Read Saluan DANIEL 10 Bible Online

DANIEL 10 - Saluan bible

DANIEL 10

¹I taun kinototolu'nyomo na i Tomundo' Koresy nompalentah Persia, sa'angu' na potuunon anu pinoto'i hi Daniel anu osa-osanggohi i Beltsazar. Potuunon aijo' totu'u hondo panyo talalo susa' na mongalati'i. Salatan ia nompagalamo binala usaha da osumbu', i Daniel nohumpakmo katalangan apaa na alati'nyo nu potuunon aijo' i uno nu sa'angu' na han anu pinotoa aijo'.

²Tempo'nyo aitu aku hau-haunyo balatapa tinotolu' na duminggu kokoot.

³Tempo'nyo aitu aku madi'mo nongkaan kaanon anu toto ima-ima' kabai ponoha'; aku madi'mo nonginum anggur ka' madi'mo mule' nonsubat ubak.

⁴I tanggan uampulu' ka'opat bitu'on anu momonanyo i taun aijo' aku hau-haunyo tinjo-tinjo i sonibi nu Kaunyo Tigris anu daka-daka' aijo'.

⁵ Aku nonsinda nokiita' lantas tinoangku samian na anu nompusok baju' hude lenan ka' mule' pombutu'nyo mosoni' anu madi' ko galo'nyo.

⁶Butongnyo jongkilaban susumo mainan, ohupnyo talalo hondo majingka susumo kilat ka' mule' matanyo moak susumo apu. Limanyo tiba tengkenyo jongkilaban susumo tambaga anu ogegesimo ka' mule' potataenyo kahongoan sumomo ahi' potatae nu mian anu da'isan hondo.

⁷Ola sausa'ku na nontoa anu pinotoa aijo'. To mia-mian anu nojajalan tiba aku madi' nontoa aijo' panyo aha nongoa'imo buhuk sahingga nalaimo ka' natisulukmo.

⁸Aku pinalaianmo nu aha ikiijo' me posi sausa'ku ka' lewa'mo nompalahatikan anu tinoangku aijo' nonompotolokengkengmo mae aku. Aku madi' kinohenggo-henggo ohupku inesemo hondo.

⁹Salatan aku nohongomo potataenyo pinoso'mo na aku sahingga tinondahapa i tano'.

¹⁰Lapas aitu daagi' kinolima anu nongkanyang mae aku sahingga aku noko pobulamo ka' natidupumo ilimangku ka' ibukungku.

¹¹Malaekat aijo' notataemo mae hi belengku, “O, Daniel, beleyum nu kalibosi nu Tumpu. Pobulaamo ka' mule' tinjomo lantas potombihingmo mae na potataengku aiya ima-ima'. Aku aiya sinaimo mae toka hi beleyum.” Tempo'nyo ia nontaloakon han aijo' aku tinuminjomo ka' ilakatnyomo.

¹²Lantas ia notataemo mae hi belengku, “O, Daniel, boli mabuhuk. Tumpu nohongomo do'a nu beleyum daagi pe'e sinaa momonanyo beleyum nonongalamo kaputusan da ta'alukmo na butong nu beleyum da timbali pande. Aku tinokamo mae salaku baumo pontaami do'a nu beleyum.

¹³ Malaekat anu bau ponjagai kalaja'an nu Persia nongewamo mae aku ko pinnyo uampulu' ka' sa'angu' na sinaa. Lantas i Mikhael sala'samian na to pola-polaya' nu malaekat tinokamo mae nontulungi aku. Pinala'iankumo naia ikiijo' mae i Persia.

¹⁴Aku tinoka mae da mompopangalati' beleyum da osumbu' pa' apaa na anu jadi saidi' mae hi bansa nu belemiu. Anu tinoa aijo' mongkona sinaa anu aiya mae i ahop.”

¹⁵Tempo'nyo ia nontaloakon han aijo' aku sinaindukumo ka' madi'mo noko ala notatae.

¹⁶Lapas aijo' malaekat anu susumo manusia nontajuakonmo mae limanyo ka' nongkanyangmo mae biwingku. Aku notataemo hi ia, “O, Tuan anu tinoangku aiya nonsaduakonmo aku nabuhukmo hondo sahingga aku madi'mo noko ala nongkohenggo.

¹⁷Aku sumomo samian na posaihon anu tinjo-tinjo i ahop nu tuannyo. Mosia na jadi na aku motatae hi belento Tuanku? Aku ilundengmo ka' mule kinyonyoangku nahahunsa'ano hondo.”

¹⁸Sahingga daagi' minsan na ia nongkanyang mae aku lantas ingoa'anku hosonku nintuangmo.

¹⁹Ia notatae, “Tumpu mongkalibosi beleyum kalana aijo' boli bata-bata kabai mabuhuk, donganmo pahoson!” Hau-haunyo ia nontaloakon han aijo' ingoa'anku nompaka pahosonmo mule' ka' notataemo, “Soba potataemo mae o, Tumpu, belento Tuan nompaka tuangimo mae kahosonanku.”

²⁰Lantas tinaamannyomo mae, “Pa' nu sumbu' nu beleyum kadaka' aku tinokamo mae hi beleyum? Makisudnyo da mompoto'i hi beleyum apaa na anu tinulismo i uno nu Kitab anu Madi' baleko'. Uuka aiya aku tionyo ahi' minsusule'mo da mambamo mahampate mongewa malaekat anu monjagai Persia. Lapas aijo' malaekat anu monjagai Yunani tokamo mae. Madi' ko sangga'atannyo na anu nontulungi mae aku, ola-olanyomo ahi' i Mikhael malaekat anu monjagai Israel, negara nu beleyum.