Read Saluan NOMBILANGMO 13 Bible Online

NOMBILANGMO 13 - Saluan bible

NOMBILANGMO 13

¹Tumpu notataemo hi Musa,

²“Toto sa'angu' na tulunan nu bansa Israel o ala samian na polaya' nu aha da mamba mondoyoni lipu' nu Kana'an anu Ku bee'mo hi aha mian nu Israel.”

³Susumo anu pinalentahkonmo nu Tumpu Allah aijo', i Musa nonsaimo aha lengkat mae i padang bola Paran. Iwi-iwi' na mian haha aijo' atina'mo na to pola-polaya' nu aha mian Israel: [TULUNAN NU BANSA] — [POLAYA'] Ruben — i Syamua anak i Zakur Simeon — i Safat anak i Hori Yehuda — i Kaleb anak i Yefune Isakhar — i Yigal anak i Yusuf Efraim — i Hosea anak i Nun Benyamin — i Palti anak i Rafu Zebulon — i Gadiel anak i Sodi Manasye — i Gadi anak i Susi Dan — i Amiel anak i Gemali Asyer — i Setur anak i Mikhael Naftali — i Nahbi anak i Wofsi Gad — i Guel anak i Makhi

¹⁶Aijo'mo na aha anu mamba mondoyoni, anu pinile'anmo i Musa da lewa' mondoyoni lipu' aijo'. I Hosea anak i Nun binali'anmo i Musa na sanggonyo i Yosua.

¹⁷Salatan i Musa nonsaimo aha da mambamo, pinoto'inyomo hi aha, “Lako' lajang mokiijo' sasu utara, mompatui sasu selatan lipu' nu Kana'an, lantas lau-lausmo i da'erah anu i puge'nyo.

¹⁸Doyoni ima-ima' pa' mosia na lipu' aijo', miannyo manjoo' kabai sangkiding, pa' aha to hoso-hoson kabai mabuhuk.

¹⁹Palesa ima-ima' na lipu' aijo' pa' ma'ima' kabai ma'idek, ka' apaa miannyo jojoong i kampung anu kantoan kabai i uno nu kota anu binauan bentengnyo.

²⁰Pohoson na kinyonyoa nu belemiu. Toa pa' tano'nyo ma'omuk kabai manjoo' na kau'nyo. Boli okolilimi de minsusule'mo mae momboa mae bua' nu sosu'anon anu ikiijo' mae.” Tempo'nyo aitu montampu'unimo pontipuan anggur.

²¹Sahingga nambamo na mian haha aijo' i sasu utara ka' nondoyonimo ima-ima' lipu' aijo' tinampu'unan pe'e lengkat i padang bola Zin sasu selatan lantas nokiijo'mo sasu utara tinoka i kota Rehob, koko jalan mokiijo' i Hamat.

²²Momonanyo aha nokiijo' i sasu selatan lipu' aijo' ka' tinokamo i kota Hebron, jojoongan nu aha mian Ahiman, Sesai ka' Talmai, lee' mae i Enak. Hebron pinotinjo popitu'mo na taun na kinopinnyo ma'isa pe'e ko kota Zoan kiijo' mae i Mesir.

²³Lantas tinokamo na aha i bangka'nyo nu Eskol. Ikiijo' aha nontutu'mo mae sampanga' na bua' nu anggur anu maboat hondo, sahingga nongalamo sangkau na kau' ka' tionyo ahi' i lemban nu ua'aha na mian. Aha suele nomboa to pia-piangkuka na bua' nu dalima ka' bua' nu ara.

²⁴Tampat aijo' osanggohi Bangka'nyo nu Eskol kalana panga' nu bua' nu anggur anu tinutu'akon nu aha mian Israel aijo'.

²⁵Pinoko doyonan nu aha ima-ima' na lipu' aijo' kinopinnyo pinatompulu' na sinaa, aha anu lewa' nondoyoni aijo' ninsusule'mo

²⁶ka' nompoto'imo hi Musa, hi Harun ka' hi iwi-iwi' na aha mian nu Israel anu hau-haunyo sinihukmo kiijo' i Kades, i padang bola Paran. Aha monsisikmo apaa na anu tinoamo mae nu aha ka' nompotoamo bua-bua' nu sosu'anon haha aijo' anu binoa mae nu aha.

²⁷Aha nompoto'imo hi Musa, “Kami nondoyonimo ima-ima' lipu' aijo' ka' nontoamo tano'nyo aijo' iwi-iwi' kaya ka' ma'omuk, ka' aiya sangkiding na bua' nu sosu'anon anu lengkat mae ikiijo'.

²⁸Panyo mian nu lipu' haha kiijo' to hoso-hoson. Ka' kota nu aha to daka-daka' ka' binauan bentengnyo. Ka' mule' tinoa mami aha lee' mae nu aha mian anu toto daka-daka' na butongnyo.

²⁹Mian nu Amalek jojoong sasu selatan i lipu' aijo'; mian nu Het, mian nu Yebus ka' Amori jojoong i da'erah puge'nyo; panyo mian nu Kana'an monjojoongi da'erah anu montuus ambai ka' montuusakon Kaunyo nu Yordan.”

³⁰Panyo i Kaleb nompokinde'imo da sanang na kinyonyoa nu to mia-mian anu nososonmo hi Musa. Notatae na i Kaleb, “Lipu' aijo' tionyo ahi' otumbuhintomo ka' o alantomo uuka aiya, kalana kita to hoso-hoson timbali mompokala aha.”

³¹Panyo aha mian anu ninsusule'mo mae tiba i Kaleb aijo' notatae, “Boli, kita madi' moko ala montumbuhi aha. Manjoo' na mian nu lipu' aijo' anu lebe mahoson molingkudui kita.”

³²Lantas aha nombebakonmo sisik anu baleko' hi aha mian nu Israel mongkona i lipu' anu dinoyonanmo nu aha. Aha notatae, “Lipu' aijo' mombahayai, apaa mule' aha miannyo anu monjojoongi. Aha miannyo anu tinoa mami kiijo' to daka-daka' na butongnyo.

³³ Ka' mule' kami nontoa mian haha kiijo' sumomo raksasa, lee' mae nu aha mian nu Enak. De opokakanakon tiba aha, o'oa'i mami na kami ola sumo kihi-kihi' ka' tantumo sumo aitu na aha montoa mae kami.”