Read Saluan NOMBILANGMO 3 Bible Online

NOMBILANGMO 3 - Saluan bible

NOMBILANGMO 3

¹Aiyamo na to ana-anak i Harun ka' i Musa tempo'nyo Tumpu notatae hi Musa aita' i Bungkutnyo nu Sinai.

² I Harun ko anak aha opat na mo'ane: i Nadab na tumpe, lapas aijo' i Abihu, i Eleazar ka' i Itamar.

³Aha binalakatanmo ka' i hangkatmo tinimbali imam, ubak nu aha dinudu'an nu lanya'.

⁴ Panyo i Nadab ka' i Abihu sinilakamo i padang bola Sinai, tempo'nyo aha nangadap hi Tumpu nompapui kamangian anu madi' tinalima nu Tumpu. Ua-ua'aha madi' kino anak. Jadi tempo'nyo i Harun daagi' tutuu', i Eleazar ka' i Itamar suele mokalaja salaku imam.

⁵Tumpu notatae hi Musa,

⁶“Pokau mae na tulunan nu bansa Lewi mamba mae mangadap, ka' hangkat na aha da timbali posaihon i Harun.

⁷Aha mokalaja i Kemah-Ku ka' tionyo ahi' mokalaja apaa na anu nu palentahkon nu imam tiba iwi-iwi' na mian mokalaja i Kemah-Ku aijo'.

⁸Kalaja nu aha aijo'mo momposadia anu opalalui i Kemah-Ku ka' mokalaja i Kemah-Ku aijo' da to mia-mian nu Israel sangga'at bolimo mokalaja.

⁹Aha bansa Israel, ola tulunan nu bansa Lewi na Ku pokalaja timbali posaihon anu tataap hi Harun ka' to le-lee'nyo.

¹⁰Panyo i Harun ka' to ana-anaknyo tionyo ahi' nu hangkat da mokalaja salaku imam; de misa' aha, maumo pa' ihe na anu monsoba mokalaja aijo' tionyo ahi' o hukumo mate.”

¹¹Tumpu notatae hi Musa,

¹² “Uuka aiya to mia-mian nu aha Lewi Ku pile'imo Akumo na tumpunyo. Tempo'nyo Aku nompateimo anak tumpe iwi-iwi' hi bansa Mesir, ingalang-Kumo bau samata-mata baging-Ku na anak tumpe mo'ane iwi-iwi' hi aha mian Israel ka' iwi-iwi' na potuu'on nu aha anu momona inganakakon. Iwi-iwi' aijo' Akumo na tumpunyo. Salaku bau pombolosi to ana-anak tumpenyo mo'ane hi aha mian Israel, Aku nongalamo mian nu aha Lewi timbalimo anung-Ku, aha Akumo na tumpunyo. Aku na Tumpu.”

¹³

¹⁴I padang bola Sinai Tumpu nompokaumo i Musa

¹⁵mombau daputan nu to mia-mian aha Lewi o ala i tulunannyo ka' aha sa'anakan toto samian; batu-batu anak mo'ane anu umunnyo molabimo sambitu'on mokita' tionyo ahi' otulismo na sanggonyo.

¹⁶Lantas binaumo i Musa na palentah nu Tumpu aijo'.

¹⁷I Lewi kino anak aha totolu' na mo'ane: i Gerson, i Kehat ka' i Merari. Ahamo na mompolee' nu to tulu-tulunan susumo anu sinanggomo na sanggo nu aha. I Gerson kino anak ua'aha na mo'ane: i Libni ka' i Simei. I Kehat kino anak aha opat na mo'ane: i Amram, i Yizhar, i Hebron ka' i Uziel. I Merari kino anak ua'aha na mo'ane: i Mahli ka' i Musi. Ahamo aijo' na mompolee' mae nu aha sa'anakan anu sinanggomo na sanggo nu aha.

¹⁸

¹⁹

²⁰

²¹Tulunan i Gerson aijo'mo aha sa'anakan mae i Libni ka' aha sa'anakan mae i Simei.

²²Konjoo'nyo nu mo'ane tulunan mae i Gerson anu molabimo sa'angu' na bitu'on mokiita' tinulis konjoo'nyo 7.500 na mian.

²³I Elyasaf anak i Lael na tinimbali polaya' nu tulunan aijo'. I pinombauan kemah nu aha Israel tulunan aijo' nongala tampat i sasu kinsoban i padut nu Kemah nu Tumpu.

²⁴

²⁵Anu mongulus Kemah nu Tumpu, aha na mongkalesang Kemah nu Tumpu ka' kolopnyo, lalanse' i sabatan bau pinsoopan,

²⁶lalanse' i natan anu montikubi Kemah ka' mezbah, ka' lalanse' nu sabatan i natan aijo'. Aha na mongkalesang iwi-iwi' na pakalaja'an apaa na obau i balang haha aijo'.

²⁷Tulunan i Kehat aijo'mo aha sa'anakan mae i Amram, i Yizhar, i Hebron ka' i Uziel.

