Read Saluan OBAJA 1 Bible Online

OBAJA 1 - Saluan bible

OBAJA 1

¹Sumo uuka na anu kinila-kila i Obaja; ia nompotokamo potuunon nu Tumpu Anu Matangkas na kuasanyo mongkona bansang Edom: Tumpu nonsaimo mian anu sinai-Nyo hi to bansa-bansa ka' kita nohongomo potuunon anu binoanyo nu aha sumo uuka, “Posadiamo saba' mahampatemo! Imbo' kita mambamo montumbuhi Edom.”

²Ka' hi aha Edom Tumpu notataemo, “Beleyum Ku polundengmo sahingga nu alumo nu iwi-iwi' na bansa.

³Beleyum ingakalanmo nu kinyonyoa nu beleyum anu sombo-sombong atina'. Puso nu kota' nu beleyum atina' te bungkutnyo nu batu anu maharon; kajojoongan nu beleyum aita mae ibawo nu bongkutnyo anu matangkas. Kalana aijo' belemiu binapikinmo, Ihe na moko ala mompatundu' Aku?

⁴Maumo beleyum nombaumo laigan nu beleyum sumomo ko tangkas nu peta nu tomonsi' bonyia' ka' mule' ko tangkasnyo sumomo to manda-mandala' ilangit, beleyum tionyo ahi' Ku tuamo mae.

⁵Anu montomang kabai tololang anu toka mae pihi ola mongala anu nu ka'ima'i nu aha. Mian anu montipu anggur i ale' saja' mompotuha' to pia-piangkuka na bua'nyo. Panyo belemiu opateimo iwi-iwi' madi'mo ko anu tontuha' na nu patei nu aha to sampo-sampo bali' nu beleyum.

⁶O tulunan i Esau halata' nu beleyum pagalamo olio ka' mule' pagalamo o agoi ka' mule' halata' nu beleyum anu pinosuluk ihuhuakonmo nu aha.

⁷Beleyum o akalimo nu mian anu nosa'angu'mo nontulungi belemiu ka' ilaa'mo mae lengkat i kampung nu belemiu. Belemiu pinatundu'mo nu to sanga-sangalu nu belemiu, tinuamo nu mian anu nongkaan hingga-hinggat tiba belemiu. Aha lewa'mo noleleki mongkona butong nu beleyum. ‘Iyamo uuka aiya na kapandeannyo aijo' iwi-iwi'?’

⁸De tokamo isinaanyo pohukuman-Kumo Edom aha to mia-mian anu pande Ku paha pateimo. Ka' iwi-iwi' na kapandean nu aha bapikin mingkotmo madi'mo ko anu otoa.

⁹Mian anu to babaani anu lengkat mae i Teman mabuhukmo, ka' iwi-iwi' na suludadu nu Edom silakamo.”

¹⁰“Beleyum talalomo binuhingi son hi to utu-utus nu beleyum lee' i Yakub. Kalana aijo' beleyum opateimo ka' nu alumo nu mian toka sidu-sidutu'.

¹¹Beleyum tuminjomo aijo' mae jo'o-jo'on de tokamo na sinaanyo sampo bali' montumbalakonmo tumban nu Yerusalem ka' mompatundu'mo kota' aijo'. Beleyum ola momohokot ka' salatan aha mongalamo iwi-iwi' na kakaya'an nu Yerusalem ka' nubagi-bagimo nu aha. Beleyum pokakanamo na ko ideknyo susumo sampo bali' haha aijo'.

¹²Madi' pantas na beleyum ola sanang na montoa nasib anu sinoe'mo hi aha mian nu Yehuda ka' ola mule' lame' de tokamo isinaanyo utus nu beleyum aijo' osilakaimo. Madi pantas na beleyum manjoo' na potatae de ia susa'mo.

¹³Madi' pantas na beleyum mompinsoopi kota' nu mian-Ku anu pinalesayamo ka' lewa' montaligalai to mia-mian anu hau-haunyo mongoa'i kasansala'an, apaa mule' lewa'mo montomang halata' nu aha isinaa kinasoe'anmo aijo'!

¹⁴Madi' pantas na beleyum tuminjo isangan nu jalan da labot montumbuhi to mia-mian anu hau-haunyo mopalai da boli nu patei nu sampo bali' kabai mombee'mo aha hi sampo bali' isinaa de aha nu tokaimo nu balaa'.”

¹⁵“Totu-totu'u ohanimo mae na sinaanyo, Aku Tumpu momputusimo to bansa-bansa. Apaa na anu binaumo nu Edom aijo'mo na bau pombalosingku ia. Ia suele mongoa'imo apaa na anu binaunyomo.

¹⁶Aita mae ibungkutnyo anu Aku na tumpunyo anu susi' mian-Ku anu pinalesayamo nonginumo inumon da bau ponsumbu'an hukumannyo. Panyo inumon anu obee' hi to bansa-bansa i dunia aiya lebe mapakat mule'. Hukuman aijo' madi'mo nu poko ala nu aha ogoliliakon da tionyo ahi' nu inumo nu aha sampe mingkot, lapas aijo' aha silakamo madi'mo ko anu otoa-toa.”

¹⁷“Panyo i bungkutnyo nu Sion saidi' mae ko anumo oposalamat ka' bungkutnyo aijo' timbalimo sa'angu' na tampat bau katokaan-Ku. Sahingga lee' i Yakub po Ule'mo montumpui tano' pusaka' nu aha.

¹⁸Mian-Ku Israel anu pinalesayamo saidi' mae sumomo apu anu montoyo'i ingko-ingkot na lee' i Esau susumo apu montoyo'imo ingko-ingkot na hat i ale'. Madi' ko samiannyo pe'e na lee' i Esau na madi' nu kona, Aku Tumpu na notataemo!

¹⁹To mia-mian nu aha Yehuda anu sasu Salatan, nonjojoongimo Edom. To mia-mian anu lengkat mae i bungkutnyo anu i sasu kinsoban nompatundu'mo da'erah Filistin. Tulunan nu bansa Benyamin saidi mae monjojoongimo Gilead, ka' mule' Israel mian-Ku anu pinalesayamo saidi' mae mongkuasaimo songko-songko na Efraim tiba Samaria.

²⁰Aha mian nu Israel anu i sasu Utara saidi' mae minsusule'mo lengkat mae i pinomboan aha ka' pinompojoongan lantas monjojoongimo Fenisia toka-toka i Zarfat. To mia-mian nu Yerusalem anu binoamo ka' pinojoongmo i Sardis saidi' minsusule'mo ka' montumpuimo iwi-iwi' na kota' i sasu salatan Yehuda.

²¹Mian anu jojoong i Yerusalem anu nohumpakmo kabilahian saidi' mae montumbuhimo Edom ka' mule' mompatundu'mo. Sah ingga Aku Tumpu na saidi' mae mompalentah susumo tomundo'.”