Read Saluan AMOS 6 Bible Online

AMOS 6 - Saluan bible

AMOS 6

¹Silakamo na belemiu anu tumuu' ima-ima' i Sion, ka' belemiu anu mongoa'i sanang i Samaria, belemiu o to tua'a-tu'anyo nu mian da'isan nu bansa Israel anu talalo oholomati, belemiu anu biasa pomoitan tulung nu mian.

²Lako' mae toa kiijo' i Kalne lantas lajangmo ahi lau-laus mokiijo' i kota' Hamat anu daka' aijo', lapas aitu mokiijo'mo i kota' Gat i Filistin. Ponsangka nu belemiu kota' haha aijo' lebe ma'ima' molingkudui kalaja'an Yehuda tiba Israel? Apaa daerah nu aha lebe daka' molingkudui daerah nu belemiu?

³Belemiu panggaga au'aitu sinaanu kasusa'an daagi' pin, panyo iwi-iwi' na kalakuan nu belemiu ola mompolia' da toka mae na sinaa ka'idekan aijo'.

⁴Silakamo na belemiu anu male' i kamale'an anu to ima-ima', ka' nombaumo bau-bauon nongkolotmo sapi' tiba domba anu daagi' bata'nyo!

⁵Belemiu sanang na mombabali'i nyanyian susumo anu binaumo i Daud ka' belemiu mompahaikakon lagu-lagu aijo' tiba kasapi.

⁶Belemiu monginum anggur i galas anu ingisian buke-buke' ka' belemiu mompake minya-minya' anu manohong, panyo belemiu madi' molibos na kinyonyoa i kahansunan nu Israel.

⁷Kalana aijo' belemiumo na anu momonanyo oboa i tampat pompojoongan. Mombau bau-bauon ka' mongkakan me pupusnyo aiya.

⁸Totu-totu'u hondo, Tumpu Anu Matangkas na Kuasanyo nompokinde'imo, “Aku mongka'ideki katabuulan nu mian nu Israel; Aku madi' sanang na montoa to lai-laigan nu to tomu-tomundo anu talalo ma'ima'. Puso nu kota' nu aha iwi-iwi' tiba anu daagi' i unonyo, Ku bee'mo hi sampobali'.”

⁹De daagi' tino sampulu' na mian anu natisuluk i uno nu sa'angu' na laigan, aha sinilaka suele.

¹⁰Samian na anu i laigan anu mokalaja mongatun kubulannyo, tokamo mae momboa mayat nu sangalunyo. Ia noloboo'imo mian aitu mae i sasu padut nu laigan aijo', “Pa' daagi' ko anu tinumuu' sambiha'nyo na beleyum?” Saba' o hongomo na pontaami mae “Madi'mo!” Samian na anu i laigan anu mokalaja molamun mayat notatae, “Bolimo daagi' motatae! Kita bolimo monsanggo, sanggo nu Tumpu.”

¹¹De Tumpu mompalentahmo iwi-iwi' na laigan anu daka' kabai ise' nu hansunimo.

¹²Nu poko ala — nu ajahan na mopadeka' ipuge'nyo anu batuon? Toho' binau nu mian na sapi' mompajeko ambai? Panyo belemiu aiya nombali-balikakonmo ka'adinan da timbali lasung anu monsilakai ka' anu totu'u tinimbalimo sala.

¹³Belemiu talalomo molabi na motatae au' aitu belemiu mohungku'imo Lodebar. Belemiu mule' notatae, “Kami sukup mahoson mompokala Karnaim”.

¹⁴Tumpu Anu Matangkas na Kuasanyo ka' Daka' na kuanyo notatae, “Mian nu Israel, Aku mopakatumo suludadu lengkat i sa'angu' na bansa nu Salipu'an da montumbuhi lipu' nu belemiu. Aha nongkabisa'imo belemiu lengkat i jalan mokiijo' i Hamat i sasu utara toka-toka mokiijo' i Bangka'nyo nu Araba sasu Selatan.”