Read Saluan NOMBILANGMO 1 Bible Online

NOMBILANGMO 1 - Saluan bible

NOMBILANGMO 1

¹ I tanggan sa'angu' bitu'on ko ohua'nyo i taun ko ohua'nyo salatan aha bansa Israel nompala'imo Mesir. Tumpu notatae hi Musa, i uno nu Kemah nu Tumpu i padang bola Sinai. Ia notatae,

²“Beleyum ka' i Harun tionyo ahi' mombilangmo iwi-iwi' na mian nu Israel, konjoo'nyo nu mian iwi-iwi' ka' toto sa'angu' na auwan. Bauakon daputan sanggo nu mo'ane iwi-iwi'

³anu umunnyo molabimo uampulu' na taun mokita' anu timbalimo o hangkat bau suludadu. Aha tionyo ahi' odaputanakon i posi-posi gombuannyo.

⁴Toto sa'angu' na tulunan nu bansa, poita samian na bau polaya' mian da montulungi belemiu.”

⁵Aiyamo na sanggo nu to mia-mian anu pinile'anmo aijo' hi aha mian Israel da montulungi i Musa ka' i Harun ka' anu timbali polaya' toto sa'angu' na tulunan nu bansa aijo'mo: [TULUNAN NU BANSA] — [POLAYA'] Ruben — i Elizur anak i Syedeur Simeon — i Selumiel anak i Zurisyadai Yehuda — i Nahason anak i Aminadab Isakhar — i Netaneel anak i Zuar Zebulon — i Eliab anak i Helon Efraim — i Elisama anak i Amihud Manasye — i Gamaliel anak i Pedazur Benyamin — i Abidan anak i Gideoni Dan — i Ahiezer anak i Amisyadai Asyer — i Pagiel anak i Okhran Gad — i Elyasaf anak i Rehuel Naftali — i Ahira anak i Enan

¹⁷Kalana binantumo nu sampulu' ka' ohua' na mian haha aijo', i Musa ka' i Harun

¹⁸nompalentahkonmo da iwi-iwi' na mian sihuk mae i tanggan sa'angu' bitu'on ko ohua'nyo, lantas tundulan nu aha o tulismo na to mia-mian anu daagi' hi toto sa'angu' na tulunan nu bansa mae nu aha. Sanggo nu to momo'ane iwi-iwi' anu umunnyo molabimo uampulu' na taun mokita o tulis ka' obilang.

¹⁹Susumo anu pinalentahkonmo nu Tumpu. Iwi-iwi' aijo' binaumo i Musa i padang bola nu Sinai.

²⁰To momo'ane anu ko umunmo uampulu'mo labi na taun mokita anu timbalimo o hangkat bau suludadu, odaputanakon na sanggonyo nu mian anu o ala hi toto sangauan, tinampu'unan lengkat mae hi Ruben, anaknyo tumpe i Yakub tinoka-toka hi Naftali. Konjoo'nyo nu aha aijo'mo: [TULUNAN NU BANSA] — [KONJOO'NYO NU MIAN] hi Ruben — 46.500 hi Simeon — 59.300 hi Gad — 45.650 hi Yehuda — 74.600 hi Isakhar — 54.400 hi Zebulon — 57.400 hi Efraim — 40.500 hi Manasye — 32.200 hi Benyamin — 35.400 hi Dan — 62.700 hi Asyer — 41.500 hi Naftali — 53.400 Iwi-iwi'mo — 603.550

⁴⁷To mia-mian tulunan i Lewi madi' dinaputanakon hingga-hinggat tiba to tulu-tulunan nu bansa sangga'at,

⁴⁸kalana pinoto'imo nu Tumpu hi Musa,

⁴⁹“De beleyum montulismo sanggo nu to mia-mian anu timbali o hangkat bau suludadu, tulunan mae nu bansa Lewi bolimo o tulis.

⁵⁰Pokau na aha mongkalesang Kemah-Ku, tiba posadiaonnyo iwi-iwi'. Kalaja nu aha aijo'mo molemban Kemah-Ku tiba posadiaonnyo ka' mongkalesang. Aha tionyo ahi' mompotinjo kemah kajojoongan nu aha montikubi Kemah-Ku.

⁵¹De belemiu molalinmo, mian nu Lewi haha aijo' na tionyo ahi' montataki Kemah-Ku lantas po'ule' mule' mompotinjo i tampat sangga'at anu pombauan mule' kemah kajojoongan nu belemiu. Ola aha Lewi na mongohani Kemah-Ku aijo' lantas ihe na mongohani Kemah-Ku aijo' o hukum mate.

⁵²To mia-mian nu Israel sangga'at tionyo ahi' mompotinjo kemah nu aha mogombu-gombu, mian anu minsoop i gombuan haha aijo' toto sa'angu' na gombuan aijo', montikubi posi-posi bandela'nyo.

⁵³Panyo to mia-mian nu Lewi tionyo ahi' mombau kemah kajojoongan nu aha montikubi Kemah-Ku. Aha tionyo ahi' monjagai da boli ko mian anu mongohani, sahingga monsaduakonmo Aku pusa ka' mohukumo aha mian Israel.”

⁵⁴Sahingga aha mian Israel nombaumo iwi-iwi' apaa na anu pinalentahkonmo nu Tumpu hi Musa.