Read Saluan NOMBILANGMO 14 Bible Online

NOMBILANGMO 14 - Saluan bible

NOMBILANGMO 14

¹Sampahu-pahu aha mian Israel lewa'mo moloboo' ka' lewa'mo humang.

²Aha lewa'mo monsosoli' i Musa ka' i Harun, ka' montaloakon, “Lebe ma'ima' kita matemo mae i Mesir kabai i padang bola aiya! Pojohokmo da kita matemo!

³Bau apaa na Tumpu momboa kita i lipu' aijo'? Mateje na kita i pahampatean ka' to bengke-bengkele' to, to ana-anakto nuboamo nu aha. Sahanyo lebe ma'ima' minsusule'mo i Mesir!”

⁴Lantas aha notataemo hi samian ka' samian, “Sahanyo kita mompile'imo samian anu bau polaya' ka' minsusule'mo i Mesir!”

⁵Lantas i Musa ka' i Harun tinolodadupumo i ahop nu mian da'isan.

⁶I Yosua, anak i Nun, ka' i Kaleb anak i Yefune, ua-ua' aha aijo' suele sangalu nu anu namba nondoyoni nombeakmo pakean nu aha salaku tanda talalomo hondo sinusa'.

⁷Aha notataemo hi iwi-iwi' na mian da'isan aijo', “Lipu' anu dinoyonan mami aijo' ma'ima' hondo.

⁸De Tumpu monsitujuimo kita. Ia momboamo kita mokiijo' ka' mombee'mo tano'nyo iwi-iwi' anu kaya ka' ma'omuk.

⁹ Boli panggaga hi Tumpu, ka' boli mabuhuk hi mian haha aijo' anu jojoong i lipu' kiijo', kalana dengke na kita mompatundu' aha. Anu monjagai aha nompala'imo aha, panyo Tumpu na monsangalui ahi kita. Jadi, boli mabuhuk.”

¹⁰Iwi-iwi' na mian da'isan mongkahanda'imo mompahambunu'akon aha nu batu sampe mate. Panyo monti-montiik mian haha aijo' nontoamo jingka nu Tumpu tinokamo aijo' i Kemah-Nyo.

¹¹Tumpu notataemo hi Musa, “Daagi' hipian na kopinnyo na mian haha aijo' panggaga hi beleng-Ku? Sampe toka hipian na aha madi' mongka'oho' palesaya hi beleng-Ku, padahan Aku nombaumo manjoo' hondo na anu okabangangi hi aha?

¹²Ku silakaimo na aha nu panyakit anu molele! Panyo beleyum Ku potimbalimo Tuuma nu sa'angu' na bansa anu lebe daka' ka' lebe mahoson molingkudui aha!”

¹³ Lantas i Musa notataemo hi Tumpu, “O, Tumpu, nuhongomo mae nu aha mian Mesir na han aijo'! Padahan kalana kakuasa'an nu Belento, sahingga Belento nomboamo mae kami nosabat lengkat i lipu' aijo',

¹⁴ka' aha monsisikje hi to mia-mian i lipu' aijo', anu nohongomo taalu' Belento, Tumpu, nonsangaluimo mae kami. Aha nohongomo mule' taalu' Belento, Tumpu, nanintoamo hi kami tempo'nyo Belento i lumajangmo namba momona hi kami i uno nu kundom de sinaamo, ka' i uno nu apu de pihimo.

¹⁵De Belento mompateimo iwi-iwi' na mian anu pinalesayamo hi Belento aiya saba' to bansa-bansa anu toho'mo nohongo kakuasa'an nu Belento aijo' montaloakonmo tukoonyo,

¹⁶Belento nompateimo mian anu pinalesayamo hi Belento i padang bolaa kalana Belento madi'mo moko ala momboa aha i lipu' anu jinanji'mo nu Belento.

¹⁷Kalana aijo', Tumpu, ku kakase potoa mae na kakuasa'an nu Belento hi kami ka' obau na anu jinanji'mo nu Belento. Belento notataemo,

¹⁸ ‘Aku, Tumpu, madi' malia' pusa. Ku potoamo na kalibosan-Ku ka' kanonongan-Ku molabi-labi. Aku mongampuni mian anu baladosa' ka' anu panggaga hi beleng-Ku. Mau mule' sumo aijo', kasala'an nu tu'anyo saidi' mae Ku balosakonje hi to ana-anaknyo ka' hi to maku-makumpunyo, sampe toka i lee'nyo anu ko totolu'nyo ka' ko opatnyo.’

¹⁹Uuka aiya Tumpu, kalana daka' na kalibosan nu Belento ka' Belento sabole-bole montoongi janji' nu Belento, ku kakase ampuniakon mae na dosa' nu mian haha aiya susumo Belento nongampunimo aha salatanmo pe'e aha nompala'i mae tano' nu Mesir.”

²⁰Lantas tinaaman nu Tumpu, “Ma'ima'mo, Ku ampunimo na aha susumo anu pinoitamo nu beleyum.

²¹ Panyo Aku balajanji' i butong-Ku ka' kalana Aku anu tumuu' ka' mongkuasai dunia aiya,

²²saba' mian haha aiya madi'mo daagi' ko samian pe'e na anu daagi' tumuu' minsoop i lipu' anu jinanji'-Kumo hi mompolee' nu aha. Kalana aha madi' mongka'oho' tulu-tulutan hi beleng-Ku ka' saja' monsoba-soba Aku. Padahan aha nontoamo jingkang-Ku anu jongkilaban ka' anu okabangangi, anu binaung-Kumo i Mesir ka' i padang bola.

