Read Saluan NOMBILANGMO 34 Bible Online

NOMBILANGMO 34 - Saluan bible

NOMBILANGMO 34

¹Tumpu nombee'mo palentah haha aijo' hi Musa

²kona hi bansa Israel, “Madi'mo pin belemiu minsoopmo i lipu' Kana'an, lipu' anu Ku bee'mo hi belemiu da bau tano' pusaka'. Aiya na potempasan nu lipu' miu aijo'.

³I sasu selatan potempasannyo aijo' otampu'uni lengkat mae i padang bola Zin montusakon Edom. I sasu kabete'an potempasannyo otampu'uni lengkat mae i pusnyo sasu selatan Ambai Mate,

⁴obioho'akon sasu selatan mompatui Jalan Akrabim ka' lau-lausmo toka-toka i Zin, toka-toka i Kades-Barnea sasu selatan. Lengkat ikiijo' obioho'akon sasu kinsoban bahagian ambai toka i Hasar-Adar, ka' lau-lausmo toka-toka i Azmon.

⁵Toka ikiijo' siopo'akon sasu bangka'nyo potempasan nu Mesir ka' ahennyo i Ambaimo anu Totonga'nyo.

⁶Ambai anu Totonga'nyo aijo'mo na potempasan nu lipu' miu i sasu kinsoban.

⁷I sasu utara potempasannyo aijo' otampu'uni i Ambai anu Totonga'nyo mokiijo' i sasu bungkutnyo nu Hor

⁸ka' lengkat ikiijo' mokiijo'mo i Jalan Hamat, lantas lau-lausmo toka-toka i Zedad

⁹ka' toka-toka i Zifron ka' ahennyo toka i Hazar-Enan.

¹⁰I sasu kabete'an potempasannyo aijo' otampu'uni lengkat mae i Hazar-Enan toka-toka i Sefam.

¹¹Lengkat ikiijo' mokaiyong i Ribla i sasu kabete'an Ain, lantas lau-lausmo toka-toka i puge'nyo haha kiijo' i biwi nu ambai sasu kabete'an i Dowiwi Galilea.

¹²Lantas nokiijo'mo i sasu selatan montusakon Kaunyo nu Yordan toka-toka i Ambai Mate. Aijo'mo na lipu' nu belemiu anu ko potempasannyomo titikub.”

¹³ I Musa notataemo hi bansa Israel, “Aijo'mo na tano' anu saidi' mae o alamo nu belemiu de o buangakonmo onde, tano' anu pinalentahkonmo nu Tumpu anu tionyo ahi' obagiakon hi osio' ka' mintonga' na tulunan nu bansa Israel.

¹⁴To tulu-tulunan nu bansa Ruben ka' Gad tiba sambagian na tulunan nu bansa Manasye nohumpakmo bahagian na aha, ka' tano' aijo' suele binagimo hi to au-auan nu aha.

¹⁵Tano' pusaka' nu aha aijo' i sasu kabete'an Kaunyo nu Yordan, koko kota Yerikho.”

¹⁶Tumpu notataemo hi Musa,

¹⁷“Anu tionyo ahi' mombagiakon tano' aijo' atina' hi belemiu aijo'mo i Imam Eleazar ka' i Yosua anak i Nun.

¹⁸O hangkat suele samian na polaya' hi toto sa'angu' na tulunan nu bansa da montulungi i Eleazar ka' i Yosua mombagiakon tano' aijo'.”

¹⁹Sanggo nu mian haha aijo' atina'mo: [TULUNAN NU BANSA] — [POLAYA'NYO] Yuda — i Kaleb anak i Yefune Simeon — i Samuel anak i Amihud Benyamin — i Elidad anak i Kislon Dan — i Buki anak i Yogli Manasye — i Haniel anak i Efod Efraim — i Kemuel anak i Siftan Sebulon — i Elisafan anak i Parnah Isakhar — i Paltiel anak i Azan Asyer — i Amihud anak i Selomi Naftali — i Pedael anak i Amihud

²⁹Aijo'mo na to mia-mian anu pinalentahmo nu Tumpu da mombagiakon tano' pusaka' hi bansa Israel i lipu' Kana'an.