Read Saluan NOMBILANGMO 19 Bible Online

NOMBILANGMO 19 - Saluan bible

NOMBILANGMO 19

¹Tumpu nompalentahmo i Musa ka' i Harun

²da mombee'mo atulan haha aiya hi bansa Israel: Ala na sapi' sa'angu' behenyo anu momea' ka' anu madi' ko panyakitnyo ka' ma'isa toho' pinake nohela' boaon.

³Bee' na sapi' aijo' hi Imam Eleazar. Binatang aijo' tionyo ahi' oboa i sambiha'nyo nu kemah lantas okolotmo i ahop nu imam.

⁴Lantas tionyo ahi' nu ala i Imam Eleazar na baso'nyo sangkiding nu binatang aijo' ka' opipi'akon pimpitun mokiijo' i sasu Kemah nu Tumpu.

⁵Iwi-iwi' na binatang aijo', sagalamo kilitnyo, antoknyo, baso'nyo ka' isi nu kompongnyo, tionyo ahi' opotunu i ahop nu imam.

⁶Ka' mule' imam tionyo ahi' mongala kau' aras sangkiding, sampanga' na kau' hisop ka' sampelu' na kahohon momea' lantas olumbu'akon mokiijo' i apu anu hau-haunyo pinompotunuanmo sapi' momea' aijo'.

⁷Lapas aijo' imam tionyo ahi' mombaso'imo baju'nyo ka' mindii'mo, lapas aijo' ia timbalimo minsoop i kemah, panyo ia daagi' mahumimi' sangkutnyo sinaa makakinsapmo.

⁸Mian anu nompotunu sapi' aijo' suele tionyo ahi' mombaso'i baju'nyo ka' mindii'mo, ia suele daagi' mahumimi' sangkutnyo sinaa makakinsapmo.

⁹ Lantas ihehe na anu madi' mahumimi' tionyo ahi' molimu' abu' nu sapi' aijo' ka' mompo'una' i tampat anu lomas i sambiha' nu kemah. Abu' aijo' opo'una' ikiijo' da aha mian nu Israel timbali mongala da bau ponggalo'i uee anu opake i adat momposusi' bau pongalini dosa'.

¹⁰Mian anu molimu' abu' nu sapi' aijo' tionyo ahi' mombaso'i baju'nyo, panyo ia mahumimi' sangkutnyo sinaa makakinsapmo. Atulan aijo' opake sampe toka sidu-sidutu', mau kona hi aha mian nu Israel maumo suele hi aha mian anu lengkat mae i salipu'an anu jinojoongmo tataap hi aha.

¹¹Mian anu nongkanyangmo mian anu sinilakamo mahumimi'mo pitun sinaa na kopinnyo.

¹²I sinaa ko itolunnyo ka' ko ipitunnyomo ia tionyo ahi' momposusi'mo butongnyo nu uee anu opake momposusi', atina'je ka' ia belesi'mo. Panyo de toka i sinaa ko itolunnyo ka' ko ipitunnyo ia madi' mompobelesi butongnyo, ia tataap mahumimi'.

¹³Mian anu monsala' kanyangmo anu sinilakamo ka' madi' momposusi' butongnyo aijo' mahumimi'mo, kalana ia ma'isa dinudu'an nu uee anu momposusi'. Ia mohumimi'imo Kemah nu Tumpu kalana aijo' ia madi'mo daagi' oposoop mian anu pinalesayamo hi Tumpu Allah.

¹⁴De ihehe na silaka i uno nu sa'angu' na kemah, mau mule' pa' ihe na anu daagi' i uno nu kemah aijo' kabai minsoop i unonyo, mahumimi'mo pitun sinaa na kopinnyo.

¹⁵Iwi-iwi' na selekan ka' kuhon anu madi' ko kolopnyo suele mahumimi'mo.

¹⁶Batu-batu mian anu nonsala' kanyangmo mian anu sinilakamo kalana pinatean, kabai anu nosi silaka i ale' nahumimi'mo pitun sinaa na kopinnyo. Sumo aijo' mule' na mian anu nonsala' kanyangmo pinongkubunan kabai buku nu mian anu sinilakamo.

¹⁷Bau pomposusi' mian anu nahumimi'mo aijo', tionyo ahi' mongala sangkiding abu' nu sapi' momea' behenyo anu pinotunumo da bau pongalini dosa'. Abu' aijo' tionyo ahi' opo'isi i sa'angu' na kuhon lantas o isi nu uee anu o ala i uee anu mo'ili.

¹⁸Han anu momona aijo'mo de daagi' ko mian anu silaka i uno nu kemah, mian anu madi' mahumimi' tionyo ahi' mongala sampanga' na hisop ka' olobongakon i uee aijo', lantas opipi'akon i kemah ka' iwi-iwi' na apaa anu daagi' kiijo' i unonyo, ka' suele to mia-mian anu ikiijo'. Han anu ko ohua'nyo aijo'mo de ihehe na mian anu monsala' kanyangmo anu sinilakamo, kubulan kabai buku nu mian anu sinilakamo, mian anu madi' mahumimi' na tionyo ahi' mompipi'i mian anu nahumimi'mo aijo', tiba jalan suele sumo aijo'.

¹⁹Ia tionyo ahi' mompipi'i i sinaa ko itolunnyo ka' ko ipitunnyo. I sinaa ko ipitunnyo aijo' lapasmo na atulannyo momposusi' mian anu nahumimi'mo aijo'. Mian aijo' tionyo ahi' mombaso'imo baju'nyo ka' mindii'mo. Mulai sinaa makakinsapmo ia belesi'mo.

²⁰Mian anu nahumimi'mo panyo madi' mombau atulannyo pomposusi' butong tataap mahumimi' kalana ma'isa dinudu'an nu uee anu bau pomposusi'. Ia mohumimi'imo Kemah nu Tumpu ka' madi'mo oposoop mian anu pinalesayamo hi Tumpu Allah.

²¹Atulan aijo' opake sampe toka sidu-sidutu'. Mian anu mompipi'akon uee anu opake i atulan aijo' tionyo ahi' mombaso'i baju'nyo, ka' to mia-mian anu nukonamo nu uee aijo' mahumimi'mo suele sangkutnyo sinaa makakinsapmo.

²²Pakakas anu nusala' kanyangmo nu mian anu nahumimi'mo aijo' suele mahumimi'mo, ka' mian sangga'at anu monsala' kanyangmo ia, mahumimi'mo suele sangkutnyo sinaa makasinsapmo.