Read Saluan NOMBILANGMO 15 Bible Online

NOMBILANGMO 15 - Saluan bible

NOMBILANGMO 15

¹Tumpu nombee'mo atulan haha aiya hi Musa,

²anu tionyo ahi' obau nu aha bansa Israel i lipu' anu obee'je nu Tumpu hi aha.

³Mongkona koloban anu opotunu kabai koloban pombayan anu i niatakonmo kabai koloban kasanangan nu kinyonyoa kabai anu okolobanakon i lamean anu biasamo obau, belemiu timbali monsombahkon hi Tumpu: sapi' lakinyo, domba lakinyo, domba kabai mee'. Hongohisnyo nu koloban haha aijo' momposanangmo kinyonyoa nu Tumpu.

⁴De ihe na monsombahkon domba kabai mee' bau koloban anu opotunu bau bagi nu Tumpu, tionyo ahi' oboa suele hingga-hinggat toto sa'angu' na potuu'on aijo', sa'angu' na kilogram na labu ogalo'i nu sa'angu' na liter na lanya' nu zaitun bau koloban anu okaan ka' suele sa'angu' na liter na anggur.

⁶De anu okolobanakon aijo' sa'angu' na domba lakinyo, tionyo ahi' osombahkon suele ohua' na kilogram na labu' ogalo'i nu sa'angu' ka' mintonga' na liter na lanya' nu zaitun bau koloban kaanon,

⁷ka' mule' sa'angu' ka' mintonga' na liter na anggur. Hongohisnyo nu koloban aijo' momposanangmo kinyonyoa nu Tumpu.

⁸De anu okolobanakon aijo' sa'angu' na sapi' lakinyo bau koloban anu opotunu kabai koloban bau pombayan anu i niatakonmo kabai koloban bau pompodame,

⁹tionyo ahi' osombahkon suele totolu' na kilogram na labu'ogalo'i lanya' nu zaitun ohua' na liter bau koloban kaanon

¹⁰ka' ohua' na liter na anggur. Hongohisnyo nu koloban aijo' momposanangmo kinyonyoa nu Tumpu.

¹¹Aijo'mo na anu tionyo ahi' osombahkon hingga-hinggat tiba sa'angu' na sapi' lakinyo, domba lakinyo, domba kabai mee'.

¹²De anu okolobanakon aijo' madi' ola sa'angu' na potuu'on, saba' labu anu osombahkon, lanya' ka' anggur aijo' suele tionyo ahi' otuangi panyo o unggali ahi' da sitimbang.

¹³Han aijo' tionyo ahi' nu bau nu aha mian Israel de ia monsombahkonmo koloban. Hongohisnyo nu koloban aijo' momposanangmo kinyonyoa nu Tumpu.

¹⁴Mian anu lengkat mae isalipu'an anu jinojoongmo i lipu' nu belemiu mau ola sasaingoni' kabai jojoongmo sidu-sidutu' tionyo ahi' montuluti iwi-iwi' na atulan aijo' de ia monsombahkonmo koloban kaanon anu hongohisnyo momposanangmo kinyonyoa nu Tumpu.

¹⁵ Iwi-iwi' na atulan tiba palentah pokakana na mompojalan hi belemiu tiba hi mian anu lengkat mae i salipu'an anu jinojoongmo i lipu nu belemiu, kalana belemiu tiba aha pokakana i ahop nu Tumpu. Ka' han aijo' obau sampe toka sidu-sidutu'.

¹⁷Tumpu nombee'mo hi Musa

¹⁸atulan haha aiya anu tionyo ahi' obau nu bansa Israel i lipu' anu obee'je nu Tumpu hi aha.

¹⁹De belemiu mongkaanmo apaa na anu ohumpak i lipu' aijo' belemiu tionyo ahi' mompotade sambagian anu osombahkon samata-mata bau bagi nu Tumpu.

²⁰De belemiu montunumo roti nu gandum momona pinadak na binau roti, aijo' tionyo ahi' osombahkon salaku koloban samata-mata hi Tumpu. Bau-baunyo nu monsombahkon pokakana tiba bau-baunyo nu monsombahkon gandum anu momona giniling nu belemiu.

²¹Sampe toka sidu-sidutu' batu-batu roti anu gandum momona pinadak na binau roti, aijo' tionyo ahi' obee' nu belemiu salaku anu samata-mata osombahkon hi Tumpu.

