Read Saluan YEHEZKIEL 47 Bible Online

YEHEZKIEL 47 - Saluan bible

YEHEZKIEL 47

¹ Mo'ane aijo' nomboa mule' aku isabatan pinsoopan mokiijo' i Laigan nu Tumpu. Aku nontoamo uee mo ili lengkat mae akaong i aluk nu sabatan aijo' mamba isasu kabete'an, susumo suele Laigan nu Tumpu mongahopi sasu kabete'an. Uee aijo' mo ili lengkat mae akaong i aluk nu sabatan Laigan nu Tumpu bahagian salatan montulu sulapa'nyo sasu salatan nu mezbah.

²Lapas mule mo'ane aijo' nomboamo aku nosabat ka' nonsahak sabatan daka' sasu utara ka' nontaka'mo aku namba isabatan daka' sasu kabete'an. Kaunyo ise-ise' aijo' no ili lengkat mae isulapa'nyo sasu salatan sabatan daka' aijo'.

³Batuk mongukun nu tokon bau-bau pongukunnyo, mo'ane aijo' nomboamo aku nombatukimo uee aijo' no ili namba sasu kabete'an kojo'onnyo 500 na meten lantas pinokaunyomo na aku da motaapmo. Itampat aijo' ueenyo ola toka ibulansing na koleengnyo.

⁴Lapas aijo' ia nongukun mule' 500 meten na kojo'onnyo ka' ikiijo' ueenyo toka ibuku na koleengnyo. Ia po ule' mule' nongukun 500 meten na kojo'onnyo ka' ikiijo' ueenyo tinokamo ilampeokan.

⁵Po ule' mule' ia nongukun 500 na meten na kojo'onnyo ka' ikiijo' maleeng hondo madi'mo opoko ala ojalani nu tengke. De mian motaap tionyo ahi' ia lumangu.

⁶Lantas mian aijo' notataemo mae hi belengku, “O manusia anu madi' tumuu' batu, palahatikan ima-ima' na aiya iwi-iwi'.” Lapas aijo' po ule'mo aku binoanyo ninsusule' nontusakonmo kaunyo aijo',

⁷ka' tinoangkumo taalu' poti-potimbiha' na sonibi nu kaunyo aijo' manjoo' hondo na kau'.

⁸Ia notataemo mae hi belengku, “Kaunyo aiya mo ili mamba isasu kabete'an montulu lipu' aiya ka' mule' montulu Bangka'nyo nu Kaunyo Yordan ka' mompanjolongimo mamba i Ambai Mate, sahingga ambai anu mapakat nu timuson aijo' binolosannyomo nu uee anu matawas.

⁹Maumo pa' moya na kaunyo aijo' mo ili, ikiijo' daagimo ko i kannyo anu mongangahan ka' suele binatang sangga'at. Ambai Mate nu potimbalimo matawas, ka' maumo pa' moya na po ilian nu uee aijo' ikiijo' daagi'mo ko kantumuu'an.

¹⁰Lengkat mae i mata nu uee anu kiijo' i En-Gedi toka-toka i mata nu uee anu kiijo' i En-Eglaim, ibahagian sonibinyo lame'mo nu to mia-mian anu mompagala ikan kalana aha montimpa'imo buani' nu aha ikiijo'. Iwi-iwi na ngahan nu ikan jojoongmo iuno nu uee aijo' susumo kiijo' i Ambai anu i Totonga'nyo.

¹¹Panyo uee anu itampalang tiba luap nu nomangan anu itutus sonibi nu ambai aijo' na madi' ahi' jadi matawas panyo tataap ahi' salaku polengkatan mae nu timuson.

¹² Tutus poti-potimbiha' na sonibi nu kaunyo aijo' tinumuu'mo na ngangahan nu kau' anu okaan nu bua'nyo. Honnyo nu kau' aijo' madi' toho' magayou ka' bua'nyo madi' kokamingkotannyo. Kau' haha aijo' saja' mimbua' bua'nyo anu salaje mule' sambitu'on toka sambitu'on, kalana uee anu monguei nolengkat mae i Laigan nu Tumpu. Bua'nyo haha aijo' timbali kaanon ka' honnyo mule' haha aijo' mingguna bau pakuli'.”

¹³Tumpu Anu Matangkas na Kuasanyo notatae, “Aiya na potempasan nu tano' haha aijo' anu obagi-bagiakon hi aha sampulu' ka' ohua' na tulunan nu bansa Israel. Tulunan nu bansa i Yusuf nohumpak ohua' na bahagian.

¹⁴Aku binasumpa'mo saba' tano' aijo' Ku bee'mo hi mompolee' nu beleyum. Kalana aijo' alamo na tano' aijo' ka' bagi adi-adin hi bubuu' belemiu.

¹⁵Potempasannyo isasu utara lengkat pe'e mae i Ambai anu i Totonga'nyo mompanjolongi mokiijo' sasu kabete'an toka-toka i kota' Hetlon, mompatui Hamat ka' lau-laus mamba i kota' Zedad,

¹⁶mamba i Berota tiba Sibraim (kota' haha aijo' i olot nu kota' Damsyik tiba kota' Hamat), lapas aijo' nokiijo'mo i kota' Hazar-Enan, anu ipotempasan nu kota' Hauran.

¹⁷Jadi potempasan sasu utara lengkat pe'e mae i Ambai anu i Totonga'nyo toka-toka isasu kabete'an, kota' Hazar-Enan; sahingga daerah Damsyik tiba Hamat kinonamo isasu utara ipotempasan aijo.

¹⁸Potempasan isasu kabete'an mompanjolongi sasu salatan sa'angu' na tampat olot nu daerah Damsyik tiba daerah Hauran. Jadi Kaunyo Yordan salakumo potempasan olot nu tano' Israel sasu kinsoban ka' Gilead isasumo kabete'an, toka-toka i Tamar anu i sonibi nu Ambai Mate.

¹⁹Potempasan isasu salatan mompanjolongi barat daya, lengkat mae i Tamar mompanjolongi mata nu uee Kades-Meriba lantas mompanjolongimo barat laut montusakon potempasan nu Mesir toka-toka i Ambai anu i Totonga'nyo.

²⁰Potempasan isasu kinsoban binatukakonmo i Ambai anu i Totonga'nyo lantas mompanjolongimo sasu utara lau-laus i sa'angu' na tampat anu isasu kinsoban jalan mamba i Hamat.

²¹Bagimo na tano' aijo' hi belemiu iyamo ahi' konjoo'nyo nu to tulu-tulunan nu bansang Israel;

²²ka' tano' aijo' timbalimo belemiu na tumpunyo sampe toka sidu-sidutu'. Aha mian anu lengkat mae isalipu'an anu jojoongmo tataap atina' hi belemiu, ka' ko anakmo anu ihampe itina', tionyo ahi' suele mohumpak bahagian tano' aijo'. Aha o'anggapmo ahi sa'a-sa'angumo na bansa tiba bansa Israel, ka' aha suele mohumpakmo ahi' undian da timbali mohumpak tano' de mombagimo tano' na to tulu-tulunan nu bansa Israel.

²³Batu-batu mian anu lengkat mae isalipu'an tionyo ahi' obee'i tano' pokakana sumo tulunan nu bansa Israel kakona pa' iya na kajojoongannyo. Aku, Tumpu Anu Matangkas na Kuasanyo notataemo.”