Read Saluan YEHEZKIEL 7 Bible Online

YEHEZKIEL 7 - Saluan bible

YEHEZKIEL 7

¹Tumpu notataemo mae hi belengku,

²“O, manusia anu madi' tumuu' batu, Aku Tumpu Anu Matangkas na Kuasanyo montaloakonmo sumo uuka hi aha tano' nu Israel; Uukamo na kamingkotan nu sisiknyo nu lipu' aiya!”

³Tumpu notatae, “O, Israel, uuka aiya tinokamo na ka ahenannyo nu beleyum. Beleyum mongoa'imo tambuha'-Ku. Kuputusimo na hukuman nu beleyum sitimbang tiba palabuatan nu beleyum mahu-mahumimi' atina'.

⁴Aku madi'mo daagi' molibos kabai mongampuni beleyum. Aku mohukumo beleyum sitimbang tiba iwi-iwi na palabuatan mahu-mahumimi' nu beleyum atina'. Sahingga nu sumbu'je nu beleyum taalu' Akumo ahi' na Tumpu.”

⁵Sumo uuka na anu tinaloakonmo nu Tumpu Anu Matangkas na Kuasanyo hi bansang Israel, “Balaa' mobolo-bolosmo mae na montokai beleyum.

⁶Uuka aiya iwi-iwi' sinampemo. Uukamo aiya na ka ahenannyo nu beleyum. Madi'mo daagi' ko anu otaha'imani nu beleyum.

⁷Iwi-iwi' sinampemo na tempo'nyo hi beleyum, o, bansa anu jojoong itano' aiya. Uuka aiya madi'mo daagi' sola' mombau bau-bauon itampat-tampat mezbah anu aita' mae i bungkutnyo, anu daagi' memo ahi' pahampatean.

⁸Madi'mo daagi' pin na belemiu mongoa'imo tambuha'-Ku anu taha-tahahumo. Ku putusimo na hukuman nu beleyum sitimbang tiba palabuatan nu beleyum. Ku balosakonmo hi beleyum iwi-iwi na palabuatan nu beleyum anu talalo mahumimi'.

⁹Aku madi'mo daagi' molibos kabai mongampuni beleyum. Aku mohukumo beleyum sitimbang tiba palabuatan iwi-iwi' anu mahumimi' bibinaumo nu beleyum. Sahingga nu sumbu'je nu beleyum taalu' Akumo ahi' na Tumpu ka' mule' Akumo ahi' na mohukum beleyum.”

¹⁰Sinaa katokaan mae nu balaa' bansa Israel tinokamo. Kasinggian nu mompalentah jadimo iyaya mae. Kasombongan nu mian mompaka jadimo.

¹¹Kasinggian mompalentah mongahenanmo lebe manjoo' mule' na palabuatan anu ma'idek. Iwi-iwi' na kakaya'an, kaholomatan tiba kakaya'an nu aha mingkotmo madi'mo daagi' ko apa-apaanyo.

¹²Tempo'nyo malia'mo toka, sinaanyo ingohanimo! Mian anu mongoli tiba mian anu mompobaluk madi'mo daagi' ko anu opihumpa-humpak na ka untungannyo, kalana hukuman nu Tumpu mongkonamo iwi-iwi' na mian.

¹³Madi' ko padagang anu daagi' po ule' mohumpak apaa na anu pinobaluknyomo, kalana tambuha' nu Tumpu mongkonamo iwi-iwi' na mian maumo pa' ihe. Mian anu ma'idek na palabuatannyo madi' mohumpak kasalamatan.

¹⁴Tolompet ingumonyi'mo ka' iwi-iwi' na mian nosadiamo. Panyo mau pe'e samian madi' ahi' ko anu namba nahampate itampat pahampatean, kalana tambuha' nu Tumpu nongkonamo iwi-iwi' na mian.

¹⁵I songko-songko na jalan daagi' ko pahampaten, isongko-songko na laigan daagi'mo ko panyakit anu molele ka' madi'mo ko anu okaan. Maumo pa' ihe na anu isambiha' nu kota' saidi' mae silakamo i uno nu pahampatean ka' anu jojoong i kota' silakamo nu panyakit ka' silakamo nu ohop.

¹⁶Sambagian na tumuu' ahi' ka' mopalaimo mamba ibungkutnyo. Ikiita' mae aha sumomo to tomo-tomonsi' dara anu ilaa'mo lengkat mae isongko-songko na bangka'nyo; iwi-iwi' mohehengakonmo dosa-dosa' nu aha.

¹⁷Toto samian lundengmo na limanyo ka' ludokmo na bukunyo.

¹⁸Aha mompusokmo hude kalung ka' songko-songko nu aha langkakatanmo. Ubak nu aha singkapmo okiismo ka' mule' aha opopo ambangmo.

¹⁹Mosoni' tiba salaka nu alinmo nu aha ijalan susumo duhehe, kalana de tokamo na sinaanyo Tumpu mompotudunmo tambuha'-Nyo, mosoni' tiba salaka aijo' madi' moko ala momposalamat aha, pakalaus aijo'mo na nontua aha i uno nu dosa'. Aha madi'mo moko ala monggunakon aijo' da mompopuas napisu nu aha kabai bau pongisi kompong nu aha.

²⁰U'utu mae aha binulonmo nu mainan nu aha anu toto ima-ima', panyo kalana aijo' nu pake nu aha bau bapilogotan haha aijo' anu okahegati, sahingga Tumpu nompojadimo halata' hu aha aijo' da tinimbali anu okabuhuk.

²¹Tumpu notataemo hi aha bansang Israel, “Ku pojohokmo na to mia-mian anu isalipu'an mae montololangi belemiu. Mian anu toto ide-idek na palabuatannyo mompahuhuakonmo halata' nu belemiu ka' mohumimi'imo.

²²Aku madi'mo daagi' montulungi de maluanyo Laigan-Ku o'ideimo ka' ohumimi'imo nu to tolo-tololang.

²³Iwi-iwi' na lipu' kalangkabutmo; iyaya mae daagi'mo ko anu opatei ka' singkapmo singgi.

²⁴To bansa-bansa anu toto sisinggi hondo Ku potokamo mae da monjojoongimo laigan nu belemiu. Mian anu toto babaani hondo atina' hi belemiu langkakatanmo de maluanyo bansa-bansa haha aijo' Ku pojohokmo mohansuni tampat-tampat ponsomban mae nu belemiu Aku.

²⁵Aha nu tokaimo mae nu kasusa'an ka' madi'mo ko anu otaha'imani, lantas moliomo kadamean panyo madi' nu kabot nu aha.

²⁶Balaa' tiba lele ma'idek saja'mo toka mae hi aha. Belemiu mongkakasemo da to nabi-nabi mongkila-kilamo pa' apaa na jadi saidi' mae panyo aha madi' ahi' moko ala. Ka' suele aha to ima-imam madi'mo daagi' ko apa-apaa anu opogulu'akon hi aha mian, ka' mule' to pola-polaya' iningkotmo na pokinde' nu aha.

²⁷Itomundo' tumando'mo na lewa' humang, anak mo'ane nu tomundo' madi'mo ko anu otaha'imani ka' mule aha mian da'isan lengkatanmo bau nu buhuk. Aku mohukumo beleyum sitimbang tiba palabuatan iwi-iwi' nu beleyum ka' momputusimo hukuman nu beleyum susumo belemiu mombee'i hukuman hi mian sangga'at. Sahingga nu sumbu'je nu beleyum taalu' Akumo ahi' na Tumpu.”