Read Saluan NOMBILANGMO 32 Bible Online

NOMBILANGMO 32 - Saluan bible

NOMBILANGMO 32

¹Tulunan nu bansa Ruben ka' i Gad ka' potuu'on manjoo' hondo. Salatan tinoa nu aha ma'ima' hondo na tano' nu Yaezer ka' tano' nu Gilead bau pompotuu'an binatang,

²nambamo na aha nangadap hi Musa, hi Imam Eleazar, ka' to pola-polaya' sangga'at nu aha Israel. Aha notatae,

³“Tano' nu kota-kota Atarot, Dibon, Yaezer, Nimra, Hesybon, Eleale, Sebam, Nebo ka' Beon anu kinuasaanmo nu Israel, kalana tinulunganmo nu Tumpu, ma'ima' hondo na pompotuu'an binatang. Jadi kalana potuu'on mami manjoo' hondo,

⁵opoita mami na tano' aijo' obee'mo mae hi kami da timbalimo anu mami. Bolimo monsai kami molalin i santoa nu Kaunyo Yordan.”

⁶Tinaaman i Musa, “Kadaka' belemiu mongka'oho'mo jojoong i aiya sadang to mia-mian bubuu' bansa nu belemiu nambamo nahampate?

⁷Kadaka' belemiu mompopobuhukmo bansa Israel da madi'mo motaap i Kaunyo nu Yordan ka' minsoop i lipu' anu binee'mo nu Tumpu hi aha?

⁸ To tutuuma nu belemiu suele nombaumo sumo aijo' tempo'nyo aku nonsaimo aha lengkat mae i Kades-Barnea da mamba montoa pa' mosia na lipu' aijo'.

⁹Aha tinokamo i Bangka'nyo nu Eskol ka' nontoamo tano' aijo'. Panyo salatan aha ninsusule'mo mae, aha nompopobuhukmo bansa Israel da bolimo minsoop i tano' anu binee'mo nu Tumpu hi aha.

¹⁰ Sahingga notambuha'mo na Tumpu tempo'nyo aitu sahingga Ia notataemo, ‘Mian haha aiya madi' tulu-tulutan hi beleng-Ku. Mokonyo aijo' Aku basumpa' da mian aijo' hi aha anu ko umunmo uampulu'mo na taun mokiita' tempo'nyo aha nompala'imo mae Mesir madi'mo ko anu minsoop i lipu' anu jinanji'-Kumo hi Abraham, hi Ishak ka' hi Yakub.’

¹²Iwi-iwi' na mian mohumpak hukuman aijo' ola i Kaleb anak i Yefune, mian nu Kenas, tiba i Yosua anak i Nun na madi', kalana ua-ua'aha na saja' ahi' tulu-tulutan hi Tumpu.

¹³Tumpu nontambuha'imo bansa Israel sahingga Ia nompojohokmo aha nahalajangan i padang bola pinatompulu' na taun na kopinnyo sahingga iwi-iwi' na mian anu noto idekmo hi Ia sinilakanmo iwi-iwi'.

¹⁴Ka' uuka aiya belemiu moto idekmo mule' susumo to tutuuma nu belemiu! Belemiu memang gombuan nu to mia-mian anu baladosa' anu nonsaduakonmo Tumpu po'ule'mo nontambuha'i Bansa Israel!

¹⁵De belemiu mohikumo Tumpu saba' iwi-iwi' na bansa aiya Nu pojohokmo lebe pin mule' i padang bola, ka' belemiumo na monsaduakon aha silaka!”

¹⁶Lantas aha mian nu Ruben ka' aha mian nu Gad haha aijo' nokiijo'mo oha-ohani hi Musa ka' notatae, “Sahanyo kami mombau pe'e momona to pangku-pangkun anu o mesen pompojoongan iwi-iwi' na domba mami ka' iwi-iwi' na kota anu obaui bentengnyo bau kajojoongan nu to ana-anak ka' bengkele' mami.

¹⁷Kami mosadiamo mamba mahampate hingga-hinggat tiba to utu-utus mami. Kami na mamba aita' momona montumbuhi ka' momboamo aha minsoop i lipu' anu saidi' mae nu alamo nu aha. Hau-haunyo aijo' to ana-anak ka' bengkele' mami jojoong i aiya i to kota-kota anu ko bentengnyo, anu madi' nupoko ala mae nu tumpumbuhi nu mian i lipu' aiya.

¹⁸Kami madi' minsusule' i laigan mami de ma'isa pe'e iwi-iwi' mian nu aha Israel mohumpak tano' bau pusaka' nu aha.

¹⁹Mau ola sangkiding na tano' nu aha madi'kami mongala anu kiijo' i santoa nu Kaunyo nu Yordan kalana nohumpakmo bagi na kami i aiya, i sasu kabete'an Kaunyo nu Yordan.”

