Read Saluan NOMBILANGMO 4 Bible Online

NOMBILANGMO 4 - Saluan bible

NOMBILANGMO 4

¹Tumpu nompokaumo i Musa tiba i Harun

²da mombilang aha mian Lewi tulunan mae i Kehat toto sa'angu' na auwannyo,

³lantas o tulismo na sanggo nu mo'ane iwi-iwi' anu ko umunmo tolumpulu'mo na taun sampe limampulu'mo na taun anu moko alamo mokalaja i Kemah nu Tumpu.

⁴Pakalaja'an nu aha aijo'mo mongkalesang to paka-pakakas anu susi' hondo.

⁵Tumpu nombee'mo atulan haha aiya hi Musa: De tokamo i tempo'nyo montatakimo Kemah, i Harun ka' to ana-anaknyo tionyo ahi' minsoop i Kemah nu Tumpu mongalini lalanse' i ahop nu Peti' Palajanjian ka' mongkukubi Peti' aijo' nu hude aijo'.

⁶Lapas aijo', aha tionyo ahi' mongkukubi mule' nu santake na kilit anu ma'ima' hondo lantas momposabutmo sambotu' na hude mobilu' i buannyo ka' mompokonamo kau' bau polembanan Peti' aijo'.

⁷Aha tionyo ahi' mongkukubi nu sambotu' na hude mobilu' i meja' pompo'una'an roti anu okaan anu bau bagi nu Tumpu, ka' aita' i meja' aijo' tionyo ahi' nupotimpasi nu aha lean, dulang, bau pompotimpasan kamangian, dulang pompotimpasan anu osombahkon ka' selekan pongisian anggur anu osombahkon. Roti kaanon tionyo ahi' saja' opo'una' i meja' aijo'.

⁸Iwi-iwi' aijo' tionyo ahi' nukukubi nu aha nu hude momea' sambotu', lantas oposabutmo na kilit santake anu ma'ima' hondo aita' i buannyo, ka' opokonamo na kau' bau polembanan meja' aijo'.

⁹Aha tionyo ahi' mongala sambotu' na hude mobilu' ka' mongkukubi tengke nu sulu' tiba iwi-iwi' na sulu'nyo, pakakas bau pompobelesi' sumbu nu sulu'nyo ka' ponsamonnyo lanya' ka' iwi-iwi' na pompo'una'an lanya' nu zaitun.

¹⁰Tengke nu sulu' ka' iwi-iwi' na talakonannyo tionyo ahi' nulupi' nu aha nu kilit anu ma'ima' hondo santake, lantas opotimpasmo aita' i polembanan.

¹¹Lapas aijo' tionyo ahi' oposabutmo nu aha na hude mobilu' sambotu' aita' i mezbah mosoni' aijo', ka' mongkukubi nu kilit anu ma'ima' hondo santake, lantas opokonamo na kau' bau polembanan mezbah aijo'.

¹²Iwi-iwi' na pakakas anu opake i uno nu Salipi' anu Susi' tionyo ahi' nu ala nu aha ka' olupi' nu sambotu' na hude mobilu'. Lantas tionyo ahi' nukukubi nu aha nu kilit anu ma'ima' hondo santake, ka' opotimpasmo aita' i polembanan.

¹³Aha tionyo ahi' mompobelesi' abu' i mezbah aijo', lantas mongkukubi nu sambotu' na hude anu mingkamumu' aita' i bawonyo.

¹⁴Ka' aita' i bawonyo aijo' nu paha potimpasmo nu aha iwi-iwi' na pakakasnyo anu opake monsombah i mezbah aijo': pomposulian apu, sobang, ponsangku' ka' pongisian uee. Lantas tionyo ahi' nukukubi nu aha iwi-iwi' aijo' nu kilit anu ma'ima' hondo santake ka' opokonamo na kau' polembanan.

¹⁵Tumpu notataemo hi Musa ka' hi Harun, “De belemiu montatakimo kemah, i Harun ka' to ana-anaknyo tionyo ahi' minsoopmo i uno nu Kemah-Ku, ka' mongkukubi iwi-iwi' pakakas ka' talakonannyo anu ikiijo'. Lapasje na aijo', to mia-mian nu Kehat timbalije toka da monsimbumo. Panyo aha madi' timbali montoa, mongohani, kabai monsala' kanyang balang haha aijo', kalana binee'mo na aijo' samata-mata hi beleng-Ku. De aha sabole-bole ahi' mombau, aha matemo. Jadi da to mia-mian nu aha Kehat aijo' boli molapus i tulunan nu bansa Lewi, i Harun ka' to ana-anaknyo tionyo ahi' mombee'i kalaja toto samian hi aha apaa na anu tionyo ahi' nuboa nu aha. Aijo'mo na pakalaja'an nu aha mian Kehat, de Kemah-Ku olalinmo. I Eleazar, anak i Harun na mongkalesang iwi-iwi' i Kemah-Ku, lanya' nu sulu', kamangian, gandum anu okolobanakon bau, koloban kaanon, lanya' anu opake monsombah ka' iwi-iwi' na anu i uno nu Kemah-Ku aijo'.”