²⁸Mo'ane anu umunnyo molabimo sa'angu' na bitu'on mokiita' anu i tulunan aijo' iwi-iwi' konjoo'nyo 8.600 na mian. Kalaja nu aha mongkalesang to paka-pakakas nu Kemah nu Tumpu.

²⁹I Elisafan anak i Uziel na polaya' nu tulunan aijo'. Pinombauan kemah nu tulunan aijo' nongala tampat i sasu selatan Kemah nu Tumpu.

³⁰

³¹Aha na mongkalesang Peti' Palajanjian, meja' tengke nu sulu', to mezbah-mezbah, pakakas anu opake nu to ima-imam i Salipi anu Susi', ka' lalanse' anu mongoloti Salipi' anu Susi'. Aha na mongkalesang iwi-iwi' na pakalaja'an apaa na obau i balang haha aijo'.

³²Polaya' tulunan nu aha Lewi aijo'mo i Eleazar, anak i Harun. Ia na montoa to mia-mian anu mokalaja i Salipi' anu Susi'.

³³Tulunan mae nu aha Merari aijo'mo sa'anakan mae i Mahli ka' sa'anakan mae i Musi.

³⁴Mo'ane anu ko umunmo molabimo sambitu'on mokiita' hi tulunan haha aijo' iwi-iwi' konjoo'nyo 6.200 na mian.

³⁵I Zuriel anak i Abihail na polaya' nu tulunan haha aijo'. Pinombauan nu aha kemah nu tulunan aijo' nongala tampat i sasu utara i Kemah nu Tumpu.

³⁶Aha na mangaku mongkalesang olon nu Kemah, to bala-balaknyo, to ohi-ohi'nyo, paningkokoannyo ka' iwi-iwi' na pakakasnyo, ka' mule' iwi-iwi' na pakalaja'an anu obau i balang haha aijo'.

³⁷Ka' suele tutupnyo nu to ohi-ohi'nyo, ka' bau paningkokoannyo, bau sapa ka' to kaho-kahohon anu opake i sambiha'nyo nu natan.

³⁸Pombauan kemah, i Musa ka' i Harun ka' to ana-anaknyo tionyo ahi' mongala tampat i ahop nu Kemah nu Tumpu sasu kabete'an. Aha na mongkalesang Salipi' anu Susi' ka' atulan nu aha bansa Israel de monsombahmo Tumpu. De misa' aha maumo pa' ihe na monsoba mombau pakalaja'an aijo' tionyo o hukum mate.

³⁹Iwi-iwi' na mo'ane i tulunan nu bansa Lewi anu umunnyo molabimo sa'angu' na bitu'on mokiita' anu dinaputanakonmo i Musa ingala i tulunan nu aha toto samian, susumo anu pinalentahkonmo nu Tumpu, konjoo'nyo iwi-iwi' 22.000 na mian.

⁴⁰Tumpu notataemo hi Musa, “Anak tumpe mo'ane iwi-iwi' hi aha bansa Israel Akumo na tumpu-Nyo. Tulismo na sanggo nu aha iwi-iwi' anu umunnyo molabimo sa'angu' na bitu'on mokiita. Panyo salaku bau pombolosi aha, Kupoto'i saba iwi-iwi' na mian nu aha Lewi Akumo na tumpunyo. Akumo na Tumpu! Ka' potu'on nu aha mian Lewi suele Kupoto'i baumo pombolosi iwi-iwi' na binatang anu momona opo anak hi aha bansa Israel.”

⁴¹

⁴²I Musa nombaumo apaa na anu pinalentahkonmo nu Tumpu; ia nontulismo sanggo nu to ana-anak mo'ane iwi-iwi' anu tumpenyo

⁴³anu umunnyo molabimo sa'angu' na bitu'on mokiita.

⁴⁴Lantas Tumpu notataemo hi Musa,

⁴⁵“Padonakonmo samata-mata na aha mian Lewi hi beleng-Ku salaku bau pombolosi iwi-iwi' na anak tumpe mo'ane anu hi aha Israel; ka' suele potuu'on nu aha mian Lewi salaku pombolosi potuu'on nu aha mian Israel.

⁴⁶Kalana to ana-anak mo'ane anu tumpenyo hi aha Israel 273 na mian, lebe manjoo' molingkudui konjoo'nyo nu aha mian Lewi, sahingga labinyo aijo' tionyo ahi' otobus nu belemiu.

⁴⁷Kona hi samian na anak belemiu tionyo ahi' mombayan olima' na doi salaka susumo angga'nyo anu biasa opake i Kemah-Ku,

⁴⁸bee' na doi aijo' hi Harun ka' hi to ana-anaknyo.”

⁴⁹I Musa nombaumo palentah nu Tumpu aijo'.

⁵⁰Ia nongala 1.365 na doi salaka,

⁵¹ka' nombee'mo hi Harun ka' hi to ana-anaknyo.