Read Saluan HOSEA 3 Bible Online

HOSEA 3 - Saluan bible

HOSEA 3

¹Tumpu notatae hi belengku, “Lako'mo mule' ka' sindua'i na boune anu mongka'oho' saja' masala'. Sindua'imo na ia susumo Aku suele monsindua'i mian nu Israel maumo aha nompala'imo Aku ka' nonsombahmo to pilo-pilogot ka' mongka'ima'i monsombahkon kukis anu matami' hi pilogot.”

²Sahingga aku nombayan sampulu' ka' olima' na doi salaka ka' 150 kilo gram na gandum da bau pongala boune aijo'.

³Pinoto'ingku hi ia tionyo ahi' montanda'i aku to pia-piamanga na kopinnyo. Samantala aijo' ia madi' timbali mongka'ima'i mo'ane kabai masala', ka' aku suele madi' timbali mongohani ia.

⁴Sumo aijo'mo na bau-baunyo na aha bansa Israel; pini ahi' hondo na aha tumuu' madi' ko tomundonyo kabai polaya', madi' ko koloban kabai tugu anu pinotinjo i tempat ponsomban, madi'mo ko to pilo-pilogot, kabai to aji-ajimat anu mompoto'i lahasia anu jadi aiya mae i ahop.

⁵Panyo tokaje mae na tempo'nyo bansa Israel po'ule'mo ninsusule' hi Tumpu nu aha, ka' hi tomundo' nu aha anu lengkat mae hi lee' i Daud. Lantas aha mabuhukmo ka' moholomatimo Tumpu ka' montalimamo to bala-balakat-Nyo.