Read Saluan YEHEZKIEL 6 Bible Online

YEHEZKIEL 6 - Saluan bible

YEHEZKIEL 6

¹Tumpu notataemo mae hi belengku,

²“O, manusia anu madi' tumuu' batu tonto'i mokiita' na to bungku-bungkutnyo nu Israel ka' poto'i na potuunon-Ku aiya aha ohukumo.

³Palentah na aha da mompotombihing mae ka' mompalahatikan apaa na anu Ku poto'i, Aku Tumpu Anu Matangkas na Kuasanyo mompoto'i hi bungkutnyo haha aita' ka' hi to kele-keles ka' hi to bangka-bangka'nyo. Totu-totu'unyo Ku saimo na bajak da mohansunimo iwi-iwi na tampat ponsomban pilogot.

⁴Iwi-iwi' na mezbahnyo otua'akonmo ka' mule' anu sola' pompapuan kamangian opahambiha'akonmo. Iwi-iwi' na mian anu ikiijo' opateimo i ahop nu pilogotnyo.

⁵Ku paha potatabumo na bangke' nu aha Israel ka' mule' santo buku-buku nu aha Ku taumo i mezbah haha aijo'.

⁶Iwi-iwi' na kota' nu aha Israel ohansunimo, iwi-iwi' na mezbah tiba pilogotnyo o'ideimo ka' oposungkehetmo, anu sola'pompapuan kamangian obiha-biha'mo, ka' mule' iwi-iwi apaa na anu binaumo nu aha madi'mo daagi' otoa.

⁷Iyaya mae daagi' ko anu opatei, ka' aha anu daagi' tumuu' monsumbu'je taalu' Akumo ahi' na Tumpu.

⁸Daagi' sangkiding na bagian na Ku potumuu' na aha madi opatei panyo aha oga'a-ga'atakonmo mamba hi bansa-bansa sangga'at;

⁹ikiijo' mae aha tumuu'mo ipinomboan ka' pinompojoongan. Lantas aha tonginau'mo mae hi beleng-Ku ka' mangalati'mo taalu' Aku nohukumo ka' nompopo ambangmo aha kalana kinyonyoa nu aha madi'mo tinulu-tulutan hi beleng-Ku. Aha nohikumo Aku ka' nompile'imo pilogot salaku bau pombolosi nu aha Aku. Lantas aha monguahi mo na mongoa'i posi butong nu aha kalana palabuatan ma'idek ka' anu moko pahumimi' bibinaumo nu aha.

¹⁰Jadi nu sumbu'je nu aha taalu' Akumo ahi' nu Tumpu ka' mule' iwi-iwi' na pokinde anu binee'-Kumo hi aha misa' ola samata-mata bau pompahatakut anu madi' ko gunanyo.”

¹¹Tumpu Anu Matangkas na Kuasanyo notataemo, “Lasaimo na kasusa'an! Polotando'mo, Haangmo moli-molibos kalana iwi-iwi' na palabuatan ma'idek ka' anu moko pahumimi' bibinaumo nu bansa Israel. Aha silakamo kalana lewa' mahampate, kalana madi'mo ko anu okaan tiba panyakit anu molele.

¹²Aha iwi-iwi' mongoa'imo tambuha'-Ku anu taha-tahahumo. Aha tomia-mian anu majo'on kiijo' mae i pinomboan ka' pinompojoongan masakitmo lantas silakamo; anu aiya ohani silakamo kalana mahampate, ka' tuha'nyo silakamo kalana madi'mo ko anu okaan.

¹³Bangke' nu mian anu singkapmo sinilaka motanatamo aijo' itampat-tampat bapilogotan tiba itampat-tampat mezbah, ka' mule sika-sika timpasmo aita' i puge'nyo toto tangka-tangkas, ka' mule' aita' ibawo nu bungkutnyo, ka' mule' ipatuu nu kau' anu toto tambo-tambok na honnyo, ka' mule' i patu nu kau' anu toto daka-daka' na batangnyo, o'alamo kodo-kodo' na sisik, iyaya mae na tampat anu sola' pontunuan nu aha koloban anu nu sombahkon nu aha hi pilogot. Sahingga toto samian monsumbu'je taalu' Akumo ahi' na Tumpu.

¹⁴Memang Ku tangkakonmo na limang-Ku ka' mohansunimo lipu' nu aha, sahingga timbalimo liing hondo lengkat pe'e mae itampat anu Mateges sasu Salatan toka-toka ikota' Ribla anu isasu utara. Itampat-tampat anu nu jojoongi nu aha mian Israel madi' ko samian na anu oposalamat. Sahingga nu sumbu'je nu aha mian iwi-iwi' taalu' Akumo ahi' na Tumpu.”