Read Saluan YEHEZKIEL 9 Bible Online

YEHEZKIEL 9 - Saluan bible

YEHEZKIEL 9

¹Lapas aijo' Tumpu Allah notataemo daka-daka', “Po uukamo mae o, tomia-mian anu montalimamo hukuman-Ku ikota' aiya. Boa mae na iwi-iwi' na toongon nu belemiu anu bau pahampate.”

²Lia-lia tinokamo mae na mian aha anom lengkat mae isambiha' nu sabatan daka anu sasu Utara Laigan nu Tumpu, toto samian nomboa mae toongon bau pahampate. Hingga-hinggat mae tiba aha daagi' ko mian baju'nyo hude lenan ka' nomboa mae anu bau pontulisan. Aha ninsoopmo ka' tinuminjo koko mezbah tambaga.

³Lantas jingka anu majingka hondo salaku tanda Tumpu nu Israel tinokamo, jingkanyo lengkat mae aijo' hi to mala-malaekat, lantas nolalinmo namba i sabatan pinsoopan i Laigan nu Tumpu. Lantas ilagamo nu Tumpu na mian anu nompusok hude lenan aijo' ka' Ia notatae,

⁴ “Lako' songkohi na kota' aiya ka' obee'i tanda isiakan nu aha toto samian na anu nongoa'imo kasusa'an kalana palabuatan anu okahegati bibinaumo nu aha ikota' aijo'.”

⁵Ihongongku na Tumpu notatae hi mian sangga'at, “Batuki na ia mamba isongko-songko na kota' ka' pateimo na mian madi' timbali o, ampuni.

⁶Pateimo na to momo'ane iwi-iwi' tiba to bou-boune, anu to tu'a-tu'anyomo tiba to ana-anak. Panyo boli mompoposia mian anu binee'anmo tanda isiakonnyo. Donganmo tampu'uni lengkat i, aiya, lengkat i Laigan-Ku aiya.” Sahingga aha nontampu'unimo nompojalan palentah anu binee'mo hi aha, aha nompateimo to pola-polaya' nu Israel anu hau-haunyo aijo' tinjo-tinjo i Laigan nu Tumpu.

⁷Tumpu notataemo hi aha, “Humimi'imo na Laigan-Ku aiya! Pobuke'imo na popasannyo haha aiya nu bangke' nu manusia. Donganmo tampu'uni!” Sahingga aha nontampu'unimo nompatei to mia-mian anu i uno nu kota'.

⁸Tempo'nyo aha lewa' pinatean aijo' aku sausa'ku daagi' ikiijo'. Aku tinolodadupumo ka' notataemo daka-daka', “O, Tumpu Anu Matangkas na Kuasanyo, taalu' sumo atina' na Belento nontambuha'imo Yerusalem sahingga Nu pateimo iwi-iwi' na mian anu daagi' aiya i Israel?”

⁹Tinaaman nu Tumpu, “Aha to mia-mian nu Israel tiba Yehuda nombaumo dosa' anu daka' hondo. Aha nompateimo isongko-songko na tampat, ka' Yerusalem ihumimi'anmo nu palabuatan anu ma'idek. Aha nontaloakonmo tukoonyo nu aha Aku, Tumpu nompala'imo lipu' aiya sahingga madi'mo montoa palabuatan nu aha.

¹⁰Aku madi'mo mongkalibosi aha. Ku baumo hi aha apaa na anu binaumo nu aha hi mian sangga'at.”

¹¹Lapas aijo' mian anu nompusok hude lenan aijo' ninsusule'mo ka' nompoto'i hi Tumpu, ia notatae, “Iwi-iwi' na palentah nu belento Tumpu binaumo.”