²¹Tumpu nompokaumo i Musa,

²²da mombilang aha mian Lewi tulunan mae i Gerson toto sa'angu' na auwan nu aha.

²³I Musa tionyo ahi' montulis sanggo nu mo'ane iwi-iwi' anu ko umunmo tolumpulu'mo sampe limampulu'mo na taun anu moko alamo mokalaja i Kemah nu Tumpu.

²⁴Aha binee'an pakalaja'an mongato balang haha aiya:

²⁵Hude pongatopi Kemah aijo' tiba pongkukubinyo sasu unonyo ka' sambiha'nyo, kilit anu ma'ima' hondo na binau, hude i sabatan nu Kemah,

²⁶hude bola-bola ka' to kaho-kahohonnyo anu opake i natannyo ka' i songko-songko na Kemah ka' mezbah, hude anu pinokona i sabatan daka' nu natan ka' iwi-iwi' na talakonannyo anu opake mompokona iwi-iwi' na balang haha aijo'. Aha na mongkalesang pakalaja'an iwi-iwi' aijo' de mompokonamo balang haha aijo'.

²⁷I Musa ka' i Harun tionyo ahi' monjagai da pakalaja'an anu binee'mo i Harun ka' to ana-anaknyo hi aha mian nu Gerson aijo' okalaja ahi', ka' iwi-iwi' na balang anu tionyo ahi' o ato sabole-bole ahi' o ato.

²⁸Aijo'mo na pakalaja'an nu aha mian nu Gerson i uno nu Kemah; Pakalaja'an haha aijo' tionyo ahi' okalaja ka' polaya' nu aha i Itamar, anak i Imam Harun.

²⁹Tumpu nompokaumo i Musa da mombilang aha mian nu Lewi tulunan mae i Merari toto sa'angu' na auwan nu aha.

³⁰I Musa tionyo ahi' montulis sanggo nu, mo'ane iwi-iwi' anu ko umunmo tolumpulu'mo sampe limampulu'mo na taun anu moko alamo mokalaja i Kemah nu Tumpu.

³¹Aha binee'an pakalaja'an mongato to paka-pakakas nu Kemah aijo', to bala-balaknyo, to ohi-ohi'nyo ka' paningkokoannyo.

³²Ka' mule' suele to ohi-ohi'nyo anu opake i natan titikub nu Kemah aijo' tiba suele paningkokoannyo iwi-iwi' ka' totokolonnyo ka' iwi-iwi' na kahohonnyo tiba iwi-iwi' na pakakasnyo anu opake mompotinjo. Toto samian obee'i pakalaja'an momboa to bala-balang anu tinantukanmo.

³³Aijo'mo na pakalaja'an nu to mia-mian tulunan mae i Merari; iwi-iwi' na pakalaja'an nu aha i Kemah nu Tumpu tionyo ahi' obau ka' polaya' nu aha i Itamar, anak i Imam Harun.

³⁴Susumo anu pinalentahkonmo nu Tumpu, i Musa ka' i Harun ka' to pola-polaya' nu aha mian nombilangmo anu aha totolu' mae na tulunan, lee' mae nu bansa i Lewi, aijo'mo i Kehat, i Gerson ka' i Merari. Aha nolekengmo aijo' sangauwan toka sangauwan. Aha nontulismo sanggo nu mo'ane iwi-iwi' anu ko umunmo tolumpulu'mo na taun anu moko alamo mokalaja i Kemah nu Tumpu. Aiyamo na hasinnyo: [TULUNAN] — [KONJOO'NYO NU MIAN] I Kehat — 2.750 I Gerson — 2.630 I Merari — 3.200 — Konjoo'nyo iwi-iwi: — 8.580

⁴⁹Palentah nu Tumpu anu pinotokamo i Musa, da toto samian odaputanakonmo ka' obee'imo pakalaja'an toto samian apaa na anu tionyo ahi' nubau nu aha kabai apaa na anu tionyo nusimbu nu aha.