Read Saluan NOMBILANGMO 28 Bible Online

NOMBILANGMO 28 - Saluan bible

NOMBILANGMO 28

¹Tumpu nompokaumo i Musa,

²da mompotokakon hi bansa Israel tukoonyo aha tionyo ahi' mongintomakon totu-totu'u da toka i tempo'nyo anu tinantukanmo osombahkonmo na to kolo-koloban sumo kaanon anu momposanang kinyonyoa nu Tumpu.

³Aiya na koloban anu tionyo ahi' osombahkon hi Tumpu: Anu okolobanakon sansina-sinaa ohua' na anak nu domba lakinyo anu umunnyo sataunmo anu madi' ko panyakitnyo,

⁴sa'angu' osombahkon daagi' subu ka' sa'angu' mule' osombahkon mamalom.

⁵Hingga-hinggat tiba anak nu domba aijo' tionyo ahi' osombahkon mule' sa'angu' na kilogram na labu ogalo'i nu sa'angu' na liter lanya' nu zaitun anu ma'ima' hondo.

⁶Aijo'mo na koloban anu opotunu ka' anu saja' binau momonanyo lewa' nonsombahkon i Bungkutnyo nu Sinai. Hongohisnyo momposanangmo kinyonyoa nu Tumpu.

⁷Hingga-hinggat tiba anak nu domba aijo' tionyo ahi' osombahkon mule' anggur sa'angu' na liter anu odudu'akon i mezbah.

⁸Anak nu domba anu osombahkon mamalom tionyo ahi' okolobanakon pokakana na mombau sumo anu osombahkon daagi' subu ka' mule' anggur. Hongohisnyo nu koloban anu opotunu aijo' momposanangmo kinyonyoa nu Tumpu.

⁹ I sinaa nu Sabat tionyo ahi' okolobanakon anak nu domba lakinyo ohua' anu umunnyo sataunmo anu madi' ko panyakitnyo, labu ohua' na kilogram ogalo'i nu lanya' nu zaitun bau koloban kaanon ka' koloban anggur.

¹⁰Koloban anu opotunu aijo' tionyo ahi' saja' osombahkon de sinaamo nu Sabat salaku bau pontuangi koloban anu obau sansina-sinaa hingga-hinggat tiba koloban anggur.

¹¹Salatan montampu'unimo bitu'on mule' sa'angu' tionyo ahi' monsombahkonmo hi Tumpu koloban anu opotunu, ohua' na sapi' lakinyo anu daagi' bata'nyo, sa'angu' na domba lakinyo, popitu' na anak nu domba lakinyo anu umunnyo sataunmo, bubuu' anu madi' ko panyakitnyo.

¹²Salaku bau koloban anu okaan tionyo ahi' osombahkon labu anu ogalo'i lanya' nu zaitun; totolu' na kilogram na labu anu ponggampai de sa'angu' na sapi' lakinyo; ohua' na kilogram na labu anu ponggampai de sa'angu' na domba lakinyo,

¹³ka' sa'angu' na kilogram na labu anu ponggampai de sa'angu' na anak nu domba lakinyo. Koloban anu opotunu aijo' salaku bau koloban kaanon, ka' hongohisnyo momposanangmo kinyonyoa nu Tumpu.

¹⁴Hingga-hinggat tiba koloban anu opotunu aijo' tionyo ahi' suele osombahkon na anggur, konjoo'nyo ohua' na liter anu ponggampai de sa'angu' na sapi' lakinyo, ka' sa'angu' na liter anu ponggampai de sa'angu' na anak nu domba. Aijo'mo na atulannyo nu koloban anu opotunu anu tionyo ahi' osombahkon toka sambitu'on de tanggan satumo sataun toka sataun.

¹⁵Salaku bau pontuangi koloban anu opotunu sansina-sinaa tiba koloban anggur, tionyo ahi' suele osombahkon nu belemiu sa'angu' na mee' lakinyo bau koloban pongampuni dosa'.

