagi opat.

¹⁴Lengkat i got sampe mokiijo' i mezbah anu talalo akaong mae hondo i aluknyo, kotangkasnyo sa'angu' na meten. Bahagian itotonga'nyo kotangkasnyo ohua' na meten ka' mintonga' na meten lebe soki madi' pokakana tiba anu duhu-duhu' tengke nu mezbah. Bahagian kototolu'nyo, anu aita'mo mae itudunyo nu mezbah, suele ahi' mintonga' na meten lebe soki madi' pokakana anu duhu-duhuk bahagian totonga'nyo.

¹⁵Bahagian kototolu'nyo aiya aijo'mo na tampat pompotunuan koloban: kotangkasnyo ohua' na meten. Ipasu'nyo opa-opat daagi' daagi' ko anu manjuing mokiita' susumo tanduk.

¹⁶Tudunyo nu mezbah aijo' sulapa' opat; toto sa'angu' na sulapa'nyo ukulannyo anom na meten.

¹⁷Bahagian anu itotonga'nyo suele ahi' sulapa' opat, toto sa'angu' na sulapa'nyo ukulannyo popitu' na meten, ka' ko sonibinyo sasu sambiha'nyo duhu-duhu' sasu sambiha'nyo ko tangkasnyo sa'angu' na meten obagi opat. (Kobolanyo nu got mintonga' na meten.) Sulapa'nyo bahagian sasu kabete'an daagi' ko ojannyo anu mokiita' itudunyo nu mezbah.

¹⁸ Tumpu Anu Matangkas na Kuasanyo notataemo mae hi belengku, “O manusia anu madi' tumuu' batu, potombihing mae apaa na anu Ku poto'i hi beleyum. De mezbah aijo' lapasmo na obau, beleyum tionyo ahi' montahbiskanmo, mompake koloban anu opotunu aijo' ka' opipi'i nu baso'nyo anu kinolobanakonmo na mezbah aijo'.

¹⁹Ola ahi' imam lee' mae i Zadok anu lee' mae nu tulunan nu bansa Lewi na timbali toka mae i ahop-Ku mongatun palasombahan osombahkon. Aku, Tumpu Anu Matangkas na Kuasanyo na nompalentahkonmo han aijo'. Bee'i na aha sa'angu' na sapi' mo'anenyo anu daagi' bata'nyo da bau koloban pongampuni dosa'.

²⁰Ala na baso'nyo sangkiding ka' sapuakon itanduk haha aijo' anu opa-opat ipasu'nyo anu aita' mae itudunyo nu mezbah ka' suele ipasu'nyo haha aijo' bahagian sasu unonyo ka' mule' iduhu-duhu'nyo nu mezbah aijo'. Tiba jalan sumo aijo' na beleyum momposusi'mo mezbah aijo' ka' samata-mata Akumo na tumpunyo.

²¹Lapas aijo' alamo na sapi' lakinyo da bau pohapusi dosa', potunumo itampat anu tinantukanmo, anu isambiha'nyo nu Laigan nu Tumpu anu susi'.

²²Dodop mule' beleyum tionyo ahi' monsombahkon sa'angu' na mee' lakinyo anu madi' ko kulangnyo apa-apaa da bau koloban pongampuni dosa'. Posusi' na mezbah aijo' nu baso' nu mee' aijo' susumo beleyum nombaumo sapi' lakinyo anu daagi' bata'nyo aijo'.

²³De lapasmo na beleyum mombau aijo', alamo na sapi' sa'angu' anu daagi' bata'nyo tiba sa'angu' na mee' anu daagi' bata'nyo ohu-ohua' aijo' anu madi' ko kulangnyo apa-apaa,

²⁴lantas boamo mae hi beleng-Ku. To ima-imam tionyo ahi' mongkakambuhimo nu timuson hi binatang haha aijo'ohu-ohua' ka' otunuimo ka' aijo' timbalimo koloban anu osombahkonmo mae hi beleng-Ku.

²⁵Sansina-sinaa kopinnyo ipitun, na beleyum tionyo ahi' mongkolobanakon sa'angu' na mee', sa'angu' na sapi' lakinyo anu daagi' bata'nyo ka' mule' mee' lakinyo bau koloban pohapusi dosa'. Binatang haha aijo' madi' timbali ko apa-apaanyo.

²⁶Pitunsinaa na to ima-imam tionyo ahi' mombau atulannyo montahbiskan mezbah aijo' ka' momposadia da timbali opake.

²⁷Salatan lapasmo pitunsinaa na nosadia to ima-imam tionyomo ahi' montampu'unimo monsombahkon koloban aijo' i mezbah, koloban anu opotunu tiba koloban anu bau pompodame kona hi aha mian. Sahingga Aku sanangmo hi belemiu iwi-iwi'. Aku, Tumpu Anu Matangkas na Kuasanyo notataemo.”