Read Saluan NOMBILANGMO 21 Bible Online

NOMBILANGMO 21 - Saluan bible

NOMBILANGMO 21

¹ Arad sa'angu' na kota i sasu selatan lipu' na Kana'an. Salatan Tomundo nu kota aijo' nohongomo taalu' mian nu Israel tinokamo mae nontulu jalan nu Atarim, nambamo na ia nontumbuhi aha ka' nohakopmo tino pia-piangkuka mae na aha.

²Lantas mian nu Israel nonjanji'mo sumo uuka hi Tumpu, “De Belento mombee'i mae kami ka'untungan mahampate mongewa bansa aijo' aha tiba kota nu aha haha aijo' o ideimo mami ingko-ingkot.”

³Tumpu nontalimamo poitaon nu mian Israel ka' nontulungimo aha nompatundu'mo mian nu Kana'an. Sahingga aha mian nu Israel nompateimo aha mian nu Kana'an haha aijo' ka' nongideimo kota nu aha haha aijo', lantas tampat aijo' sinanggohanmo nu aha Horma.

⁴ Lapas aijo' aha mian nu Israel nompala'imo Bungkutnyo nu Hor, ka' nontulumo jalan nokiijo' i Luoknyo nu Akaba, montikubi da'erah nu Edom. Panyo i tonga' nu jalan bansa aijo' madi'mo sinabaan,

⁵ ka' nososonmo hi Tumpu Allah ka' hi Musa. Aha notatae, “Kadaka' belento nomboamo mae kami nosabat lengkat i Mesir? Pa' kahanda'mo mompatei kami i padang bola aiya? I aiya madi' ko anu okaan, ka' uee mule' imadi'an. Kami na osamo na nongkaan anu madi' ko nyamitnyo aiya!”

⁶Sahingga Tumpu nompotokamo mae ulo anu toto bisa-bisa' hi bansa aijo'. Manjoo' na aha mian nu Israel sinilaka binahe' nu ulo haha aijo'.

⁷Lantas bansa aijo' tinokamo nangadap hi Musa ka' notatae, “Kami binaladosa'mo kalana nososonmo hi Tumpu ka' hi belento. Do'akon mae hi Tumpu da ulo haha aiya bolimo toka mae hi kami.” Sahingga i Musa nondo'akonmo bansa aijo'.

⁸Lantas nompokaumo na Tumpu i Musa da mombau sa'angu' na ulo tambaga ka' opotedang i sa'angu' na kau' anu gagana' mantan. Batu-batu mian anu binahe'mo nu ulo haha aijo' timbali ma'alin de montoamo ulo tambaga aijo'.

⁹ Sahingga i Musa nombaumo ulo tambaga ka' pinotedangnyomo i sa'angu' na kau' anu gagana mantan. Batu-batu mian anu bunahe'mo nu ulo haha aijo' timbali ma'alin de montoamo ulo tambaga aijo'.

¹⁰Po'ule' mule' aha mian nu Israel namba, lantas nombaumo kemah i kota Obot.

¹¹Salatan nompala'imo tampat aijo' aha nombaumo kemah i tampat kinahansunan nu Abarim i padang bola sasu kabete'an i da'erah Moab.

¹²Lapas aijo' aha nombaumo kemah i Bangka'nyo nu Zered.

¹³Lengkat ikiijo' aha nompo'ule'mo namba ka' nombaumo kemah i santoa nu Kaunyo nu Arnon, i padang bola sasu mokiijo' i da'erah nu mian Amori. Kaunyo nu Arnon aijo' salakumo bau potempasan da'erah nu mian Moab tiba da'erah nu mian Amori.

¹⁴Aijo' na sababnyo i Kitab anu nonsisikakon Pahampatean nu Tumpu tinulis: “… Kampung Waheb, i da'erah Sufa ka' i bangka'nyo haha aijo'; Kaunyo nu Arnon,

¹⁵ka' ampinyo, nu bangka'nyo haha aijo' anu sasu nokiijo' toka-toka i kampung Ar ka' mompatui potempasan nu aha da'erah mian nu Moab.”

¹⁶Lengkat ikiijo' aha nambamo i tampat anu osanggohi Beer, alati'nyo to bubu-bubung. Ikiijo' Tumpu toho'mo notatae hi Musa, “Palentahkon da mian sihuk mae; Ku bee'imo na aha uee.”

¹⁷Tempo'nyo aitu aha bansa Israel nonyanyiakonmo lagu sumo uuka, “O, to bubu-bubung pimbubuamo mae na uee nu beleyum olabotmo mami nu lagu.