¹⁶ I tanggan sampulu' ka' opat bitu'on anu momona aijo'mo na sinaa nu Paskah monsombah Tumpu.

¹⁷ Sinaa dodododopnyo aijo'mo tanggan sampulu' ka' olima' otampu'unimo na Lamean nu Roti anu madi' ko Raginyo, ka' pitun sinaa na kopinnyo belemiu madi' timbali mongkaan roti anu obau ogalo'i ragi.

¹⁸I sinaa momonanyo molame'akon aijo' belemiu tionyo ahi' sihukmo pe'e da monsombah Aku ka' madi'mo timbali mokalaja anu maboat.

¹⁹Sombahkonmo hi Tumpu na koloban anu opotunu aijo'mo ohua' na sapi' lakinyo anu daagi' bata'nyo, sa'angu' na domba lakinyo ka' popitu' na anak nu domba lakinyo anu umunnyo sataunmo, bubuu' anu madi' ko panyakitnyo.

²⁰Sombahkonmo na koloban kaanon anu tionyo ahi' obau, aijo'mo labu anu ogalo'i nu lanya' zaitun: totolu' na kilogram na labu anu ponggampai de sa'angu' na sapi' lakinyo, ohua' na kilogram anu ponggampai de sa'angu' na domba lakinyo,

²¹ka' sa'angu' na kilogram anu ponggampai de sa'angu' na anak nu domba lakinyo.

²²Sombahkonmo suele sa'angu' na mee' lakinyo bau koloban pongampuni dosa'. Tiba jalan anu sumo aijo' belemiu mombaumo atulannyo pongampuni dosa' nu mian.

²³Iwi-iwi' na koloban haha aijo' salaku bau pontuangi koloban anu biasamo saja' opotunu daagi' subu.

²⁴Tiba jalan anu sumo aijo' belemiu suele tionyo ahi' monsombahkon hi Tumpu koloban anu opotunu kopinnyo pitun sinaa. Koloban haha aijo' salaku bau pontuangi koloban anu opotunu sansina-sinaa tiba koloban anggur. Hongohisnyo nu koloban aijo' momposanangmo kinyonyoa nu Tumpu.

²⁵I sinaa ko ipitunnyo belemiu tionyo ahi' sihukmo pe'e da monsombah Aku ka' madi'mo timbali mokalaja anu maboat.

²⁶ I sinaa momonanyo nu Lamean de moko Padakmo ka' moko lapasmo popitu' na duminggu na nolame'akon aijo', tempo'nyo aijo' belemiu nonsombahkonmo gandum bu'ou hi Tumpu, belemiu tionyo ahi' sihukmo pe'e da monsombah Aku ka' madi'mo timbali mokalaja anu maboat.

²⁷Sombahkonmo hi Tumpu koloban anu opotunu aijo'mo ohua' na sapi' lakinyo, sa'angu' na domba lakinyo anu daagi' bata'nyo ka' popitu' na anak nu domba lakinyo anu umunnyo sataunmo bubuu' anu madi' ko panyakitnyo. Hongohisnyo nu koloban anu opotunu aijo' momposanangmo kinyonyoa nu Tumpu.

²⁸Sombahkonmo na koloban kaanon anu tionyo ahi' obau, aijo'mo labu anu ogalo'i nu lanya' zaitun: totolu' na kilogram anu ponggampai de sa'angu' na sapi' lakinyo, ohua' na kilogram anu ponggampai de sa'angu' na anak nu domba lakinyo,

²⁹ka' sa'angu' na kilogram anu ponggampai de sa'angu' na anak nu domba.

³⁰Sombahkon suele sa'angu' na mee' lakinyo bau koloban pongampuni dosa'. Tiba jalan anu sumo aijo' belemiu mombaumo atulannyo pongampuni dosa' nu mian.

³¹Koloban haha aijo' tibamo koloban anggur, salaku bau pontuangi koloban anu opotunu sansina-sinaa tiba koloban kaanon.