Read Saluan AMOS 3 Bible Online

AMOS 3 - Saluan bible

AMOS 3

¹Potombihing mae na potuunon nu Tumpu aiya, 'O bansa Israel anu binoamo mae nu Tumpu nosabat lengkat i Mesir. Tumpu notatae,

²“Pa' sangkuka na bansang i dunia, ola sa'a-sa'angu'mo na bansa na anu Ku sumbu' ka' Ku palahatikan. Aijo' na sababnyo dosa' nu belemiu talalo daka', ka' Aku totu-totu'u mohukumo belemiu.”

³Ugaat ua'aha na mian mamba hingga-hinggat madi' pe'e basale' momona?

⁴Te toho' mule' singa i kuhat molohu' de ia ma'isa mohumpak anu nu kaan? Te toho' mule' anak nu singa molohu' i uno nu liangnyo de ia ma'isa mohakop apa-apaa?

⁵Te toho' mule' tomonsi' nu kona nu so'o de so'o ma'isa pinokona? Te toho' mule' so'o kangkehusan de madi' ko anu nu kona?

⁶Te toho' mule' mian i kota', madi' nu lakat de mohongomo onyi' nu tolompet tandanyo mahampatemo? Ugaat mule' sa'angu' na kota' nukona nu balaa' de Tumpu madi' nombee' i balaa'?

⁷Tumpu Anu Matangkas na kuasanyo madi' toho' mombau sa'angu' pe'e na apaa de madi' nu poto'i pe'e na tanga'an-Nyo hi aha to nabi-nabi ka' hi to posa-posaihon-Nyo.

⁸De singa molohu', ihe na madi' mabuhuk? De Tumpu Anu Matangkas na kuasanyo notatae, ihe na ola momohokot madi' mombebaakon potuunon-Nyo?

⁹Bebaakonmo na aiya hi to mia-mian anu jojoong i Mesir ka' Asdod i laigan nu tomundo, “Posa'angu'mo i to bungku-bungkutnyo anu atina' i Samaria ka' potoakon na kahengge'an anu talalomo hondo, lewa'mo nompakisa anu nu mian ikiijo' mae.”

¹⁰Tumpu notatae, “Mian haha aijo', nongisi laigan nu aha nu to bala-balang anu ingala nu aha lewa' nompakisa ka' talalo buhingoson. Ka' mule' aha madi' ko anu monsumbu' mombau kahodi'an na kinyonyoa.

¹¹Kalana aijo' kampung nu aha nutumbuhimo nu sampobali', benteng nu aha ohansunimo, ka' laigan nu to tomu-tomundo'nu bulingimo nu aha.

¹²Susumo samian na anu molaya' potu'on anu nompo'ule' nohumpak ohua' na tengkenyo kabai sambiha' na bihing nu dombanyo anu sina'u nu singa, sumo aitu mule' memo sangkiding na tontuha' na mian anu jojong i Samaria, anu uuka aiya sana-sanang na ko mamale' i kamale'an anu ma'ima'an.”

¹³Tumpu Anu Daka' ka' Matangkas na Kuasanyo na notatae, “Opalahatikan uuka aiya, ka' pokinde'i na tulunan i Yakub.

¹⁴ I sinaanyo Aku nohukumo mian nu Israel kalana dosa' nu aha, Aku mohansunimo to mezbah-mezbah ponsomban kiijo' i Betel. Toto sa'angu' na mezbah ponsomban okolongimo na to pupuusnyo sahingga mohobo'mo mokaiyong i tano'.

¹⁵To lai-laigan tempo'nyo nu bakin ka' to lai-laigan bau pilawean i tempo'nyo nu posinaa Ku hansunimo. To lai-laigan anu binunga-bungan nu sae nu binatang mohobo'mo, iwi-iwi' na laigan anu daka' hansunmo.