Read Saluan HOSEA 8 Bible Online

HOSEA 8 - Saluan bible

HOSEA 8

¹Tumpu notatae, “Po'onyi'mo na tanda kalana ko lobosmo mae montumbuhi. Sampobali' montumbuhimo mae lipu'-Ku susumo bonyia' monsabutmo kaanonnyo! Mian-Ku anu palesayamo nolanggaimo palajanjian-Ku tiba aha ka' madi'mo nontuluti pangajalan-Ku.

²Maumo ahi' aha monsanggo, sanggong-Ku Tumpu Allah nu aha ka' montaloakon koonyo nu aha mian-Ku anu monsumbu' Aku,

³panyo aha madi' mongka'oho' montalima apaa na anu ma'ima'. Mokonyo aijo' aha nu loloi'mo nu sampobali' nu aha.

⁴Mian-Ku anu palesayamo mompile'i tomundo' madi' nu pokilawa pe'e mae nu aha hi beleng-Ku pa' Ku situjui. Aha mohangkat bau polaya' madi' pinaisale' pe'e mae hi beleng-Ku. Aha mongala mosoni' tiba salaka nu aha lantas nu baumo nu aha patong nu pilogot anu nonsaduakonmo aha ihansun.

⁵Ku ka'ideki na sapi' mosoni' anu nu sombah nu aha anu jojoong i Samaria. Aku pi nusamo hondo hi aha. Pa' tokaje hi pianna kopinnyo na aha saja' mombusiki butong nu aha kalana monsombahmo pilogot?

⁶Sapi' mosoni' anu osombah kiijo' i Samaria aijo', anu bibinau nu to mia-mian anu pakawelan i Israel! Aijo' misa' Tumpu, kalana aijo' tionyo ahi' ohansuni!

⁷Mian-Ku anu palesayamo monsa'u mombun jadi aha mompadakje antong! Ale' nu gandum nu aha madi' jadi maha mokini ka' madi' mule' mohasinakon labu da okaan. Panyo de gandumnyo i ale' aijo' maha ka' mokini ahi' saba gandumnyo aijo' ola ahi' nu ingkoti saidi' mae nu to bansa-bansa sangga'at.

⁸Susumo kuhon tano anu noposo sumo aitujemule na Israel madi'o daagi ko'alatinyo, ka tinimbalimo bansa biasa pokakana tibaa bansa sanggaat.

⁹Susumo keledai anu ma'ela' baahan hondo sumo aijo'mo na to mia-mian nu Israel ola mosi ala pongka'oho'nyo. Aha molio bantuan hi aha Asyur ka' binayanmo nu aha hi to bansa-bansa sangga'at da mobela'mo tiba aha.

¹⁰Maumo sumo aijo' Ku posihukje na aha ka' obee'i hukuman. Madi'mo daagi pin aha monguntukakonmo sakit de aha nu palentahmo i tomundo' Asyur.

¹¹Lebe manjoo' na mezbah anu nu bau nu mian Israel da pongalini dosa' panyo mompaka panjoo' mule' ahi' na tampat nu aha pombauan dosa'!

¹²Manjoo'mo hondo na pangajalan anu tinulis-Kumo kona hi aha panyo iwi-iwi' aijo' madi' tinalima nu aha kalana nu sangka nu aha; aha na isambiha'nyo ahi'.

¹³Aha mongka'ima'i monsombahkon koloban hi beleng-Ku ka' mongkaan ponoha' anu kinolobanakonmo aijo', panyo Aku Tumpu madi' montalima koloban haha aijo'. Uuka aiya Ku inau'mo na dosa' nu aha ka' mohukumo aha kalana dosa' nu aha haha aijo'; Po ule'mo Ku boa na aha i Mesir!

¹⁴Aha mian nu Israel nombaumo iwi-iwi' laigan nu tomundo' panyo aha madi'mo nonginau' anu nompotimbalimo aha. Aha mian nu Yehuda nomponjoo'mo kota' anu ko bentengnyo panyo Ku tau'akonmo mae na apu da mompapui iwi-iwi' na laigan nu tomundo' haha aijo' tiba iwi-iwi' na kota' nu aha sampe mingkot.”