Read Saluan NOMBILANGMO 10 Bible Online

NOMBILANGMO 10 - Saluan bible

NOMBILANGMO 10

¹Tumpu notataemo hi Musa,

²“Pombau ohua' na tolompet salaka na otutuk da bau polaga mian da'isan sihuk mae kabai da bau ponsai aha da mambamo.

³De pinduan na mompuuhi manta-mantan na onyi'nyo, alati'nyo iwi-iwi' na mian tionyo ahi' sihuk hi beleyum titiikub i ahop nu sabatan nu Kemah-Ku.

⁴Panyo de ola minsan na mompuuhi, alati'nyo ola to pola-polaya' na tionyo ahi' sihuk hi beleyum titikub.

⁵De tolompet o puuhi kodo-kodo' na onyi'nyo, aijo' pontandai to tulu-tulunan nu bansa anu nombau kemah i sasu kabete'an na tionyo ahi' mamba.

⁶De o puuhi kodo-kodo' na onyi'nyo kopinduannyo, saba' to tulu-tulunan nu bansa i sasu selatan na tionyo ahi' mamba. Jadi onyi'nyo anu to kodo-kodo' alati'nyo mian tionyo ahi' mambamo,

⁷ka' onyi'nyo anu opomantan, alati'nyo mian tionyo ahi' sihukmo.

⁸Tolompet haha aijo' tionyo ahi' to ima-imam ka' to ana-anak i Harun na tionyo ahi' mompuuhi. Aijo' na atulan anu tionyo ahi' otuluti nu belemiu sampe toka sidu-sidutu'.

⁹Ka' de belemiu mahampate i lipu' nu belemiu montinjohakon kabaanian mongahopi sampobali' anu montumbuhi mae, puuhimo ka' po'onyi' na tolompet haha aijo'. Sahingga Aku, Tumpu Allah nu belemiu na montulungi ka' momposalamat belemiu da sampobali' nu belemiu boli mae monsilakai.

¹⁰Ka' suele i sinaa belemiu balame-lame'mo, i Lamean Bitu'on Bu'ou ka' lamean miu sangga'at, tolompet aijo' tionyo ahi' o puuhi ka' opo'onyi' de belemiu monsombahkonmo anu opotunu ka' koloban bau pompodame hi beleng-Ku. Sahingga Aku na montulungi. Akumo na Tumpu Allah nu belemiu.”

¹¹I taun ko ohua'nyomo salatan bansa Israel nompala'imo mae Mesir, i tanggan uampulu' bitu'on ko ohua'nyo, noliba'mo na kundom madi'mo nohohungi Kemah nu Tumpu.

¹²Lantas aha mian Israel aijo' nambamo nolundu-lundu nompala'imo padang bola Sinai, ka' kundom aijo' jinojoongmo salatan aha tinokamo i padang bola Paran.

¹³Aijo'mo na momonanyo aha namba kalana palentah nu Tumpu anu pinosumbu'nyomo hi Musa.

¹⁴Anu namba momona suludadu anu ko bandela'nyo posa'angu'an nu aha Yehuda, sanggombu lapas mule' sanggombu: i Nahason, anak i Aminadab na polaya'nyo nu aha tulunan nu bansa Yehuda,

¹⁵i Netaneel anak i Zuar na polaya'nyo nu aha tulunan nu bansa Isakhar,

¹⁶ka' i Eliab anak i Helon na polaya'nyo nu aha tulunan nu bansa Zebulon.

¹⁷Lantas Kemah nu Tumpu tinatakanmo, ka' nambamo na aha mian nu Gerson ka' Merari anu momboa Kemah aijo'.

¹⁸Lapas aijo' nambamo na suludadu anu ko bandela'nyo posa'angu'an nu aha Ruben, santompuk lapas mule' santompuk: i Elizur anak i Syedeur na polaya'nyo nu aha tulunan nu bansa Ruben,

¹⁹i Selumuel anak Zurisyadai na polaya'nyo nu aha tulunan nu bansa Simeon,

²⁰ka' i Elyasaf anak i Rehuel na polaya'nyo nu aha tulunan nu bansa Gad.

²¹Lapas aijo' nambamo na aha mian nu Kehat anu nomboa to paka-pakakas anu susi'. De aha tokamo i tampat pompotinjoan kemah anu po'ule' mule' opotinjo, Kemah nu Tumpu opotinjomo mule'.

²²Lapas aijo' tinuntunanmo nu suludadu anu ko bandela'nyo posa'angu'an nu aha tulunan nu bansa Efraim, santompuk lapas mule' santompuk; i Elisama anak i Amihud na polaya'anyo nu aha tulunan nu bansa Efraim,

²³i Gamaliel anak i Pedazur na polaya'nyo nu aha tulunan nu bansa Manasye,

²⁴ka' i Abidan anak i Gideoni na polaya'nyo nu aha tulunan nu bansa Benyamin.

²⁵Ahennyo nambamo na suludadu anu ko bandela'nyo posa'angu'an nu aha tulunan nu bansa Dan. Aha atina'mo na montoa aitu mae i mimihi hi iwi-iwi' na posa'angu'an. Aha lumajang toto sanggombu lapas mule' sanggombu i Ahiezer anak i Amisyadai na polaya'nyo nu aha tulunan nu bansa Dan.

²⁶I Pagiel anak i Okhran na polaya'nyo nu aha tulunan nu bansa Asyer,

²⁷ka' i Ahira anak i Enan na polaya'nyo nu aha tulunan nu bansa Naftali.

²⁸Sumo aijo' na lundu-lunduannyo nu aha mian Israel, santompuk lapas mule' santompuk de aha mambamo ka' molalinmo.

²⁹I Musa notataemo hi dawoknyo, i Hobab anak i Rehuel aha mian nu Midian, “Kami mambaje i tampat anu pinoto'imo nu Tumpu obee' hi kami. Tumpu nonjanji'mo mombee'i anu ma'ima' hi aha mian nu Israel. Jadi batukimo mae, okanonongije mami na beleyum.”

³⁰Tinaaman i Hobab, “Talima kase panyo aku kahanda'mo minsusule' i lipu' kinahampeanku.”

³¹“Boli mompala'i kami,” na koonyo i Musa, “kalana beleyum na timbali mompotiju' kajalanan mami, ka' mule' beleyum na monsumbu' pa' iya mae na pombauanto kemah i padang bola.

³²De beleyum mombatukimo saba' iwi-iwi' na anu ma'ima' apaa na anu nubau nu Tumpu hi kami, obau mami hi beleyum.”

³³Salatan aha bansa Israel nompala'imo Sinai, bungkutnyo kajojoongan nu Tumpu, aha i lumajang kopinnyo tinolun sinaa. Peti' Palajanjian nu Tumpu saja' oboa mamba momona da aha molio tampat bau pompotinjoan kemah nu aha.

³⁴De aha mambamo mompala'imo tampat pinombauan nu aha kemah, kundom nu Tumpu na saja' mohohungi aha i singit nu sinaa.

³⁵ De Peti' Palajanjian aijo' oboamo, i Musa motataemo, “Jagai mae o Tumpu, ka' posubali' na anu monsampobali' Belento, da mian anu mongka'ideki Belento mopalaimo.”

³⁶Ka' de Peti' Palajanjian aijo' tokamo i tampat kabelentian, i Musa motataemo, “Pinsusule'mo mae o Tumpu, hi aha bansa Israel anu nomada-madalamo.”