Read Saluan YEHEZKIEL 46 Bible Online

YEHEZKIEL 46 - Saluan bible

YEHEZKIEL 46

¹Tumpu Anu Matangkas na Kuasanyo notatae, “Sabatan daka' sasu kabete'an anu kalambanan mokiijo' ipopasan sasu unonyo tataap otumban kopinnyo anon sinaa tempo' opake mokalaja. Sabatan daka' aijo' ola timbali otuhea'akon de sinaamo nu Sabat tiba de Molame'akonmo Bitu'on Bu'ou.

²Isinaa haha aijo' anu balakuasa tionyo ahi' minsoop mae montulu popasan anu isambiha'nyo montulu dasanyo lantas tuminjomo koko ohi' nu sabatan daka' hau-haunyo aijo' to ima-imam monsombahkonmo koloban anu opotunu tiba koloban paladamean anu binee' mae nu anu balakuasa. Isabatan daka' aijo' ia tolodadupumo ka' monsombah Tumpu, lantas mambamo. Lapas aitu sampe toka pihi sabatan daka' aijo' madi' timbali otumban.

³I ahop nu sabatan daka' aijo' na suele ahi', iwi-iwi' na mian da'isan tionyo suele tolodadupu monsombah Tumpu de sinaamo nu Sabat ka' de Molame'akonmo Bitu'on Bu'ou.

⁴Kakona isinaamo nu Sabat anu balakuasa tionyo ahi' monsombahkonmo koloban hi Tumpu anu opotunu ngangahannyo aijo'mo anom na anak nu domba ka' mule sa'angu' na domba lakinyo, iwi-iwi' aijo' anu madi' kokulangnyo apa-apaa.

⁵Tiba domba lakinyo aijo' tionyo mule' ahi' osombahkon koloban gandum konjoo'nyo 17,5 liter ka' mule' tiba anak nu domba toto sa'angu' tionyo mule' ahi' osombahkon koloban gandum konjoo'nyo yayamo anu okahanda'i. De monsombahkonmo koloban gandum tionyo ahi' ogampai nu lanya' nu zaitun totolu' na liter na suele osombahkon.

⁶Kakona Molame'akonmo Bitu'on Bu'ou anu osombahkon aijo' tionyo ahi' sapi' sa'angu' lakinyo, anom na anak nu domba ka' sa'angu' na domba lakinyo iwi-iwi' aijo' anu madi' kokulangnyo apa-apaa.

⁷Tiba sapi' lakinyo ka' mule' mee' lakinyo ia tionyo monsombahkon mule' ahi' gandum konjoo'nyo 17,5 liter bau ponggampai toto sa'angu' na sapi', ka' mule' toto sa'angu' na anak nu domba yayamo anu okahanda'i na konjoo'nyo nu gandum. De mongkolobanakonmo gandum tionyo ahi' ogampai totolu' na liter lanya' nu zaitun na suele osombahkon.

⁸De aha anu balakuasa kahanda' monsombah mae i Laigan-Ku, ia tionyo ahi' minsoop montulu dasanyo, ka' mule' de minsusule'mo po ule' ahi' montulu jalan ai-aijo'.

⁹Panyo mule' de tokamo na sinaa daka' anu olame'akon, saba' mian da'isan de toka mae monsombah Tumpu aha anu minsoop montulu sabatan daka' sasu utara, ka' de minsusule'mo tionyo ahi' montulumo sabatan daka' sasu salatan de aha lapasmo na monsombah. Ka' de aha anu ninsoop nontulu sabatan daka sasu salatan, saba' aha minsusule' montulumo sabatan daka' sasu utara. To mia-mian madi' timbali opobee' na minsusule' po ule' montulu jalan anu momona tinulunyo mae; aha tionyo ahi minsusule' montulu sabatan daka' anu aijo' mae isambiha'nyo.

¹⁰Anu balakuasa tionyo ahi' minsoop i Laigan nu Tumpu hingga-hinggat tiba mian da'isan ka' mule de minsusule'mo tionyo ahi' po ule' mohingga-hinggat.

¹¹Kakona mombau-bauonmo ka' molameanmo suele ahi' sapi' lakinyo ka' domba lakinyo toto sa'angu' tionyo ahi' ogampai 17,5 liter na gandum ka' mule' toto sa'angu' na anak nu domba yayamo anu nu kahanda'i nu mian anu monsombah. De monsombahkonmo koloban gandum tionyo ahi' ogampai nu lanya' nu zaitun na osombahkon.

