Read Saluan NOMBILANGMO 23 Bible Online

NOMBILANGMO 23 - Saluan bible

NOMBILANGMO 23

¹Notatae na i Bileam hi Balak, “Baui mae na aku i tampat aiya popitu' na mezbah, ka' posadia popitu' na sapi' lakinyo ka' popitu' na domba lakinyo i aiya.”

²I Balak nombaumo susumo apaa na anu tinaloakonmo i Bileam hi ia. I toto sa'angu' na mezbah aijo' aha nonsombahkonmo toto sa'angu'an na sapi' lakinyo ka' sa'angu' na domba lakinyo.

³Lantas i Bileam notataemo hi Balak, “Tinjomo koko koloban anu pinotunumo nu belento Tuanku. Hau-haunyo aijo' aku mambamo montoa pa' Tumpu kahanda' singkabot tiba aku kabai madi'. Ku poto'ije iwi-iwi' apaa na anu nutaloakon mae nu Tumpu hi belengku.” Jadi nambamo na i Bileam sausa'nyo aita' mae i sa'angu' na bungkutnyo,

⁴i kiita' mae Tumpu Allah tinokamo hi ia. Notataemo na i Bileam hi Tumpu Allah, “Aku nombaumo popitu' na mezbah ka' nonsombahkonmo sa'angu' na sapi' lakinyo ka' sa'angu' na domba lakinyo i toto sa'angu' na mezbah aijo'.”

⁵Lantas Tumpu nompoto'imo hi Bileam apaa na anu tionyo ahi' nutaloakon, ka' monsaimo ia po'ule' ninsusule' hi Balak da mompotoka potuunon nu Tumpu hi ia.

⁶I Bileam ninsusule'mo ka' tinokannyo na i Balak daagi' tinjo-tinjo koko koloban anu pinotununyomo tiba iwi-iwi' na to pola-polaya' nu aha Moab.

⁷Lantas i Bileam nompoto'imo sisikonnyo sumo uuka, “Lengkat mae i Aram, bungkutnyo kiijo' mae i sasu kabete'an, i Balak, tomundo nu aha Moab nolagamo aku, ka' notatae, ‘Tokamo mae, poto'i mae hi belengku. Kutukimo na bansa Israel aijo'!’

⁸Te toho' mule' aku mongkutuki, de Tumpu Allah madi' mongkutuki? Te toho' mule' aku mohukum, de Tumpu madi' mohukum?

⁹Lengkat mae aita' i bungkutnyo iwi-iwi' tinoangkumo na aha; lengkat mae aita' i puge'nyo iwi-iwi' tinanggalakonkumo na aha. Toa, sa'angu' na bansa nosi po'iwi'mo madi' minsoop hi tompukan nu bansa-bansa sangga'at.

¹⁰Lee' mae i Yakub sumomo abu' madi'mo opoko bilang; bansa Israel konjoo'nyo tahahumo. O'amalakon da aku silaka susumo mian anu hodi' na kinyonyoanyo bisa-bisa' ukunku sumo ukun nu mian haha aijo'.”

¹¹Lantas notataemo na i Balak hi Bileam, “Apaa na anu nu bau hi belengku? Beleyum binoang-Ku mae aiya da mongkutuki iwi-iwi' na sampobali'ku. Panyo ola mule' beleyum mombalakati aha.”

¹²Tinaaman i Bileam, “Aku ola timbali montaloakon apaa na anu nupoki poto'i nu Tumpu.”

¹³Lantas i Balak notataemo hi Bileam, “Imbo' da kita mambamo hingga-hinggat i tampat sangga'at; ikiijo' mae nu toaje ola sambahagian na bansa Israel. Okutukije na aha ikiijo' mae.”