²³Madi'! Aha madi' timbali minsoop i lipu' aijo'. Aha anu pinanggagamo hi beleng-Ku madi' ko samian pe'e na timbali mompeja' lipu' aijo'.

²⁴ Panyo madi' sumo aijo' na posaihon-Ku i Kaleb. Ia saja' tulu-tulutan hi beleng-Ku. Kalana aijo' ku boa na ia i lipu' anu pininsoopannyomo. Uuka aiya aha mian nu Amalek ka' aha mian nu Kana'an jojoong kiijo' i bangka'nyo. Panyo da'erah aijo' saidi' mae timbalimo anu nu lee' i Kabel, posaihon-Ku aijo'. Dodop belemiu tionyo ahi' minsusule'mo mambamo i padang bola sasu Luoknyo nu Akaba.”

²⁶Tumpu notataemo hi Musa ka' hi Harun.

²⁷“Sampe toka hipian na mian haha aiya anu toto ide-idek na kinyonyoanyo mososon mae hi beleng-Ku? Iwi-iwi' na pososon nu aha i hongong-Kumo.

²⁸Belemiu tionyo ahi' montaami aha sumo uuka: Tumpu notatae, ‘Aku basumpa' i butong-Ku anu tumuu' taalu' belemiu Ku potimbalije susumo anu tinaloakonmo miu hi beleng-Ku. Aku, Tumpu, notataemo.

²⁹ Belemiu nososonmo hi beleng-Ku.

³⁰Kalana aijo' belemiu tionyo ahi' matemo ka' bangke' nu belemiu motanatamo i padang bola aiya. Olamo i Kaleb ka' i Yosua na anu daagi' tumuu', madi' ko samian pe'e anu atina' hi belemiu anu umunnyo uampulu'mo na taun mokiita' na timbali minsoop i lipu' anu jinanji'-Kumo hi belemiu.

³¹Belemiu notataemo tukoonyo nu belemiu to ana-anak nu belemiu saidi' mae o hakopmo ka' oboamo. Padahan ahamo ahi' na anu Ku boa i lipu' anu madi'mo o ala nu belemiu aijo' ka' lipu' aijo' saidi' mae timbalimo tano' nu aha.

³²Panyo belemiu matemo i padang bola aiya.

³³ Patompulu' na taun na kopinnyo to ana-anak nu belemiu mololo i padang bola. Kalana belemiu madi' tulu-tulutan, anak nu belemiu haha aijo mongoa'imo kasansala'an sampe to tu'a-tu'anyo anu daagi' mae i hampe i Mesir silakamo.

³⁴Belemiu saidi' mae montanggungmo hukuman nu dosa' nu belemiu kopinnyo patompulu' na taun; sataun toto patompulu' na sinaa na olotnyo, sansinaa na opake monselidiki tano' aijo'. Osumbu'je nu belemiu mosia de Aku mongka'idekimo belemiu!

³⁵Aku basumpa', saba' Aku mombaumo han aijo' hi belemiu ka' hi mian haha aijo' anu nosangaja'mo, mongka'ideki mae Aku. I padang bola aiya belemiu iwi-iwi' silakamo. Aku, Tumpu, notataemo.’ ”

³⁶To mia-mian anu sinaimo i Musa da monselidiki tano'nyo aijo' ninsusule'mo mae, panyo nomboamo mae lele anu madi' totu'u mongkona lipu' aijo' ka' han aijo' nonsaduakonmo aha mian Israel nososonmo hi Tumpu. Kalana aijo' Tumpu nohukumo aha sahingga aha sinilakamo kinona nu panyakit.

³⁸Aha sampulu' ka' ohua' na anu namba nondoyoni, ola i Yesua ka' i Kaleb na anu daagi' tutuu'.

³⁹Pinoko sisik i Musa na potuunon nu Tumpu hi bansa Israel aijo', bansa aijo' sinusa'mo.

⁴⁰Dodododopnyo subu-subu hondo mogogau'mo na aha kahanda'mo mindako i bungkutnyo. Aha notataemo, “Memang kami binaladosa'mo. Panyo uuka aiya kami mogogau'mo da mambamo i tampat anu pinotiju'mo nu Tumpu.”

⁴¹Panyo i Musa notataemo, “Kadaka' belemiu madi' mohongo-hongo palentah nu Tumpu? Madi' kogunanyo na mokiita'!

⁴²Boli mamba! Belemiu nupatundu'mo nu anu monsampobali' belemiu kalana Tumpu madi' monsangalui belemiu.

⁴³De belemiu mahandupa'mo tiba mian nu Amalek ka' mian nu Kana'an aijo', belemiu silakamo i pahampatean. Tumpu madi'mo monsangalui belemiu kalana belemiu madi' tulu-tulutan hi Ia.”

⁴⁴Panyo aha mian Israel haha aijo' daagi' ahi' sabole-bole junjuhi' na mamba i bungkutnyo aijo', maumo i Musa ka' Peti' Palajanjian aijo' na madi' ahi' nompala'i kemah nu aha haha aijo'.

⁴⁵Sahingga aha mian nu Amalek ka' aha mian nu Kana'an anu jojoong kiijo' mae nontumbuhimo mae ka' nompatundu'mo aha mian Israel haha aijo' ka' mule' nololoi'mo aha tinoka-toka i Horma.