²²De saintolo-tolo madi' ototonggolakon belemiu tongkolilimo na mombau sala'sa'angu' na atulan anu binee'mo nu Tumpu hi Musa, otampu'uni lengkat i sinaa nu Tumpu nombee'mo atulan aijo' ka' sampe toka aiya mae i ahop molundu-lundu na tulunan, ka' kasala'an aijo' binau kalana mian madi' monsumbu' atulan, saba' iwi-iwi' na mian tionyo ahi' monsombahkon sa'angu' na sapi' lakinyo bau koloban anu opotunu. Hingga-hinggat tiba aijo' tionyo ahi' osombahkon na koloban kaanon ka' anggur susumo anu tinantukanmo. Hongohisnyo nu koloban aijo' momposanangmo kinyonyoa nu Tumpu. Ka' mule' tionyo ahi' okolobanakon sa'angu' na domba lakinyo bau koloban pongampuni dosa'.

²⁵Lantas imam tionyo ahi' mombaumo atulannyo anu bau pongampuni dosa' nu aha mian. Sahingga aha o ampunimo kalana kasala'an aijo' madi' tinotonggolakon na nombau, ka' kalana aha nombaumo koloban pongampuni dosa' tiba koloban anu opotunu bau bagi nu Tumpu.

²⁶Iwi-iwi' na aha mian Israel tiba mian anu lengkat mae i salipu'an anu jinojoongmo atina' hi belemiu, o ampunimo, kalana iwi-iwi' pinosoopmo i kasala'an anu madi' tinotonggolakon aijo'.

²⁷ De samian na baladosa' kalana madi' tinotonggolakon, saba' ia tionyo ahi' mongkolobanakon sa'angu' na mee' behenyo anu umunnyo sataunmo bau koloban pongampuni dosa'.

²⁸Imam tionyo ahi' mombau pongampuni dosa' hi ahop nu Tumpu, da mian aijo' o ampuni na dosa'nyo.

²⁹Atulan aijo' opokona suele, maumo pa' hi he na anu nombaumo dosa' anu madi' tinotonggolakon, maumo hi aha mian Israel kabai mian anu lengkat mae i salipu'an anu tinataapmo na jinojoong hi aha.

³⁰Panyo de aha mian Israel kabai mian anu lengkat mae i salipu'an ototonggolakonmo na mombau dosa' ia monteemo Tumpu. Mian aijo' tionyo ahi' o hukumo mate,

³¹kalana ia madi'mo nohongo-hongo Tumpu, ka' nontotonggolakonmo nolanggai palentah nu Tumpu. Mian aijo' sinilaka kalana posi kasala'annyo.

³²Tempo'nyo aha mian Israel kiijo'mo i padang bola, samian na mo'ane i humpak hau-haunyo mongala kau' anu oposun padahan sinaamo nu Sabat.

³³Mian aijo' pinopangadapmo hi Musa, ka' hi iwi-iwi' na mian,

³⁴lantas ia tinahanmo kalana ma'isa tantu pa' oposia na ia.

³⁵Tumpu notataemo hi Musa, “Mian aijo' tionyo ahi' o hukum mate. Ia tionyo ahi' oboamo i sambiha'nyo nu kemah, ka' toka ikijo' mae iwi-iwi' na mian tionyo ahi' mompahambunu'akonmo ia nu batu, sampe silaka.”

³⁶Sahingga iwi-iwi' na mian nomboamo ia, i sambiha'nyo nu kemah ka' nompahambunu'akonmo nu batu ia sampe sinilakamo, susumo anu pinalentahkonmo nu Tumpu.

³⁷Tumpu nompokaumo i Musa,

³⁸ da opoto'i hi bansa Israel, “Opokonai jambu-jambunyo i pani' nu baju' nu belemiu ka' posegoti kahohon mobilu' hi toto sa'angu' na jambu-jambunyo. Aijo' tionyo ahi' saja' obau nu belemiu sampe molundu-lundu na tulunan.

³⁹Jambu-jambunyo aijo' salaku bau pompotuka': De otoamo nu belemiu na aijo', belemiu tonginau'mo hi palentang-Ku iwi-iwi', ka' montulutimo. Ka' kalana daagi' ko aijo'nyo belemiu madi' mongkolilimi Aku, sahingga madi'mo montuluti posi pongka'oho' nu butong.

⁴⁰Jambu-jambunyo aijo' na mompotuka' hi belemiu da montuluti palentang-Ku iwi-iwi', sahingga belemiu totu-totu'u anung-Ku'mo.

⁴¹Akumo na Tumpu Allah nu belemiu; Aku nomboamo mae belemiu nosabat lengkat mae i Mesir, da Akumo na Tumpu Allah nu belemiu, Akumo na Tumpu.”