Read Saluan DANIEL 9 Bible Online

DANIEL 9 - Saluan bible

DANIEL 9

¹ I taun momonanyo salatan i Darius mian nu aha Media anak mo'ane i Ahasyweros nompalentahmo kalaja'an Babel, aku i Daniel lewa'mo nombasa' kitab-kitab nu agama. Aku lewa'mo nompotutugakon anu koonyo nu potatae nu Tumpu hi Nabi Yeremia, kota' Yerusalem mamang ahi' ma'idekmo pitumpulu' na taun na tataap ma'idek.

³Lantas aku binalado'amo totu-totu'u hi Tumpu nompoita da okalibosi mae. Aku mule' binapuasa'mo ka' nompusokmo hude kalung ka' sinumuhangmo i abu'.

⁴Iwi-iwi' na dosa' nu bansangku ingakuankumo hi Tumpungku. Aku notatae, “O, Tumpu, belentomo na aku daka'na kakuasa'an, ka' kami mongangga'i Belento. Belento saja' mongganapi palajanjian nu Belento ka' nompotoamo mae kalibosan nu belento anu madi' ko kamingkotannyo hi aha anu mongkalibosi belento ka' mombau anu Nu palentahkon.

⁵Kami binaladosa'mo ka' mule' nombaumo palabuatan anu ma'idek ka' mule' nombaumo kasala'an. Kami noto muhukmo ka' mule' nolanggaimo palentah nu Belento ka' mule' madi'mo nontuluti iwi-iwi na atulan nu Belento.

⁶Kami madi'mo nohongo to nabi-nabi, te to posa-posaihon nu Belento haha aijo' anu notatae momboa sanggo nu Belento lantas pinoto'imo nu aha hi to tomu-tomundo' mami ka' mule' hi to pola-polaya' mami ka' mule hi to mompo-mompolee' mami ka' mule' hi iwi-iwi' na to bansa-bansa mami.

⁷O, Tumpu kaputusan nu belento saja' kona ka' adin, panyo kami saja' hondo mombau anu moko ambang hi posi butong mami, aijo'mo kami iwi-iwi' na mian anu sa'a-sa'angu' na bansa tiba kami anu binagi-bagimo nu belento iyaya na lipu' anu majo'on ka' anu ohani kalana aha madi' tulu-tulutan hi Belento.

⁸To tomu-tomundo' mami, to pola-polaya' tiba aha mompolee' mami nonombaumo hahan anu moko ambang ka' mule' binaladosa'mo hi Belento o, Tumpu.

⁹Belento saja' nongampuni ka' mule' nongkalibosi mae, maumo kami saja' panggaga hi belento.

¹⁰Kami madi'mo nontapali potatae nu Belento, o, Tumpu mami salatan Belento nompalentahmo da kami tumuu' montuluti iwi-iwi na atulan anu binee'mo mae nu belento hi kami pipinoto'imo mae nu to nabi-nabi ka' mule' to posa-posaihon nu belento haha aijo'.

¹¹Songko-songko na Israel nolanggaimo iwi-iwi' na atulan nu Belento ka' madi' mongka'oho' mompotombihing potatae nu Belento. Kami binaladosa'mo hi Belento kalana aijo' binee'anmo mae nu belento kutuk na kami susumo anu tinulismo i Kitab i Musa posaihon nu Belento.

¹²Belento momputusi kona hondo susumo anu jinanji'mo nu Belento hi kami ka' mule' hi aha anu nongkuasaimo mae kami. Yerusalem i hukumo nu Belento tala-talalo, sahanyo kota' iyayamae i dunia aiya na madi' talalo i hukum.

¹³Iwi-iwi' na balaa' anu tinulismo i uno nu atulan i Musa binee'mo mae nu belento hi kami. Panyo maumo ahi' sumo aijo' o, Tumpu mami daagi' ahi' saja' kami madi' mombau anu momposanang kinyonyoa nu Belento. Kami daagi' sabole-bole madi' mongka'oho' mompala'i iwi-iwi na dosa' mami ka' madi mule' mongka'oho' mompalahatikan to panga-pangajalan nu Belento.

¹⁴Belento o, Tumpu, na Tumpu mami anu nohukumo kami nu balaa' anu pinosadiamo nu Belento; kaputusan nu Belento saja' kona ka' adin, panyo kami madi' nompotombihing potatae nu Belento.

¹⁵O, Tumpu, Tumpu mami, Belento nompotoamo mae kuasa nu Belento nonomboamo aha mian anu palesayamo hi Belento nosabat lengkat mae i Mesir, ka' kuasa nu Belento aijo' daagi' saja' tataap o, inau'. Kami nombaumo dosa' ka' mule' nombaumo kasala'an.