¹⁴Sahingga i Balak nomboamo i Bileam namba i padang Zofim, i bawo nu Bungkutnyo Pisga. Ikiijo' mae suele ia nompotinjomo popitu' na mezbah ka' nonsombahkonmo sa'angu' na sapi' lakinyo ka' sa'angu' na domba lakinyo i mezbah aijo' toto sa'angu'.

¹⁵Notataemo na i Bileam hi Balak, “Jojoongmo i aiya, koko koloban anu pinotunumo nu belento Tuanku, hau-haunyo aku mamba monsingkaboti Tumpu aijo' mae.”

¹⁶Tumpu nonsingkabotimo i Bileam ka' nompoto'imo hi ia apaa na anu tionyo ahi' nutaloakon, lantas nonsaimo ia da po'ule'mo minsusule' hi Balak mompoto'i potuunon nu Tumpu aijo'.

¹⁷Sahingga ninsusule'mo na i Bileam ka' nontokai i Balak daagi' tinjo-tinjo koko koloban anu pinotununyomo hingga-hinggat tiba to pola-polaya' nu aha Moab. I Balak nompokilawamo apaa na anu pinoto'imo mae nu Tumpu.

¹⁸Lantas i Bileam nompoto'imo apaa na anu jadi, sumo uuka, “O, Balak, anak i Zipor, imbo' toka mae aiya potombihing apaa na anu kahanda' ku taloakon.

¹⁹Tumpu Allah madi' sumo manusia anu sampa mompele-pele' ka' mongka'ima'i baleko'. De Tumpu Allah balajanji' sabole-bole Nu ganapi! De Ia motataemo tantu tionyo ahi' jadi!

²⁰Aku sinai mae da mombalakati; ka' de Tumpu Allah mombalakatimo, madi'mo po'ule' Nu babali'i.

²¹Hi Yakub madi' tinoa na hahan anu ma'idek; hi Israel madi' tinoa na kasusa'an. Tumpu, Tumpu Allah nu aha, monsangalui aha. Aha lewa'mo noloboo'akon; Iamo na Tomundo!

²²Tumpu Allah anu nomboamo mae aha nosabat lengkat mae i Mesir; sumo sapi' anu ma'ela', Ia nahantandukmo nonsangaja'i aha.

²³Madi' ko ajimat anu mongkona i Yakub madi' ko to boli-bolian anu moko ala mombau apa-apaa hi Israel. Mongkona bansa aijo' mian notatae, ‘Toa na hahan anu okabangangi anu binaumo nu Tumpu Allah!’

²⁴Bansa aijo' tinuminjomo sumomo singa behenyo, ka' tinuminjomo sumomo singa lakinyo. Ia madi' lumukut de ma'isa pe'e mongkaan kaanonnyo ka' monginum baso' nu anu sina'unyomo.”

²⁵Lantas i Balak notataemo hi Bileam, “Bakasmo, de beleyum madi' mongka'oho' mongkutuki bansa Israel; panyo boli hondo-hondo mombalakati aha!”

²⁶Tinaaman i Bileam, “Te misa' pinoto'ingkumo hi belento Tuanku, tukoongku aku mombaumo iwi-iwi' apa na anu pinalentahkonmo nu Tumpu?”

²⁷I Balak notatae, “Imbo da kita mambamo i tampat sangga'at. Ihe na monsumbu' Tumpu Allah mompobee'mo beleyum mongkutuki Israel susumo anu ku kahanda'i i tampat kiijo'.”

²⁸Sahingga binoanyomo na i Bileam i bawo nu Bungkutnyo Peor anu mongahopi padang bola.

²⁹Notataemo na i Bileam hi Balak, “Bau na mezbah popitu' i tampat aiya ka' posadia i aiya popitu' na sapi' lakinyo ka' popitu' na domba lakinyo.”

³⁰I Balak nombaumo apaa na anu pinoto'imo i Bileam. Ia nongkolobanakonmo sa'angu' na sapi' lakinyo ka' sa'angu' na domba lakinyo i mezbah aijo' toto sa'angu'.