¹²De anu balakuasa kahanda' mombee' palasombahan kasanangan nu kinyonyoa hi Tumpu maumo salaku koloban anu opotunu kabai koloban paladamean, saba' sabatan daka' sasu kabete'an anu bau kalambanan mokiijo' ipopasan anu i unonyo tionyo ahi' otuhea'akonmo da pinsoopannyo mae. Ia tionyo ahi' monsombahkon koloban susumo anu binaunyomo i sinaa nu Sabat panyo salatan minsusule'mo na ia, sabatan daka' aijo' sampamo ahi' otumban.”

¹³Tumpu notatae, “Sansina-sinaa salatan subu-subumo, sa'angu' na anak nu domba anu umunnyo sataunmo ka' mule' anu madi' kokulangnyo apa-apaa, aijo' na tionyo osombahkon bau koloban anu opotunu bau palasombahan hi Tumpu.

¹⁴Ka' mule' sangga'at de subu-subumo tionyo ahi' osombahkon suele ohua' na kilogram na gandum tiba sa'angu' na liter na lanya' nu zaitun da opogalo' i gandum aijo'. Aijo'mo na koloban gandum anu sansina-sina osombahkon hi Tumpu; atulan aijo' saja' opake sampe toka sidu-sidutu'.

¹⁵Salatan subu-subumo tionyo ahi' saja' osombahkon hi Tumpu: sa'angu' na anak nu domba, koloban gandum tiba lanya' nu zaitun.”

¹⁶Tumpu Anu Matangkas na Kuasanyo nombee'imo palentah, Ia notatae, “De anu balakuasa mompalentah mombee'imo sambagian na tano' pusaka'nyo hi samian na anaknyo mo'ane, tano' aijo' timbalimo anu nu anaknyo ka' jadimo halata' nu auannyo.

¹⁷ Panyo de anu balakuasa aijo' mombee'imo sambagian na tano' pusaka'nyo hi samian na posaihonnyo, tano' aijo' po ule' mae minsusule' hi tumpunyo anu balakuasa aijo' de tokamo i Taun Ponsule'akonanmo. Tano' aijo' anunyomo ka' ola ahi' ia tiba to ana-anaknyo to momo'ane na timbali montumpui sidu-sidutu'.

¹⁸Anu balakuasa madi' timb-Kli mongala halata' pusaka' nu layatnyo. Ola ahi' tano'nyo na timbali nu bee' hi to ana-anaknyo toto momo'ane sahingga madi' kosamian na mian anu palesayamo hi belengku timbali oga'at tiba haknyo anu ia na tumpunyo.”

¹⁹Lapas mule' mo'ane aijo' nomboamo aku, nontulu sabatan anu isohipi' nu sabatan daka' nambamo nokiijo' isuo'nyo anu susi' haha aijo' mongahopi sasu utara. Suo'nyo haha aijo' pinosadia da bau pokalajan nu to ima-imam. Mo'ane aijo' nompotoamo dasanyo anu ipuusnyo sasu kinsoban,

²⁰ka' notatae, “Itampatmo aiya na pongkulukian nu to ima-imam, koloban pohapusi dosa' tiba koloban pombolosi lugi' ka' pontunuan koloban gandum, da maumo ola sangkiding na koloban anu susi' madi'mo daagi' oboa ipopasan anu isambiha'nyo dumo monsilakai mian da'isan.”

²¹Lapas aijo' aku binoanyomo ipopasan sasu sambiha'nyo ka' pinotoanyomo mae hi belengku taalu' opa-opat na pasu'nyo haha aijo' toto sa'angu' daagi' kopopasannyo anu lebe ise', komantannyo 20 meten ka' kobolanyo 15 meten.

²³Toto sa'angu' na popasannyo aijo' tinikuban nu pagan mesen batu ka' aijo' ipagan mesen haha aijo' daagi' kotolukunnyo.

²⁴Koonyo nu mo'ane ai-aijo' hi belengku, “Aiyamo na polu' haha aiya tampat nu to ima-imam anu mokalaja i Laigan nu Tumpu mongkuluki koloban-koloban anu nu sombahkon nu mian da'isan.”