Read Saluan HOSEA 6 Bible Online

HOSEA 6 - Saluan bible

HOSEA 6

¹To mia-mian nu Israel notataemo, “Imbo'mo da kita minsusule'mo hi Tumpu. Lamo ia na monsakiti kita, panyo Ia mule' ahi' na mompa'alin. Ia na mobelai kita, panyo Ia mule' ahi' na mombobodiakon iwi-iwi na Belento.

²I uno nu uansinaa kabai tolunsinaa aiya, Ia mompa'alinmo kita, ka' kita tumuu'mo i uno nu ponjaga'an-Nyo.

³Kalana aijo' imbo' mo da kita mompagala ahi' totu-totu'u palesaya hi Tumpu. Ia totu-totu'u tokamo mae hi kita susumo sinaa kahandamo mae bete', ka' susumo mule' ujan mohomeimo tano' salatan ohanimo mingkot na lonu nu ujan.”

⁴Panyo Tumpu notataemo, “O Israel tiba Yehuda! Apaa na anu tionyo Ku bau hi belemiu? Liibosum hi beleng-Ku malia' hondo saimpotulu susumo sehu' kabai dondu'ok daagi' subu-subu hondo.

⁵Aijo' na sababnyo sinaing-Kumo na to nabi-nabing-Ku da mompotoka hi belemiu kaputusan-Ku, saba' belemiu tionyo ahi' o hukumo ka' osilakaimo. Anu Ku kahanda'i hi belemiu natantumo ka' naningkoyamo.

⁶ Lebe Ku ka'ima'i, hi belemiu da monsumbu' mae Aku, ka' saja' ahi' mongkalibosi mae Aku, nulingkudui na mompapui ka' monsombahkon koloban hi beleng-Ku.

⁷Panyo susumo kiijo' i Adam, belemiu madi'mo nongganapi palajanjian nu belemiu hi beleng-Ku.

⁸Gileat, aijo'mo na kota' anu miannyo to ide-idek na kalakuannyo ka' anu saja' mompatei.

⁹To ima-imam i kota' aijo' sumomo sa'angu' na tompukan nu mian anu buling ka' anu lewa' mohakop mian anu motulu. I jalan anu mompatui mokiijo' i tampat anu susi' kiijo' i Sikhem suele aha nompateimo mian! Iwi-iwi' na kalakuan anu ma'idek aijo' anu binaumo nu aha memang ototonggolakon.

¹⁰I Israel tinoang-Ku daagi' ko anu okabuhuk; mian-Ku anu palesayamo nu posi humimi'imo na butongnyo, tiba jalan monsombahmo pilogot.

¹¹Mongkona belemiu, o mian nu Yehuda pinotataap-Kumo na tempo'nyo mohukum belemiu, kalana suele kalakuan nu belemiu.”