²⁰Tinaaman i Musa, “De belemiu mongka'oho'mo mogogau' mamba mahampate kalana montuluti palentah nu Tumpu,

²¹ka' iwi-iwi' na mian anu atina' hi belemiu anu moko alamo mahampate ka' motaap i Kaunyo nu Yordan, ka' Tumpu na momboa montumbuhi sampobali' nu aha, sahingga aha nulaa'mo nu Tumpu,

²²sahingga lipu' aijo' matundu'mo hi ia, jadi belemiu timbalimo minsusule' ka' bebasmo na belemiu kalana moko baumo apaa na anu pinalentahkonmo nu Tumpu ka' suele noko tulungimo to utu-utus nu belemiu, ka' nubee'mo nu Tumpu na tano' anu i sasu kabete'an aiya da belemiumo na tumpunyo.

²³Panyo ingat, de belemiu madi' mombau anu jinanji'mo nu belemiu, belemiu baladosa'mo hi Tumpu ka' o hukumo, kalana dosa' nu belemiu atina'.

²⁴Lako'mo bau na to kota-kota nu belemiu ka' pangkun na to domba-domba nu belemiu ka' boli okolilimi na mombau apaa na anu jinanji'mo nu belemiu aijo'!”

²⁵Lantas aha mian nu Gad haha aijo', ka'aha mian nu Ruben haha aijo' notataemo, “Tuan, obaumo mami apaa na anu pinalentahkonmo nu belento Tuan.

²⁶Anak tiba bengkele' mami tiba potuu'on sapi' tiba domba mami jojoongmo i aiya, i kota haha aiya nu aha mian Gilead.

²⁷Panyo kami aiya mogogau'mo mamba mahampate, Tumpu na momboa. Otaap mami na Kaunyo nu Yordan ka mahampatemo susumo anu pinoto'imo nu belento Tuan.”

²⁸ Sahingga i Musa nombee'imo palentah aiya hi Imam Eleazar, hi Yosua tiba hi to pola-polaya' nu aha Israel,

²⁹“De aha mian nu Gad haha aijo' tiba mian nu aha Ruben haha aijo' montuluti palentah nu Tumpu ka' motaapmo i Kaunyo nu Yordan mamba mahampate, ka' kalana binantumo nu aha, belemiu moko alamo mompatundu' lipu' aijo', jadi tano' nu Gilead tionyo ahi' obee'mo nu belemiu hi aha da ahamo na tumpunyo.

³⁰Panyo de aha madi' motaap i Kaunyo nu Yordan mamba mahampate hingga-hinggat tiba belemiu, nyata aha tionyo ahi' mongala pombahagian tano' pusaka i lipu' Kana'an susumo belemiu.”

³¹Mian nu Gad haha aijo' tiba mian nu Ruben haha aijo' nontaamimo, “Tuan obaumo mami apaa na anu pinalentahkonmo nu Tumpu.

³²Tumpu na momboa kami motaap mokiijo' i lipu' nu aha Kana'an ka' mahampate, panyo tano' i sasu kabete'an nu Kaunyo nu Yordan aiya sabole-bolemo ahi' kamimo na tumpunyo.”

³³Lantas binee'mo i Musa hi aha tulunan nu bansa Gad haha aijo' tiba Ruben ka' sambahagian na tulunan nu bansa Manase songko-songko na daerah nu Sihon, Tomundo nu Amori, tiba daerah Og, tomundo nu Basan, tibamo to kota-kota ka' tano'nyo songko-songko.

³⁴Tulunan nu bansa Gad po'ule'mo nombau kota Dibon, Atarot, Aroer,

³⁵Atarot-Sofan, Yaeser, Yogbeha,

³⁶Bet-Nimra, tiba Bet-haran aijo' na to kota-kota anu ko bentengnyo ka' aijo'mo na tampat nu pangkun nu to domba-domba.

³⁷Tulunan nu bansa Ruben po'ule'mo nombau kota Hesbon, Eleale, Kiryataim,

³⁸Nebo, Baal-Meon tiba Sobam. Kota haha aijo' anu po'ule'mo binau nu aha binolosanmo nu aha na sanggonyo.

³⁹Beleyum Makhir, anak i Manasye, namontumbuhi tano' nu Gilead, lantas mompatundu'mo ka' molaa'mo aha mian nu Amori anu jojoong ikiijo'.

⁴⁰Kalana aijo' i Musa nombee'mo tano' nu Gilead aijo' hi aha sa'anakan i Makhir, ka' aha jinojoongmo ikiijo'.

⁴¹I Yair tulunan mae nu bansa Manasye nontumbuhimo ka' nompatundu'mo tinopia-piangkuka na kampung lantas sinanggohannyomo, “Kampung-kampung Yair”.

⁴²I Nobah nontumbuhimo ka' nompatundu'mo Kehat tiba kampung-kampungnyo iwi-iwi' lantas sinanggohannyomo Nobah, i ngalanyo i posi sanggonyo.