Read Saluan YOËL 1 Bible Online

YOËL 1 - Saluan bible

YOËL 1

¹Aiyamo na potuunon nu Tumpu hi Yoël anak i Petuel.

²Potombihing pe'e, o to tu'a-tu'anyo; palahatikan, iwi-iwi' mian nu Yehuda. Toho'mo na han anu sumo aijo' jinadi kabai tempo'nyo nai puan mae hi mompolee' nu belemiu?

³Sisikakon mae na kajadian aijo' hi to ana-anak nu belemiu; da aha mompotokakon hi to ana-anak nu aha na sisik aijo'. Tulunan anu mihinyo mae tionyo ahi' mohongo suele ka' monsisikakon mule' hi tulunan anu aiya mae i ahop.

⁴Sampahas na kihi-kihi' anu madi' opoko lekeng na konjoo'nyo tinoka i iwi-iwi na ale' ka' nongkaanmo hasinnyo. Apaa na anu pinotuha' nu sampahas kinaan mule' nu sangga'at na pahasannyo.

⁵O anu lewa' malangu, pobulamo! O anu lewa' monginum haangmo! Kalana anggur anu salaje ingagoanmo lengkat atina' i nganga' nu beleyum.

⁶ Tumpukan nu kihi-kihi' nontumbuhimo lipu'to; aha mahoson ka' madi' opoko lekeng na konjoo'nyo, bese'nyo pokakanamo ko tajomnyo nu sae nu singa behenyo.

⁷Aha nompateimo anggurto ka' kau' ara-nto memo tu'onyo. To bata-batangnyo nu kilitimo nu aha, sahingga to panga-panga'nyo nopute'mo.

⁸Haangmo o mian, susumo langkoyang anu sinusa'mo anu mohangimo kasilakan nu sindua'annyo anu nu kalibosi hondo.

⁹Gandum ka' anggur i nokangkanmo i Laigan nu Tumpu. Sahingga lewa'mo nohangi na to imam-imam, anu mohongo-hongo hondo mombau palentah nu Tumpu.

¹⁰To ale-ale' uuka aiya i hansunmo. Tano' nohangimo; kalana i hansunmo iwi-iwi' na gandum, i nanggasmo na bua'nyo nu anggur ka' ningkotmo na lanya' nu zaitun.

¹¹O topo ale', tando'imo! O topo bau ale' nu anggur haangimo! Kalana gandum, ka' jelai ka' iwi-iwi' na anu pinadak i hansunmo.

¹²Kau' anu biasa kobua'nyo i padang tinimbalimo i nanggas iwi-iwi' kau' anggur, apel, arah, kurma, ka' dalima. Sahingga mian da'isan mule' madi'mo i lame'.

¹³O to imam-imam anu mokalaja i mezbah pakemo na hude kalung ka' haangmo. Pinsoopmo i Laigan nu Tumpu da montando'i sampa-sampahu, kalana madi' ko koloban anggur ka' gandum anu osombahkon hi Tumpu nu belemiu.

¹⁴Palentah na mian nu belemiu da bapuasa'mo, bebakonmo na tempo'nyo nu kasihukan nu mian iwi-iwi'. Laga mae na to pola-polaya' ka' to tu'a-tu'anyo ka' iwi-iwi' na mian anu jojoong i Yehuda, da toka mae i Laigan nu Tumpu da momoita tulung hi Ia.

¹⁵ Sinaa nu Tumpu ohanimo sinaa anu okabuhuk hondo; tempo'nyomo nu Anu Daka' na kuasanyo mompotokamo mae kahansunan.

¹⁶Anu okaan i ningkotmo na'idek i ahop nu matanto. I Laigan nu Tumpunto madi'mo daagi' ko lame'.

¹⁷Bine' madi'mo tinumuu' i tano' anu mapeges. Madi'mo ko gandum anu o una' saba' to ala-alang i longkangmo ka' singkapmo nohobo-hobo'.

¹⁸Potu'on lewa'mo nolonga' ka' madi'mo tinenda madi'mo daagi' ko padang hemput hi aha. Sampahas na domba i nateekmo.

¹⁹Aku momoita tulung i Belento O Tumpu kalana to pada-padang hemput i nanggasmo totu-totu'u. To kau-kau' suele i nanggasmo ka' natemo mimbalu-balu'mo kinaanmo nu apu.

²⁰Ka' suele to bina-binatang anu ma'ela' i uno nu alas moloboo'mo hi Belento momoita tulung. Aha madi' noko ala molosut megot kalana to kau-kau'nyo iwi-iwi' no'otimo.