Read Saluan NOMBILANGMO 33 Bible Online

NOMBILANGMO 33 - Saluan bible

NOMBILANGMO 33

¹Salatan bansa Israel nompala'imo Mesir, tompukon nu aha lumajang madi' mogogalo'an tiba tulunan nu bansa sangga'at, polaya' nu aha i Musa ka' i Harun, aha sinonso' i pa' sangkuka na tampat.

²Tumpu nompalentahmo i Musa da o tulis na sanggo nu to tampa-tampat anu kinasonso'an nu aha.

³Bansa Israel nompala'i Mesir kinona i tanggan sampulu'mo ka' olima' bitu'on anu momonanyo, noko lapasmo sinansinaa na nolame'akon Paskah i sinaanyo momona. Tumpu na nonjagai aha nompala'i kota Rameses, sinakisian nu bansa Mesir,

⁴anu hau-haunyo molamun to ana-anak nu aha anu tumpenyo anu pinateanmo nu Tumpu. Tiba jalan anu sumo aijo' Tumpu nomponyata'mo saba' Ia na lebe mahoson molingkudui to pilo-pilogot nu aha Mesir.

⁵Salatan bansa Israel nompala'imo Rameses, aha nombaumo kemah i i Sukot.

⁶Lantas aha po'ule'mo namba ka' nombaumo kemah i Etam, i sohipi' nu padang bola.

⁷Lengkat ikiijo' aha po'ule'mo ninsusule' namba i Pi-Hahirot, sasu kabete'an Baal-Zefon, lantas nombaumo kemah koko Migdol.

⁸Lapas aijo' aha nompala'imo Pi-Hahirot, notaapmo i ambai ka' nambamo i padang bola Etam; salatan tinolun sinaamo na i lumajang, aha nombaumo kemah i Mira.

⁹Lengkat ikiijo' aha nambamo mule' ka' nombaumo kemah i Elim; ikiijo' daagi' ko bulakan nu uee sampulu' ka' ohua' ka' pitumpulu' na kauannyo nu kau' kurma.

¹⁰Lapas aijo' aha nompala'imo Elim ka' nombaumo kemah koko Luoknyo nu Suez.

¹¹Lapas aijo' aha nombaumo kemah i padang bola Sin, ka' lapas mule' koko Dofka, lapas aijo' i Alus, ka' lapas mule' i Rafidim, panyo ikiijo' madi' ko uee anu o inum.

¹⁵Lengkat mae i Rafidim aha lau-lausmo namba i Bungkutnyo nu Hor ka' nombaumo kemah i tampat haha aiya: i padang bola Sinai, Kibrot-Taawa, “Kubulan nu anu Mabebes”, Hazerot, Ritma, Rimon-Peres, Libna, Risa, Kehelata, Bungkutnyo nu Syafer, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ezion-Geber, padang bola Zin, ka' Bungkutnyo nu Hor, potempasanmo nu tano' Edom.

³⁸ Kalana palentah nu Tumpu, i Imam Harun nindakomo i Bungkutnyo nu Hor. Ikiita' mae ia sinilakamo kinona i tanggan sa'angu' bitu'on ko olima'nyo, i taun ko patompulu'nyomo salatan bansa Israel nompala'imo mae Mesir. Tempo'nyo i Harun sinilakamo umunnyo 123 mo na taun.

⁴⁰ Hau-haunyo aijo' tomundo nu aha lipu' Arad, i Tano' Negeb, Kana'an sasu Selatan, nohumpakmo lele tukoonyo nu mian, aha mian Israel hau-haunyomo mokiijo' i lipu' nu aha.

⁴¹Aha i lumajang lengkat mae i Bungkutnyo nu Hor namba i hatanyo nu Moab, mian nu Israel nombaumo kemah i tampat haha aiya: Zalmona, Funon, Obot, pinohobo'an nu Abarim, i da'erah nu Moab, Dibon-Gad, Almon-Diblataim, Bungkutnyo nu Abarim koko Bungkutnyo nu Nebo ka' i hatanyo nu Moab i sohipi' nu Kaunyo Yordan, koko kota Yerikho, olotnyo nu Bet-Yesimot tiba Bangka'nyo nu Sitim.

⁵⁰I hatanyo nu Moab aijo', i sohipi' nu Kaunyo Yordan koko kota Yerikho, Tumpu nombee'mo hi Musa

⁵¹palentah haha aiya kona hi bansa Israel, “De belemiu notaapmo i Kaunyo nu Yordan kahanda' minsoopmo i lipu' Kana'an,

⁵²belemiu tionyo ahi' molaa' iwi-iwi' na anu jojoong i lipu' aijo'. O idei iwi-iwi' na bapilogotan nu aha, anu batu na binau, ka' tambaga ka' mule' tampat bau ponsomban nu aha.

⁵³Tano' aijo' tionyo ahi' o ala nu belemiu ka' o jojoongi nu belemiu, kalana Ku bee'mo hi belemiu.

⁵⁴ Lapas aijo' o bagi-bagimo nu belemiu baumo pusaka' nu to tulu-tulunan nu bansa miu, mombagi aijo' o buangakon onde. Hi tulunan nu bansa anu manjoo' tionyo ahi' obee'i nu belemiu bahagian anu manjoo', ka' hi tulunan nu bansa anu sangkiding bahagiannyo suele ahi' sangkiding.

⁵⁵Panyo de anu jojoong i lipu' aijo' madi' o laa' nu belemiu mian haha aijo' anu sabole-bole jojoong ikiijo' saidi' mae momposusa'mo belemiu sumomo bone' i mata nu belemiu kabai hii' i tengke nu belemiu. Saidi' mae ahamo na mompahampateakon belemiu.

⁵⁶De belemiu madi' molaa' aha, Akumo na mompatei belemiu susumo anu kinahanda'an-Kumo obau hi aha.”