¹⁶Belento nontulungimo mae kami tempo'nyo naipuan mae, kalana aijo' bolimo daagi' otambuha'i na Yerusalem kota' nu Belento, puge'nyo nu Belento anu susi'. Kalana dosa' mami tiba palabuatan anu ma'idek nu mompolee' mami sahingga iwi-iwi' na mian anu aitu mae mompaha ohani tiba kami montoa Yerusalem madi'mo ko angga'nyo ka' mule' kona hi aha mian anu palesayamo hi Belento.

¹⁷O, Tumpu mami potombihingakon pe'e mae na do'a ka' mule' anu ku kakase. Po'ule'akon mae da ma'ima' na laigan nu Belento anu i hansunmo aijo', po ule' pokopianiakon mae da iwi-iwi' na mian monsumbu' talu' Belento Tumpu.

¹⁸Potombihingakon mae na kami, o, Tumpu, toa mae na kami ka' palahatikan mae na kasala'an mami tiba kota' mami anu nana idekmo tiba suele sanggo nu Belento. Kami binalado'amo hi Belento misa' kalana kami mian anu manonong panyo kalana Belento talalo ahi' hondo mongkalibosi.

¹⁹O, Tumpu potombihingakon mae na kami ampuniakon mae na kami ka' palahatikan mae na kami, ka' palia-lia'mo na mombau kaputusan! Bolimo otanda'i pipin da iwi-iwi' na mian monsumbu' talu' Belento ahi' na Tumpu. Kalana Yerusalem tiba mian anu palesayamo hi Belento memang ahi' madi'mo sala', Belentomo na Tumpu-Nyo'.”

²⁰Aku saja'mo binalado'a ka' nongakuimo dosa'ku ka' mule' dosa' nu bansaku Israel ka' mule' nongkakasemo hi Tumpungku da po ule' opokopianiakon na Laigan-Nyo anu susi'.

²¹ Hau-haunyo aku balado'a, i Gabriel anu tinoangku pipinotoa u'utu mae, i lumahapmo mae no uuka hi belengku. Tempo'nyo aitu malomo, mian monsombahkonmo koloban.

²²Lantas tinalangkanmo i Gabriel sumo uuka, “O, Daniel, aku toka mae da montulungi beleyum da monsumbu' anu lewa' okila-kila aijo',

²³Salatan beleyum notampu'unimo nongkakase hi Tumpu, Ia nontaamimo. Aku toka mae da mompotokakon kalana Ia mongkalibosi beleyum. Jadi potombihing mae ima-ima' hau-haunyo aku montalangkan alati'nyo nu anu tinoa aijo'.

²⁴Pimpitun lipat na pitumpulu' na taun, aijo'mo na tempo' anu pinotataapmo nu Tumpu mompobebas bansa nu belemiu tiba kota' nu belemiu anu susi' aijo' da bolimo baladosa' ka' bolimo mombau palabuatan anu ma'idek. Iwi-iwi' na dosa' o'ampunimo ka' mule' ka adilan anu sampe toka sidu-sidutu' aijo' sabole-bolemo ahi' opake sahingga anu lewa' tinoa ka' mule' anu lewa' okila-kila aijo' onyata'mo ahi', ka' Laigan nu Tumpu anu susi' aijo' po ule'mo ahi ponsomban Tumpu.

²⁵Tulis ka' alati'imo na aiya; Pimpitun lipat na popitu na taun na ohikuhakon, i mulaan pe'e mae tempo'nyo nonontalimamo palentah da po ule'mo mombau kota' Yerusalem sampe tokamo mae na samian na polaya' anu pinile'anmo nu Tumpu. Kopinnyo pimpitun lipat na anompulu' ka' ohua' na taun, iwi-iwi' na jalan tiba to bente-benteng nu Yerusalem anu ma'idekmo po ule'mo obau, panyo tempo'nyo aijo' manjoo' hondo nakasansala'an na ota'up.

²⁶De lapasmo na aijo' polaya' anu pinile'anmo nu Tumpu opateimo, padahan ia madi' ko kasala'an. Sahingga tokamo mae na suludadu nu tomundo', samian na anu baani hondo lantas mohansunimo kota' Yerusalem tiba Laigan nu Tumpu. Kakiamatan tokamo mae susumo iaba' anu momboamo mae pahampahampatean tiba kahansunan susumo anu tinantukanmo nu Tumpu.

²⁷ Tomundo' aijo' mombaumo palajanjian anu mahoson hondo hi aha mian da'isan, kopinnyo popitu' na taun. Toka ipohintonga'an nu taun aijo' nu tewa'mo na mian anu momboa mae koloban tiba palasombahan. Lapas aijo' hahan anu okabuhuk, anu osanggohi; Palabuatan anu ma'idek lewa-lewa' mohansuni opojoongmo i Laigan nu Tumpu ka' mule' ia tataapmo ikiijo' sampe ia anu nompojoong ikiijo' nu tokaimo mae nu kapatean anu titinantukanmo nu Tumpu hi ia.”