Read Saluan YUNUS 1 Bible Online

YUNUS 1 - Saluan bible

YUNUS 1

¹ Daagi kino sansinaan, Tumpu notataemo hi Yunus anak i Amitai.

²Koonyo nu Tumpu, “Lako mamba i Ninewe kota' anu daka aijo', ka' otambuha'i kalana Kusumbu' mian anu jojoong ikiijo' talalomo hondo na'idek.”

³Panyo i Yunus ola mule' ahi' namba itampat sangga'at da majo'on hi Tumpu. Ia namba i Yope ka' tempo'nyo aijo' nompaha kabotmo kapan anu kahanda' mamba i Spanyol. Salatan binayannyomo na ongkos nu kapan ia sinumake'mo i kapan aijo', lantas tinalabutmo namba hingga-hinggat tiba pangalaja nu kapan nambamo i Spanyol da majo'on hi Tumpu.

⁴I Yunus nintatau'mo kaiyong mae sasu lunasa'nyo ka' kino mamale'mo ikaiyong, lantas ihoyotmo bobobogon. Lapas aijo' Tumpu nompotokamo mae antong anu makansang hondo i ambai ka' jinadimo na antong anu makansang hondo aijo' nontintip kapan aijo' sahingga kiniboli' ihansunmo. To mia-mian pangalaja nu kapan nabuhukmo hondo ka' lewa'mo noloboo' na aha toto samian momoita tulung hi posi-posi pilogot nu aha. Da mongkulangi bahaya dumo tompu, pinaha lumbu'akonmo i ambai na to bala-balang anu pinosake'.

⁶Tempo'nyo kapiten nu kapan aijo' nintatau' nintatau sasu akaong i lunasa'nyo tinoanyomo na i Yunus hau-haunyo hoyot. Lantas ia notataemo, “Tetimbali tohoyot na beleyum i unonu han anu sumo aiya? Dongan pobula! Balado'a hi pilogot nu beleyum ka' momoita tulung. Ihe na monsumbu', Ia mongkalibosi mae kita, sahingga kita madi' silaka.”

⁷Salatan i Yunus ka' kapiten nu kapan aijo' noliba'mo nokiita to mia-mian pangalaja nu kapan haha aijo' notataemo samian ka' samian, “Imbo' da kita mombuang onde da osumbu'to ihe na anu kosala'nyo sahingga nonsaduakonmo kita da kinona nu balaa' aiya!” Aha nombungmo onde ka' tinoa nu aha i Yunus na kinonanyo.

⁸Lantas aha notataemo hi Yunus, “Memang beleyumo na nonsaduakon balaa' aiya? Beleyum nolengkat mae i Ya? Bansa apaa? Kadaka' tinokamo i aiya na beleyum?”

⁹Tinaaman i Yunus, “Aku mian nu Ibrani. Aku monsombah Tumpu, Tumpu anu kiita i suluga', anu nompojadi ambai tiba katano'an.”

¹⁰Lapas aijo' ia nonsisikmo pa' mosia na ia nalai mae lengkat i Tumpu. Nohongo aijo' to mia-mian pangalaja nu kapan haha aijo' lebemo mule' nabuhuk ka' notataemo hi ia, “Baani hondo na beleyum nombaumo sumo aijo'?”

¹¹Hau-haunyo aijo' basisik antong kino daka-daka'nyomo lantas mian haha aijo' pangalaja nu kapan nompokilawamo hi ia, “Apa naanu obau mami hi beleyum da antong aiya belentimo?”

¹²Tinaaman i Yunus, “Alinmo mae na aku mokaiyong i ambai da antong aiya belentimo. Kalana uuka aiya sinumbu'kumo taalu' akumo aiya na nonsaduakon sahingga antong anu talalo hondo makansang aiya nontintipmo mae belemiu.”

¹³To mia-mian pangalaja nu kapan daagi nompisoba-soba binala usaha momboseakon kapan aijo' mamba isasu katano'an. Panyo ola ahi' antong mompaka makansang sahingga usaha nu aha madi' kino gunanyo.

¹⁴Kalana aijo' aha nomoitamo hi Tumpu, “O Tumpu opoita mami boli mae kami silaka kalana mongalamo napas nu mian anu madi' nombau kasala'an hi kami maumo pa' apaa. Kalana belento o Tumpu nombaumo apaa na anu okahanda'i nu Belento.”

¹⁵Lantas aha nolumbu'akonmo i Yunus nokaiyong i ambai. Sahingga antong aijo' madi'mo nakansang.

¹⁶Mian nu kapan haha aijo' nabuhukmo hondo hi Tumpu ka' salatan tinokamo i katano'an aha nonsombahkonmo koloban ka' nonjanji'mo lupa-lupa na han hi Tumpu.

¹⁷ Hau-haunyo aijo' Tumpu nompalentahmo mae sa'angu' na ikan anu talalo hondo daka' ka' ilonyomnyomo na i Yunus. Sahingga jinojoongmo na i Yunus i unonu kompong nu ikan tinolumpahu ka' tinolunsinaa na kinopinnyo.