¹⁸Bubung anu kineke nu to tu'a-tu'anyo ka' to pola-polaya' nu bansa, kineke nu tokon nu kapalentahannyo ka' tiba tokon aijo' salaku tanda kakuasa'an nu aha.” Lengkat i padang bola aha nolalinmo namba i Matana,

¹⁹ka' lengkat ikiijo' nambamo i Nahaliel, lantas nambamo nokiijo' i Bamot,

²⁰lapas aijo' nambamo i bangka'nyo i da'erah nu aha mian nu Moab, i aluknyo nu Bungkutnyo nu Pisga anu mongahopi padang bola.

²¹Lantas bansa Israel nonsaimo bobotokon hi Sihon, tomundo nu Amori, da mompotoka potuunon sumo uuka,

²²“Pobee' mae na kami montului lipu' nu belento Tuanku. Kami ka' potuu'on mami madi' mosele i jalan ka' madi' minsoop i pongale'an kabai i ale' nu anggur kabai monginum uee nu bubung haha kiijo' kami saja'je lumajang i jalan daka' sampe kami mompala'imo da'erah nu belento Tuanku.”

²³Panyo i Tomundo Sihon madi' nompobee' aha mian nu Israel montulu lipu'nyo. Ia nomposihukmo suludadunyo lantas nambamo nokiijo' i Yahas i padang bola ka' nontumbuhimo aha mian nu Israel ikiijo' mae.

²⁴Panyo aha nahampate aijo' manjoo' na suludadu nu aha Amori pinatean nu aha mian Israel. Lantas aha mian nu Israel nompalentahmo da'erah nu aha lengkat mae i Kaunyo nu Arnon tinoka-toka i Kaunyo nu Yabok; aijo'mo potempasan nu da'erah nu aha mian Amon, kalana potempasannyo aijo' mahoson na suludadunyo.

²⁵Kalana aijo' mian nu Israel nongkuasaimo iwi-iwi' na kota nu mian Amori, tibamo Hesybon ka' iwi-iwi' na kota toto ise-ise' sangga'atannyo, lantas jinojoongmo na aha ikiijo'.

²⁶Hesybon puso nu kota i Tomundo Sihon. Ia toho'mo nahampate nongewa i Tomundo nu aha Moab ka' nompalentah da'erahnyo kojo'onnyo tinoka-toka i Kaunyo nu Arnon.

²⁷Mokonyo aijo' mian pande nombaumo pantun sumo uuka, “Toka mae i Hesybon, i kota Tomundo Sihon. Kami kahanda'mo montoa kota aiya opotinjo ka' po'ule'mo opoko piani.

²⁸ Daagi' kino minsan lengkat i kota aiya suludadu nu Sihon nambamo nontumbuhi sumomo ahi' apu. Anu nongideimo kota Ar i da'erah Moab, ka' nongkuasaimo iwi-iwi' na puge'nyo nu Arnon.

²⁹Paya' na bansa Moab, belemiu silakamo! Anu monsombah Kamos, beleyum silakamo! Beleyum nupojohokmo nu Tumpu Allah nu beleyum da timbalimo anu saja' mopalai, to bou-boune nu belemiu nuhakopmo nu Tomundo Amori.

³⁰Panyo uuka aiya silakamo na lee' nu aha lengkat mae i Hesybon mokiijo' i jalan mamba i Dibon, lengkat mae i Nasyim mokiijo' i Nofah koko Medeba.”

³¹Salatan sumo aijo' bansa Israel jinojoongmo i da'erah Amori.

³²Lapas aijo' i Musa nonsaimo to mia-mian mamba molio jalan anu ma'ima' hondo na pontumbuhian kota Yaezer. Lantas mian nu Israel nompatundu'mo kota aijo' tiba kota toto ise-ise' sangga'atannyo ka' nolaa'mo mian nu Amori anu jojoong ikiijo' mae.

³³Lapas aijo' mian nu Israel nombangkulilitmo, nongala jalan anu mokiijo' i Basan. Tomundo Og tiba suludadunyo nontumbuhimo mae aha mian nu Israel i kota Edrei.

³⁴Tumpu notataemo hi Musa, “Boli mabuhuk hi ia. Ku bee'ije kauntungan de mahampate na beleyum. Ohungku'ije nu beleyum na ia, iwi-iwi' na miannyo ka' lipu'nyo. Yayamo na mombau aha susumo anu binaumo nu beleyum hi Tomundo Sihon anu nompalentahmo kiijo' mae i Hesybon.”

³⁵Sahingga mian nu Israel nompatundu'mo ka' nompateimo Tomundo Og, to ana-anaknyo ka' iwi-iwi' na miannyo, madi' ko anu tinontuha'. Lapas aitu aha nompalentahmo lipu' aijo'.